¹ Puv quâyx munh lex, mungv yaz coong bef, six zuc numđ stauh yâuc zuc pungx stingb haoh, wâyc zuc woax đomc staiz nanc, six oix plongz nzac nyâuh yâuf pez cah zâyc taih. ² Nyâuh nyăngz puv quâyx yâuc zuc yiuf nzuf, nzof nyâuh nyăngz gwuyz quav yâuc zuz jengz tăpf huđ nzuf. ³ Nyâuh nyăngz sămz nyanh yâuc hayh seetb đingv nzuf, woax đomc đingv yâuc ayx zanyx manyf phunz nyâuh yâuf pez pâyz tuz nyâuh ayx longđ, woax đomc đingv yâuc năngđ tâuf nâyx pu nyâuh nyăngz stynb, nyâuh cungb numđ stauh sâub nâyx đomc sămz nyanh wâyc tauv woax đomc stêtb mâyv nyăngz noib. ⁴ Nyâuh yâuf pez max nyunc coib congz stynh phunz stăngc nyâuh sâub jengz zunb nyăngz munh, nâyx đomc congz stynh êu woax đomc ayx congz nyăngz munh coux nyâuh, congz munh coux nyâuh woax đomc woac songđ tongb tauv naih lanyf woax tauh Zâu nyăngz bah noomh. ⁵ Nyâuh yâuf pez yămz nây stâyv sangc, cungb tâuh nhlync cuđ hopb gongx tuz quaix stymz, năngđ munh otx stanyb hauc cunc, zu tauv săngx huđ tayx ayx a maic. ⁶ Nyâuh tingc yâuf pez nyăngz stoif, yâuc tayx munh gongx munh, nănh stiz yâuc max aox nyâuh. ⁷ Yâuf pez lex, six zuc nongc noic zu năngx tauv pănh nyăngz Zâu taih, mangc geh! Ayx njingh nyăngz munh nănh stiz nongc noic zu tuz tauv sâub nănh nyăngz jengz zongx, nănh nongc zu zunb dlih bungc, cloon tongz dlih bungc. ⁸ Nyâuh yâuf pez lauf zuc njăpc tingc nyâuđ zu, wâyc Zâu nyăngz noib taih tauv stătx nzof. ⁹ Yâuf pez lex, nyâuh năngx gâyf lanh yônx lanh, wâyc max phunz nyâuh zuc stămđ stoif, mangc geh! Stămđ stoif quanz taih tauv lâyc jengh cah đangc nzof gôh yec!” ¹⁰ Yaz nyăngz yâuf pez lex, nyâuh zuc săngx tauv lôx noib tingz Zâu nyăngz bux tâuc Tênb-Hungh nyăngz woac woax đomc munh, nănh stiz nongc noic tanyđ, nyâuh yâuc zuc âyz nănh stiz nyăngz gao ayx. ¹¹ Buz coong woax đomc nongc noic tanyđ tuz tauv tauh, woax tauh six tuz oonz loc gôh, nyâuh yâuc tuz numđ lănv quaix lôx noib, Yôpv, nongc noic tanyđ zâuđ nanc, tauv tauh, Zâu songđ hâuđ lênh nănh. ¹² Yaz nyăngz yâuf pez lex, nongc seen quaix six max nuz gungh nuz nib, mah six nuz laiv hungđ tôn nyunc woac, phanv coong zâyf max tuz gôh, nyâuh songđ max zuc tingc stoif. ¹³ Yămz Nyâuh yâuf pez woa naih laiv lanh pongh zuc zâuđ nanc max? Woax tauh six zuc clo Zâu, laiv lanh naih pengh oonz, six zuc ayx tanv Tênb-Hungh nyăngz nzungz. ¹⁴ Nyâuh năngđ naih laiv lanh yâuf pez săngh gumc, nănh yâuc zuc êu huyđ toongh nyăngz munh côx taih stăngc clo Zâu phunz, tingz Zâu nyăngz bux, yâuc zoz yâuh njămh ănz nănh nyăngz stynb. ¹⁵ Nongc seenz stymz clo Zâu songđ hayh Njâuv tuz gumc munh, Zâu yâuc oix phunz nănh tuz gumc gongx, six coong nănh năngđ pamf stoif, Tênb-Hungh songđ quanyf stoif phunz nănh. ¹⁶ Năngđ naz, nyâuh songđ zuc lanh nhlimc stoif phunz lanh, yâuc lanh stăngc lanh clo Zâu, nyâuh nyăngz gumc songđ hayh tuz gongx, munh gongx clo Zâu, nănh nyăngz clo Zâu, songđ naih jab yâuc lanyh. ¹⁷ (Ê-li-ya) six ah tauh bamh munh, cloon pănh tinyh năngđ, nănh nongc jab clo Zâu, Jođ Tênb-Hungh max phunz bungc lub, bungc songđ max lub tuz pôz nyăngv. ¹⁸ (Ê-li-ya) năngx clo Zâu êu gungh ayx bungc lub, gungh phunz bungc tuih nzac nib phunz muif jengz zunb tuz săngh. ¹⁹ Yaz nyăngz yâuf pez lex, six coong yămz nyâuh năngđ naih laiv lanh ninyh longđ gâyh seenz gâyf côz, năngx naih laiv lanh jeenđ tuz phunz nănh phunb đangz lauf têx. ²⁰ Six zuc săngx laiv lanh jeenđ longđ jau woax tauh six Njâuv stoif-munh nyăngz mengc hoonh phunb đangz lauf. Nănh songđ max zuc tayc, max cun nănh naih stoif đungx, six nănh năngx tuz Tênb-Hungh quanyf nănh nyăngz stoif.