¹ Yaz năngx numđ naih woac stingb coong yămz woa congx toongh seetb taih bux êu woa nhlic lanh Stynz-munh coong, “ninyh zef gôh! Zoz Tênb-Hungh hănđ stoif woa đomc nhlic nomz staiz nanc zan taox nzac bamh canz ninyh zef gôh!” ² Woa tah yeetx lanh Stynz-munh nzâyz nănh nyăngz zan nzac bamh canz taih, naih tăpb woax tauh stanyb hauđ yeenx, cloon paix miuc hanyh nyăngz munh, săngh sâyh munz tuz zâuđ nzongf. ³ Tah nyâyc tauh Stynz-munh ninyh taox nănh nyăngz zan nzac coiđ womz ninyh, womz songđ wav pênx cayx năngđ munh tayc samđ nâyx, yămz coiđ nyăngz zuy njênf yeetx stong tayc stutx nzuf. ⁴ Tah stamz tauh Stynz-munh taox nănh nyăngz zan nzac womz sting ninyh, womz songđ pênx samđ nzuf. ⁵ Yaz năngx numđ cun coiđ womz woax tauh Stynz-munh coong, “Đăngb zengh nyăngz munh woax tauh lex! Mâyh six cah lof yămz, nâyx zanyf yămz woax tauh, mâyh ayx nyăngz dlayc seenz pengh stymz nzongf. ⁶ Wâyc zuc nănh stiz ayx phunz mâyh nyăngz đăngb zengh munh, cloon mâyh nyăngz tâuc woac munh samđ njâuc seetb taih, seenz jic tuz phunz nănh stiz hopb samđ. ⁷ Yaz zâyf năngx numđ naih woac yămz woa congx toongh coong, “Dlênc quaix nyăngz Zâu Tênb-Hungh lex! Mâyh tingc okx njangh munh nyăngz stoif năngđ nâyx, seenz zâyf pengh stymz nzongf. ⁸ Tah stâyx tauh Stynz-munh taox nănh nyăngz zan nzac bah noib ninyh, bah noib joomz pênx tâuf pu saf munh. ⁹ Bamh munh zuc tâuf pu glutc nzuf, nănh stiz songđ zaux yâuc yônx Tênb-Hungh nyăngz bux, six naih lanyf ayx staiz nanc wâyb munh woax tauh, six nănh stiz lauf max canx coi nyâuđ quanyf, phunb đangz lauf lov Tênb-Hungh nyăngz Gwăngz-eng tync. ¹⁰ Tah ngâuf tauh stynz-munh taox nănh nyăngz zan ănz nzac stengb hiv nyăngz tync ninyh, Stengb hiv nyăngz Côkz songđ nzămc mengh đikc, munh songđ tăpc byeetc tanyđ. Wâyc zuc nănh stiz munz tuz dlauc wâyb nzongf. ¹¹ Max cun nănh stiz hănđ six săngh sâyh munz seetb, nănh stiz zaux tauv yămz Tênb-toongh nyăngz Tênb-Hungh, six nănh stiz lôx lauf max canx coi nyâuđ quanyf nănh stiz ayx nyăngz okx dlayc. ¹² Tah guc tauh Stynz-munh taox nănh nyăngz zan nzac Ơ-phơ-ratv coiđ ninyh, coiđ songđ gaib nzuf, wâyc coib jau phunz toongz phanx nyăngz Hungh yăngh. ¹³ Yaz phătc naih pôz tauh manđ yotz cayx năngđ zeng mengz, nănh stiz tăng Côngz Hungh nyăngz nzeetx, cloon stengb hiv nyăngz nzeetx, năngx cloon za stênx-stengb nyăngz nzeetx njaf seetb taih. ¹⁴ Woax đomc pôz tauh manđ huđ songđ hayh ayx tuz jix-caox njingc nyăngz dlayc, nănh stiz seetb ninyh lov bamh canz nyăngz Hungh, hox nănh stiz căpx dlonf, zu tauv dlênc quaix nyăngz Zâu Tênb-Hungh woax nomz nzuf zomc lub nzongf nyăngz noib panx pengz. ¹⁵ Mangc geh! Yaz oix taih cayx năngđ stac munh nâyx, laiv lanh canyz nyâuđ buôngh stymz lif nănh nyăngz Gwuyz quav tuz gongx, woax tauh songđ naih oonz loc, nănh songđ max zuc blănf stynb yăngh jau toongx songx munh zuc nyayz. ¹⁶ Woax đomc manđ nănh stiz căpx dlonf muif tauh Hungh căpx dlonf yămz ah nomz tync, woax nomz tync, Hêpc-lu-woac hipđ ayx ( Ha-ma-gê-đôn. ¹⁷ Tah jeetb tauh Stynz-munh taox nănh nyăngz zan nzac đamx gungh taih, yămz woa congx toongh songđ naih woac seetb taih Coong, “songf nzof gôh! ¹⁸ Lênh dlih naih bungh bitc tâuf nzăpc-nzăpc têx, yâuc naih bah cong bletz clinyb-clinyb têx, Gungh nib tongf tuz đănz nzongf, tăng cah lof ah yađ naih bamh munh yămz nâyx nomz bamh canz, max zengx naih laiv hâyđ Gungh nib tongf tuz nzongf năngđ nâyx hâyđ. ¹⁹ Woax nomz stengv songđ bengb ayx pôz phănc, manf Côkz nyăngz stengv yâuc bengb lunc nzuf, Wâyc zuc Tênb-Hungh săngx tauv Ba-bi-lôn stengv ayx nyăngz Stoif, nănh songđ oix phunz nănh stiz hopb Zâu hănđ stoif nyăngz tyu. ²⁰ Muif nomz coiđ yâuc tyuv nzuf, nzof zoongz zâyc yâuc max phătc naih. ²¹ Yâuc năngx naih pyoc lub tăng gungh tuih nzac taih bopb munh, muif nomz nic naih cox ah pez sanz, songx munh songđ zaux Tênb-Hungh, wâyc nâyx đomc staiz nanc nyăngz pyoc hoiđ nănh stiz.