¹ Quaix đangz yaz năngx phătc pitc tauh Stynz-munh tăng woa Tênb-toongh nzac taih, nănh naih quyênh lub nzongf, yâuc naih gwăngz-eng syux comx nây bamh canz. ² Nănh nongc stingb hamv coong, “Ba-bi-lôn stengv lex! Bengb zef gôh! Nâyx zanyf six pênx stanyv manđ yămz nyăngz tync, naih muif hungđ manđ yotz yămz lâyc, yâuc naih đungx hungđ stengb hiv cloon naih wâyx nyăngz noc yămz lâyc. ³ Wâyc manf Côkz munh oix hopb nănh văngc munh nyăngz tyu, bamh canz nyăngz Hungh yâuc oix văngc nănh, gungh đi nyăngz stanyb âyx munh oix păngc nănh tuz puv Quâyx. ⁴ Năngx naih pitc hungđ woac stingb yămz woa Tênb-toongh coong seetb taih, yaz nyăngz pec stingx lex! Tyuv seetb lâyc nomz stengv ninyh zef gôh, wâyc phunz nyâuh max zuc cloon nănh stiz naih phănc ayx stoif. Wâyc phunz nyâuh max zâuđ cloon nănh stiz zuc staiz nanc. ⁵ Wâyc zuc nănh nyăngz stoif lub đuiz njăngb toongz bengc gungh, songđ wâyc Tênb-Hungh songđ max hayh nyâuđ cob nyâuh lâyc nomz stengv ayx nyăngz huđ dlayc. ⁶ Nănh ayx năngđ laix phunz nyâuh, nyâuh nyămh dlongh ayx năngđ woa nâyx clao toiv phunz nănh gâpv đôi. Six zuc pha tyu năngx jetz phunz nănh, cayx năngđ nănh pha phunz pitc lanh nâyx. ⁷ Nănh cănh zanyb nănh ayx lub, yâuc cănh âyz nănh nyăngz stymz nyâuđ nyâyh ayx đungx hungđ dlayc, Six zuc ayx clao phunz nănh pongh zuc đungx hungđ zâuđ nanc nyăngz dlayc, nănh coong Yaz ayx Hungh nzif yâuc stâyv Hungh tync, yaz six max zâyf au Qua, yaz stâyv quâyx max pâyz stauh six ayx laix. ⁸ Tauv naih ah noib, nănh six zuc staiz nanc tuih nzac nănh cah zâyc taih, phunz nănh zuc tayc stutc, nyâuđ sab năngv yâuc haoh, zuc tâuf pu sac yiuc nzuf, wâyc zuc Zâu Tênb-Hungh six stămđ nănh nyăngz stoif, yâuc năngx yongb quaix woax tauh Zâu. ⁹ Bamh canz nyăngz songx Hungh stix, yâuc văngc nănh, yâuc mungc tuz puv quâyx woax đomc munh tuz phătc pu nănh woax đomc tâuf sâuv seetb staox taih, nănh stiz tinyh đoih songđ pungx stingb haoh. ¹⁰ Woax đomc Hungh stix songđ stâuđ woa côz côz ha mangc, phătc nănh zuc dlauc wâyb seenz numđ cumh nzav nzongf! Nănh stiz coong, “Seenz numđ stauh mâyh gôh! Wăn nzongf nyăngz ba-bi-lôn stengv lex! Ah zanyf gungh mâyh zâyf zuc tingc stoif nzof. ¹¹ Gungh đi nyăngz stanyb âyx munh songđ numđ stauh nzongf, wâyc zuc blătc nây staox ninyh max naih mănv zoz nănh stiz nyăngz huv. ¹² nănh stiz nyăngz huv six nongc sămz nongc nyanh, nongc saix nzongf nyăngz njauz pyây, nongc pou zâuz, đôc buyx, mâuh mengz buf, mâuh stib nonc, muif hungđ njăngx đangz, nongc sax hungđ saix nzongf nyăngz njăngx đangz, nongc njab, nongc tongh zâyx taih nyăngz tax hungđ. ¹³ Nănh stiz nyăngz huv six ( quêv hương lêuf nyang, nam box yâuh đangz, phan-sen-cen, Cah-lanv-yâuh, ) tungh côh tyu, văn, blauh zayz, yungh ngoongh, maf cloon sex, ayx nâuh munh, cloon munh nyăngz mengc hoonh. ¹⁴ Woax đomc stanyb âyx munh coong ănz woax nomz stengv Coong, “mâyh nyăngz stymz nyâuđ mauh oix nongc nyăngz tax hungđ jac nzuf nzof gôh, mâyh saix nzongf nyăngz jax toongx jac blatb nzuf blătc nây ninyh max hayh naih đomc ya nzof gôh. ¹⁵ Couv lâyc nomz stengv bix tuz puv quâyx nyăngz stanyb âyx munh, nănh stiz cumh nzav lâyc nomz stengv pongh zuc zâuđ nanc, nănh stiz songđ pungx stingb haoh. ¹⁶ nănh stiz yâuc coong, “stauh gôh! Seenz numđ stauh mâyh tayc gôh, lâyc nomz stengv cah đangc noib mâyh zuz đôc buyx, mâuh mengz buf, mâuh stib nonc, yâuc nongc sămz nongc pou zâuz saix nzâyz taih nongc zoongz stynb. ¹⁷ Cungb ah zanyf gungh nănh nyăngz yeetx stong puv quâyx zuc jac nzuf, laix đangđ quanz cloon đangđ nâuh, cloon quaix đangđ nyăngz zeb munh, cloon yeetx stong munc yămz woa coiđ womz lov nhlinc woax đomc munh, stâuđ woa gâyh côz mangc. ¹⁸ Nănh stiz mangc phătc tâuf pu stengv nyăngz tâuf sâuv nănh stiz songđ hamv Coong, “max zengx naih laiv nomz stengv nzongf tuz năngđ lâyc nomz. ¹⁹ Nănh stiz songđ maob nib bungb plauf ănz pyây yâuc hamv haoh Coong, “seenz phunz nănh stiz numđ stauh nzongf gôh! Seenz numđ stauh lâyc nomz stengv tuz nâyx, tinyh phanv naih đangđ yâuh lâyc coiđ nyăngz munh, cloon couv lâyc nomz stengv tuz puv quâyx nyăngz munh, ah dlih đokc zuc mêtc nzuf. ²⁰ Tênb-toongh Côkz, Tênb-Hungh nyăngz đăngb zengh pec stingx cloon woax đomc cumh pâuz munh cloon tôuc woac munh lex! six zuc numđ nyađ, wâyc zuc woax nomz stengv plupc nzof gôh, wâyc zuc Tênb-Hungh cănh stăngc tingc lâyc nomz stengv nyăngz stoif clao phunz nyâuh. ²¹ Năngx naih ah tauh Stynz-munh pâuh ah nomz njauz pyây cayx năngđ njauz mac nâyx quanyf ănz nzac coiđ womz ninyh yâuc coong, “Ba-bi-lôn stengv lex! Mâyh six cayx năngđ lâyc nomz njauz mac nâyx zuc quanyf nzac lâyc ninyh, max naih mănv hayh lov tuz pongh mâyh. ²² Blătc nây max naih mănv tuz numđ mâyh ayx nzungz, pyom blungh blex, quetb lanyh njămh, blătc nây staox ninyh mâyh yâuc max naih laiv lanh ayx stangc munh, stâyv quâyx max mănv tuz numđ mâyh mah njauz mac buib. ²³ Tăng nây staox ninyh yămz mâyh lâyc cah njaf stâyv quâyx max naih toongz syux gwăngz-eng, yâuc max naih săngb bongf nyăngz stingb buib, cah đangc noib mâyh ayx bamh canz nyăngz stanyb âyx munh lub quaix woax đomc. Yâuc ayx papz jaf phunz manf Côkz munh zuc tingc stoif. ²⁴ Lâyc nomz stengv mâyh zuc tingc stoif, six wâyc zuc max pâyz sax lanh tâuc woac munh, cloon Zâu nyăngz đăngb zengh pec stingx, zuc tayx tayc yămz mâyh lâyc samđ njâuc seetb taih nzêux nây nib mync.