¹ Yaz mangc năngx phătc ah hungđ jix houf njingc nzongf nyăngz dlayc yămz woa gungh, naih nhlic tauh stynz-munh nzauf nhlic hungđ staiz nanc, six stêtb mâyv Tênb-Hungh hănđ stoif nyăngz staiz nanc. ² Yaz phătc naih lungđ cayx năngđ canyx lou zanb tâuf, Yeetx stong tuz hingh quaix stengb hiv, cloon miuc hanyh jangx, năngx cloon sôx cloon woax hungđ bux, nyăngz munh nănh stiz stâuđ woa coiđ synh, nănh stiz jom Tênb-Hungh jaoz phunz nyăngz lanyh njămh. ³ Yâuc ayx Mô-sê nyăngz nzungz, Cloon pa-jiz yungh nyăngz nzungz, woa nzungz ayx Coog, “Dlênc quaix nyăngz Zâu Tênb-Hungh lex! Mâyh ayx nyăngz dlayc seenz lub nzongf yâuc njingc nzongf, Manf Côkz manf stingx munh nyăngz Hungh lex! Mâyh ayx nyăngz jau, cloon seenz gâyf seenz pengh stymz. ⁴ Zâu lex! Naih laiv lanh max zanyb mâyh nyăngz bux, yâuc max cumh nzav mâyh? Cungb mâyh ah lanh đăngb zengh, Manf Côkz nyeenh mănh six yămz mâyh nyăngz cah đangc paix bongc mâyh, wâyc zuc nyeenh mănh phătc mâyh hynđ yăngh mâyh ayx nyăngz dlayc six pengh stymz. ⁵ Quaix đangz yaz phătc yămz woa Tênb-toongh coib goib Tênb-Hungh nyunc woac njiuh. ⁶ Nhlic lanh Stynz-munh nzâyz nhlic hungđ staiz nanc, tăng woa congx toongh seetb taih, zuz đôc buyx gwuyz pec buđ đăngb zengh, yâuc naih sămz câuv pongz cah lapc. ⁷ Woax đomc pyâyz tauh stengb hiv zoz nhlic nomz sămz zan ănz pong banc stâyv săngh nyăngz Tênb-Hungh, nănh hănđ stoif nyăngz staiz nanc. Jaoz phunz woax đomc Stynz-munh lanh nomz. ⁸ Canyx Zâu Tênb-Hungh nyăngz pyau, songđ naih tâuf sâuv pong nzuf, six Tênb-Hungh nyăngz jab cloon nănh nyăngz gwăngz-eng hynđ seetb taih. Max naih laiv lanh tuz nzac woa congx toongh cah njaf ninyh, zu tauv woa nhlic lanh stynz-munh ayx songf nâyx đomc staiz nanc nyăngz dlayc.