¹ Năngx naih ah hungđ jix caox njingc nyăngz dlayc tăng gungh hynđ yangh seetb taih, naih ah tauh munh nzif, nănh nyăngz zoongz zuz six nongc bah noib lav yămz nănh nyăngz staux đi, nănh nyăngz pyây đongx săpc nyâyc nomz stingz tau. ² Woax tauh munh sab naih stynb, songđ bengc săngx huđ đutb stynb. Munz nzongf songđ hamv êu. ³ Zâyf năngx naih ah hungđ jix caox njingf nyăngz dlayc hynđ yangh seetb woa gungh taih, naih ah tauh côngz Hungh njaox stiz, naih nhlic nomz pyây, săpc nomz joongz, muif nomz joongz đongx mouc, ⁴ Côngz Hungh nyăngz tây vatc yămz gungh nyăngz stingz tau, pôz phănc ah phănc, quanyf tuih nzac nib taih. Woax tauh Côngz Hungh nzac taih tauv stâuđ woax tauh munh nzif woa cah đangc zu woax tauh munh sây stengb stâyv taih nănh six naz săngh. ⁵ Six woax tauh munh sab stengb tuz tauh sây toonz taih six oix nongc njab langb cun manf Côkz woax tauh munh sây, six naih ah lanh taih zab zoz woax tauh munh sây nzâyz ninyh tauv Tênb-Hungh nyăngz tync cah đangc nzof. ⁶ Six woax tauh munh nzif tyuv nzac stâyz phangz blănf ninyh, six Zâu Tênb-Hungh bênc phunz nănh yămz woax nomz tync, nănh yămz woa ah tynb iz pez guf săpc noib. ⁷ Woax zanyf yămz woa Tênb-toongh naih panx zax nyăngz dlayc seetb taih, Mi-ca-ên, cloon nănh nyăngz Stynz-munh, cloon woax tauh Côngz Hungh panx zax, Côngz Hungh yâuc cloon nyăngz Stynz-munh bopc zax. ⁸ Six Côngz Hungh ayx max hingh, nănh songđ zuc stâyb Tênb-toongh Côkz nyăngz tync. ⁹ Woax tauh Côngz Hungh songđ zuc quanyf gâyh Tênb-toongh, Six lôx noib ninyh yâuh nây gungh đi jaf nyeenh mănh woax tauh nangz Sax-tanx manđ nyăngz Hungh, cloon woax đomc Stynz-munh zuc quanyf nzac taih tauv nib. ¹⁰ Yaz năngx numđ naih woac stingb coong seetb woa Tênb-toongh taih, “Nâyx zanyf tauv săngx huđ Tênb-Hungh Njâuv nănh nyăngz pec stingx, “yâuc tauv săngx huđ Njâuv Zâu nongc nănh nyăngz lanyf cun nây gungh đi, Coux nyâuh yâuf-pez quaix noib quaix munf woax đomc munh nâyx zanyf zuc Tênb-Hungh stayb quanyf nănh stiz nzac taih. ¹¹ Pănh nyăngz yâuf-pez nongc woax tauh Pa-kiz yungh nyăngz samđ, yâuc nongc nănh stiz ayx nyăngz zanyx manyf woac, Hingh quaix coux nănh stiz woax tauh. Wâyc zuc nănh stiz sez tuz nănh stiz nyăngz mengc yâuc max numđ stâyb. ¹² Yămz woa Muif tađ Gungh cah njaf nyăngz munh cloon muif hungđ yeetx stong songđ six zuc numđ nyađ, “six nib cloon coiđ songđ numđ stauh, wâyc zuc manđ nyăngz hungh nzac taih tauv nyâuh lâyc. Nănh seenz! Siv nhleenx nzongf, wâyc zuc nănh pâyz tuz nănh nyăngz săngx huđ max naih lauh. ¹³ Woax tauh Côngz Hungh phătc nănh zuc stayb quanyf ănz nzac bamh canz taih, nănh songđ ninyh luiđ lêpc woax tauh munh nzif stengb tuz ah tauh toonz woax tauh cah đangc. ¹⁴ Woax tauh munh nzif yâuc tuz stipx ah pâuv Clang lub đatz đayv ninyh tauv woa stâyz phangz blănf, Zâu Tênb-Hungh bênc phunz nănh yămz woax nomz tync, tuz Zâu jămđ nănh yămz woa ah tynb iz pez guc săpc noib, tuz pyenv gâyh max zuc Côngz Hungh hoiđ nănh. ¹⁵ Côngz Hungh songđ nongc nănh nyăngz nzeetx nja womz seetb taih năngđ coiđ nâyx luiđ lêpc woax tauh munh nzif cah đangz oix ayx zoz cutb nănh ninyh. ¹⁶ Six nib yâuc oix stăngc woax tauh munh nzif, songđ moongz quef quaf nzeetx naz nzuf woax tauh Côngz putb seetb taih nyăngz womz. ¹⁷ Woax tauh Côngz Hungh seenz numđ nhleenx nzongf, songđ ninyh cloon woax tauh munh nzif nyăngz sây stunz panx zax, âyz gâyf six ayx âyz Zâu Tênb-Hungh cloon Yê-su nzaox nyăngz woac woax đomc munh. ¹⁸ Woax tauh Côngz Hungh songđ ninyh stâuđ woa coiđ synh.