¹ Yămz nyâuh yâuf pez woa cah njaf, naih laiv hungđ ayx phunz nyâuh tinyh panx, tinyh bopc zax? Six wâyc nyâuh nyăngz nyâuđ naih hănđ munh nyăngz dlayc, nzăngđ ayx hoiđ phunz nyâuh tinyh bopc max zâyf mah? ² Nyâuh mauh oix tuz munh nyăngz tax hungđ, yâuc mauh max hayh tuz, nyâuh songđ ninyh tayx munh, songđ nzengz zax bopc zax, lauf mauh max tuz laiv hungđ, nyâuh oix nongc woax hungđ yâuc max tuz, six wâyc nyâuh max jođ Tênb-Hungh. ³ Nyâuh jođ blătc yâuc max tuz, six wâyc nyâuh jođ longđ, nyâuh congb oix nongc nzâyz ninyh ayx mynb đupx. ⁴ Stymz yêuz nyăngz munh lex!* nyâuh max zengx pâyz tuz cloon bamh canz ayx toic woax đomc six cloon Tênb-Hungh săngh yônz zaz mah? Năngđ naz laiv lanh cloon bamh canz munh sitx toic, woax tauh six cănh ayx phunz nănh pênx Tênb-Hungh nyăngz yônz zaz. ⁵ Nyâuh yâuf pez nyâyh taih Canyx-stâub coong nyăngz woac max naih âyz gâyf mah? Tênb-Hungh phunz yămz pănh nyăngz nyâuđ njaf woax tauh singx-lingh oix nzengz cun pănh. ⁶ Six nănh oix sađ pôz pâu phunz năngx đungx, wâyc zuc Canyx-stâub coong, “nănh zengv woax đomc ayx lub nyăngz munh, yâuc sađ pôz phunz woax đomc nhlimc ayx jeenz nyăngz munh. ⁷ Năngđ naz, six zuc mungv Tênb-Hungh cun, yâuc aox manđ nyăngz Hungh, Sax-tanx songđ tyuv gâyh nyâuh gôh. ⁸ Six zuc ninyh yămz stătx Tênb-Hungh, nănh songđ yămz stătx nyâuh yâuf pez, stoif-munh lex! six zuc đaox nyâuh nyăngz puf năngx dlăngc, iz tyuh nyâuđ nyăngz munh lex, six zuc đaox nyâuh nyăngz nyâuđ năngx dlăngc. ⁹ Six zuc numđ staoh pungx stingb haoh, coi stauh pênx nyađ, coi jeetx pênx stauh. ¹⁰ Six zuc nhlimc ayx jeenz yămz Tênb-Hungh nyăngz cah đangc, Nănh songđ hayh pâuh nyâuh staox jangb. ¹¹ Yâuf pez lex, nyâuh lanh năngx gâyf coong peo lanh, laiv lanh coong peo nănh nyăngz yâuf pez, mah six tingc nănh yâuf pez nyăngz stoif, woax tauh lauf coong peo Đoouc lif gâyf, yâuc yônx coong Đoouc lif gâyf ayx max hođ, six coong nyâuh yônx Đoouc lif ayx max hođ, nyâuh six max âyz Đoouc lif gâyf nyăngz munh. ¹² Cungb naih ah tauh Tênb-Hungh njăpf Đoouc lif gâyf taih, yâuc ayx stămđ stoif quanz, six seenz zâyf hayh Njâuv munh, yâuc hayh mêtc munh woax tauh, nyâuh six mănv bix năngx nzađ tingc nyâuh yâuf pez nyăngz stoif? ¹³ Coong nâyx đomc woac nyăngz munh mungv yaz coong bef, nyâuh coong nâyx noib mah six săngx đomz, pănh six ninyh nâyx nomz stengv, mah six woax nomz stengv ayx stanyb âyx năngx puv quâyx đangc. ¹⁴ Six nyâuh yâuf pez max pâyz tuz săngx đomz nyâuh nyăngz mengc six săngh laix? Nyâuh six năngđ ah tâu bungc đay, seetb yangh, ah ah zanyf gungh yâuc yiuf đanv nzuf. ¹⁵ Six nyâuh yâuf pez hopđ zuc coong, “six Zâu nyăngz zux ix năngđ phunz buz tuz săngh, buz six hayh ayx tuz nâyx hungđ, woax hungđ. ¹⁶ Six coong nyâuh yâuf pez năngđ nzeetx lub, six ah hungđ okx nyăngz dlayc. ¹⁷ Six coong laiv lanh năngđ pâyz tuz nănh hopđ zuc ayx laiv hungđ gongx nyăngz dlayc, yâuc max ayx, woax tauh songđ naih stoif.