¹ Yaz nyăngz yâuf pez lex, Nyâuh yâuf pez năngx gâyf naih Stênx stengb đungx lanh, wâyc zuc nyâuh pâyz tuz ayx stênx stengb nyăngz munh six zuc tingc stoif năngx nic têx. Max ayx stênx stengb nyăngz munh. ² Pănh muif lanh munh ayx longđ đungx hungđ dlayc, six laiv lanh njynh leox max coong longđ lungđ, woax tauh songđ hayh cun tuz nănh nyăngz stynb. ³ Pănh zoz maf longh lopb ănz maf nzeetx sâu. Songđ hayh cun tuz cun cloon stynb stayđ nzuf, pănh oix ênz ninyh laiv yâuc tuz. ⁴ Nyâyh mangc jađ, ah saz đangđ tăng laiv lub, zuc nzaox nyongf ninyh, pănh cungb nongc stynz đangđ zâyh coi ninyh, max cun stynz đangđ zâyh tăng laiv jeenz, songđ hayh coi tuz saz đangđ mungv âyz pănh nyăngz symz nyâyh nyâyh. ⁵ Tauh munh stynz byeetc lauf năngđ ha, max cun nănh hănđ six ah hungđ jeenz quaix yămz pănh nyăngz stynb, yâuc năngx hayh nzeetx blangc coong tuz đungx hungđ woac seetb taih. Năngx nyâyh mangc jađ, tikx cay ah pa tâuf jeenz, năngx hayh pu tuz sac săngh tungđ jêmh. ⁶ Bleetc six năngđ tâuf nâyx, max cun stynz bleetc six ah hungđ okx nzongf yămz pănh nyăngz stynb, bleetc songđ ênz stynb nzac đic nyokc nyăngz tâuf taih pu tuz sac pănh nyăngz stynb săngh stâyv munh. ⁷ Muif hungđ stanyb hauc nangz byauf, songđ zuc mungv bamh munh cun nănh stiz. ⁸ Six max naih mănv hayh cun tuz stynz byeetc, bleetc six okx nzongf max naih mănv hayh cun tuz, naih hayh tayc munh nyăngz mađ pong nzuf. ⁹ Pănh nongc byeetc tanv Zâu nzangc pha, yâuc nongc byeetc zaux munh, nzangc pha pănh nyăngz hanyh jangx zâyx pănh bamh munh taih. ¹⁰ Tanv nyăngz woac cloon zaux munh nyăngz woac songc ah stynz byeetc coong seetb taih, yaz nyăngz yâuf pez lex, ayx năngđ ha six max săngh gôh. ¹¹ Ah nomz womz sting hayh đunh womz cuđ cloon womz imz tingh zanđ max? ¹² Yaz nyăngz yâuf pez lex, Vănx tauh njăngx hayh săngh cah lanv pyâu max? Tungh côh mâyb hayh săngh vănx tauh pyâu max? Womz đaih sting hayh đunh womz cuđ max?” ¹³ Yămz nyâuh yâuf pez woa naih laiv lanh tongb manyh munh max? Nănh six nongc nyâuđ dlênc, nongc tongb manyh ayx gongx dlayc phunz nâyx hungđ munh. ¹⁴ Six coong mănv năngđ naih nyâuđ imz, stâyx munz munh, tâuh cănh tuz gongx, năngx gâyf tanv coong cănh naih tongb manyh, max tuz puv maoh aox seenz gâyf. ¹⁵ Woax hungđ tongb manyh max zâyf tăng Tênb-Hungh phunz taih nyăngz tongb manyh, yămz bamh munh nyăngz stymz nyâuđ cănh nyâyh seetb, yâuc yămz manđ nyăngz tongb manyh nyâyh seetb taih. ¹⁶ Laiv nomz tync, naih stâyx munz, tâuh cănh tuz gongx, lanh hănđ lanh, naih sêu lunc nyăngz dlayc, woax nomz six naih caux muif hungđ okx nzongf nyăngz dlayc. ¹⁷ Tăng Tênb-Hungh taih nyăngz tongb manyh, tah yeetx six đăngb zengh, pengh stymz, dlênc nyâuđ, sting jaođ, woax hungđ tongb manyh six phunz munh lanh stăngz lanh, yâuc cungb ayx gongx nyăngz dlayc, max phătc munh stanc, yâuc max ayx pâyh zac nyâuđ ngokx. ¹⁸ Laiv lanh quynb tuz iz phanx munh hopđ nyâuđ taih, six songx pengh oonz nyăngz nhlimb, sâub taih yâuc tuz gongx phănc.