¹ Yaz songđ phătc naih ah tauh stengb hiv tăng woa coiđ womz seetb taih, nănh naih nhlic nomz pyây, săpc nomz joongz, muif nomz joongz đongx banyh tênb mouc, woax pyây yâuc ja pib Tênb-Hungh nyăngz bux ănz woa. ² Woax tauh stanyb hiv hanyh jangx cayx năngđ njynh maoh, staux yâuc cayx năngđ jăpx staux, nzeetx yâuc cayx năngđ njanh zomgh, woax tauh Côngz Hungh songđ jaoz lanyf phunz nănh. ³ Woax tauh stengb hiv naih ah tauh cayx năngđ zuc munz, six lauf zanyx tuz gongx, wâyc năngđ nâyx njynh gungh đi munh phătc njingc, songđ ninyh lêpc nănh. ⁴ Songx munh songđ paix woax tauh Côngz Hungh, wâyc zuc woax tauh Côngz Hungh phunz quyênh woax tauh stengb hiv, nănh stiz lauf paix cloon woax stengb hiv, nănh stiz coong naih mănv hayh bopc zax tuz hingh lâyc tauh? ⁵ Woax tauh stengb hiv yâuc tuz quyênh coong woac zanyb lub, Coong peo Tên-Hungh, yâuc tuz quyênh ayx okx dlayc Stâyx săpc nyâyc lav. ⁶ Woax tauh stengb hiv yâuc goib nzeetx coong pib Tênb-Hungh nyăngz bux, yâuc coong pamf Tênb-Hungh yămz nyăngz tync, lauf năngx coong peo cloon yămz woa Tênb-toongh woax đomc munh. ⁷ Woax tauh stengb hiv yâuc tuz dluyh stymz cloon đăngb zengh nyăngz munh bopc zax, nzof nănh yâuc tuz hingh nănh stiz. Nzof nănh zâyf năngx tuz quyênh cun manf Côkz munh, muif hungđ munh cloon coong muif hungđ woac. ⁸ Njynh Gungh đi munh songđ Canyx bongc woax tauh stanyb hiv, Tăng zâyx gungh nib taih max zengx naih bux staox ănz zuc tayx tayc woax tauh Pa-kiz yungh nyăngz săngh mengc tanz. ⁹ Laiv lanh naih bah nomh six zuc nzaz bah nomh mungv năngx gongx. ¹⁰ Laiv lanh mengc taix zuc nzuf đao tayx tayc, yâuc seenz zuc nzuc đao tayx tayc, laiv lanh mengc taix zuc yămz nzauh, nănh songđ seenz zuc yămz nzauh, đăngb zengh yâuc zuc nongc seenz stymz nongc noic tanyđ. ¹¹ Yaz năngx phătc ah tauh stengb hiv tăng woa nib đi seetb taih, nănh seetb iz nomz joongz cayx năngđ yungh joongz. Coong woac caiz năngđ Côngz Hungh. ¹² Năngx naih ah tauh seetb taih đangz, caiz năngđ taih đangc woax tauh, nănh yâuc naih gâyf bătx buôkc yămz nây nib mync nyăngz munh canyx paix nănh cayx năngđ taih đangc woax tauh, six zuc munz tayc blătc năngx săngh phunb stengb woax tauh stengb hiv. ¹³ Tah nyâyc tauh stengb hiv, yâuc păngc tah yeetx tauh ayx jix caox njingc nyăngz dlayc, nănh hayh ayx tuz tâuf tăng Gungh tuih nzac songx munh nyăngz cah đangc taih. ¹⁴ nănh nongc nâyx đomc jix caox njingc nyăngz dlayc yămz tah yeetx tauh cah đangc, ayx jix-caox njingc nyăngz dlayc jaf Gungh đi munh jâux njăngx hanyh jangx taih paix zuc nzuc đao zam sangb yâuc tuz zany gongx săngh woax tauh. ¹⁵ Tah nyâyc tauh stengb hiv yâuc naih gâyf ayx phunz tah yeetx tauh, hayh ayx tuz woax tauh njăngx hanyh jangx hayh coong woac, woax tauh miuc hanyh jangx yâuc naih gâyf tayx max paix nănh woax đomc munh. ¹⁶ Nănh yâuc yac muif lanh munh max cun lub mah six jeenz, puv quâyx mah six zâuđ, ayx nâuh, mah six dluyh stymz nyăngz munh, zuc tăpb yeenx ănz byaoh puf, mah six pyây ploongh. ¹⁷ Max naih laiv lanh tuz quyênh maif maic bix max naih nâyx nomz yeenx, wâyc zuc nâyx nomz sôx six nâyx tauh stanyb hauc nyăngz bux mah six yeenx. ¹⁸ Six zuc nongc naih tongb manyh, naih tongb manyh nyăngz munh six zuc stunx nâyx đomc dlayc. Nâyx đomc dlayc nyăngz gâyf six nâyx tauh stanyb hauđ nyăngz sôx, six ah tauh munh nyăngz sôx, nâyx nomz sôx six 666.