¹ Yaz mangc songđ phătc Pa-kiz yungh stâuđ woa Si-ôn zoongz, Cloon nănh yămz woa woax đomc munh, 144.000 lanh munh, naih nănh nyăngz bux, cloon nănh Pha nyăngz bux ja ănz woa pyây ploongh woax đomc munh. ² Yaz mungv numđ naih stingb buib yămz woa Tênb-toongh cayx năngđ womz lub buib, yâuc năngđ bah côngz haoh, yaz mungv yâuc năngx naih stingb buib năngđ munh quetb lanyh njămh stingb. ³ Yămz woa Hungh tync cah đangc, woax đomc pyâyz tauh stengb hiv cloon woax đomc munh côx nyăngz cah đangc, nănh stiz ayx ah baih săngb nzungz, seetb nzuf woax đomc 144.000 lanh munh tuz Njâuv gâyh nib mync woax đomc munh, max naih laiv lanh hayh phanv tuz woax baih nzungz. ⁴ Woax đomc munh toonz njif tuz nănh stiz đăngb zengh, max zengx văngc tauv munh nzif, pa-jiz yungh ninyh laiv, nănh stiz yâuc lêpc đangz, woax đomc 144.000 lanh munh tuz suc lauf gâyh nây bamh canz nongc ayx stanyb lanyh congx phunz Zâu Tênb-Hungh cloon pa-jiz yungh nyăngz munh. ⁵ nănh stiz max zengx coong woac puv maoh, yâuc max zengx ayx sai. ⁶ Yaz phătc pitc tauh Stynz-munh đayv woa đamx gungh, nzâyz stâyv quâyx yămz nyăngz cuđ jeenx ninyh lănv phunz muif hungđ nyeenh mănh, muif nomz Côkz, cloon Coong muif hungđ woac. ⁷ Nănh hamv lub coong, “six zuc cumh nzav Tênb-Hungh, wâyc zuc tauv nănh stămđ bamh munh nyăngz săngx huđ, six zuc canyx bongc zâyx gungh nib, zâyx coiđ, zâyx nof womz woax tauh. ⁸ Tah nyâyc tauh Stynz-munh ninyh lêpc tah yeetx tauh cah đangz yâuc hamv Coong, “Ba-bi-lôn stengv lub bengb plupc nzuf, nănh stiz ayx phunz muif nomz Côkz munh hopb Tênb-Hungh hănđ ayx pongz lauh nyăngz tyu. ⁹ tah stamz tauh Stynz-munh ninyh lêpc cah đangc woa iz lanh stynz-munh, nănh hamv coong, “Laiv lanh canyx paix woax đomc stengb hiv, cloon miuc hanyh, cloon tăpb yeenx ănz pyây ploongh, cloon ănz puf woax đomc munh. ¹⁰ Nănh stiz six zuc hopb Tênb-Hungh zamđ jetz nzongf nyăngz hănđ stoif tyu ănz woa zan. Woax tauh songđ zuc caix năngđ wuôngh tâuf nâyx pu nănh yămz Stynz-munh cloon pa-jiz yungh jeenz cah đangc tanyđ zâuđ dlauc wâyb. ¹¹ Wâyb nănh stiz woax lâuh tâuf sâuv đunc-đunc têx staox gungh ninyh tauv banc stâyv banc đaic, congx stengb hiv cloon paix miuc hanyh nyăngz munh, năngx cloon woax đomc tuz tăpb yeenx ănz pyây nyah cloon puf nyăngz munh, nănh stiz zuc tanyc dlauc wâyb quaix noib quaix munf max tuz laiv dlih cuyb yămz. ¹² Năngđ naz zeen Tênb-Hungh nyăngz munh songđ oix zuc nongc noic tanyc, yâuc âyz nănh nyăngz lanyf ayx, nongc seenz stymz zeen tingc Zâu Yê-su. ¹³ Yaz năngx numđ naih woac coong yămz woa Gungh, “six zuc ja, blătc nây ninyh wâyc Zâu tayc nyăngz munh tuz oonz loc. Singx-lingh tauz coong toix gôh, Nănh stiz tuz sec tingc congz hitb conv, nănh stiz ayx congz zâuđ nyăngz phănc lêpc nănh stiz ninyh. ¹⁴ Yaz mangc năngx phătc naih lanh cayx năngđ bamh munh nâyx, nănh zâyh ah tâu văn pec nzac taih, pyây đongx banyh tênb mouc, nănh nyăngz puf nzauf njayf nzongf nyăngz bah tôz. ¹⁵ Zâyf năngx naih pitc tauh Stynz-munh Tăng woa congx toongh seetb taih nănh hamv bux zâyh vănx woax tauh Stynz-munh Coong, “nongc mâyh nyăngz bah tôz quănf lâyc bamh canz nyăngz jengz zunb gôh, wâyc zuc tauv bamh canz nyăngz jengz zunb bengc săngx huđ suđ nzof gôh. ¹⁶ Zâyh woa vănx woax tauh songđ quanyf nănh nyăngz bah tôz nzac bamh canz taih, bamh canz nib tâyc songđ zuc quănf sâub nzuf. ¹⁷ Zâyf năngx naih pitc tauh stynz-munh tăng woa Tênb-toongh Côkz nyăngz congx toongh seetb taih, nănh nyăngz puf lauf nzauf njayf nyăngz bah tôz. ¹⁸ Cun tâuf woax woax tauh Stynz-munh yămz Tênb-toongh Côkz nyăngz congx toongh seetb taih coong bux woax tauh nzauf bah tôz nyăngz Stynz-munh, nongc mâyh nyăngz bah tôz quănf lâyc bamh canz nyăngz tungh côh pyâu gôh, wâyc zuc lâyc đomc tungh côh pyâu bengc săngx huđ suđ nzuf nzof gôh. ¹⁹ Woax tauh Stynz-munh songđ quanyf nănh nyăngz bah tôz nzac bamh canz taih, sâub dlonf bamh canz nyăngz tungh côh pyâu ănz nzac Tênb-Hungh hănđ stoif nyăngz mayx nzapc tungh côh pyâu ninyh. ²⁰ Tungh côh pyâu zuc nzapc ănz mayx, năngx naih samđ njâuc seetb singh cungh ngwoaic ninyh tauv maf đungc, cox stamx pez gâyf đao.