¹ Nyâuh muif tauh yâuf-pez hopđ zuc stunx yaz năngđ Njâuv-Zâu nyăngz Pâuz, Six yâuc tuz lănv Tênb-Hungh pinyx nyăngz dlayc.” ² Ayx nâyx hungđ cumh pâuz nongc seen quaix six zuc naih stymz ayx.” ³ Yaz nyăngz phănc, nyâuh Yâuf-pez toix laiv lanh, Mah six nongc Bamh-munh nyăngz gâyf stămđ yaz stunx săngh ănz stêu dlayc. Tauv Zâuv yaz max cănh stămđ yaz.” ⁴ Yaz pâyz tuz yaz max ayx toix laiv hungđ sai, Six lauf max zâyf coong yaz bix max naih Stoif nef, Six jangx cungb naih ah tauh Zâu nzăngđ hayh tingc tuz yaz nyăngz Stoif.” ⁵ Wâyc năngđ nâyx, Max zengx tauv stămđ Stoif nyăngz săngx huđ, Max nongc coonx tingc Stoif, six zuc zu năngx tauv Zâu taih woax zanyf, Nănh nzăngđ stămđ tingc phunz, Nănh oix zoz coz Munh pinyx yămz nzămc cah njaf ayx nyăngz dlayc, Payb seetb taih yămz Gwăngz-eng, Munh yămz nyâuđ nyâyh nyăngz dlayc, Nănh yâuc oix phunz goib yangh seetb taih nzuf, Tauv woax zanyf âyz Tênb-Hungh phătc coz munh toix laiv tauh payh tuz phunz, woax tauh songđ tuz pôz.” ⁶ Yâuf-pez lex! Yaz zoz yaz cloon A-bô-lô, ayx caox gao, Phunz nyâuh Yâuf-pez ô-stayx hođ pâyz Jix-caox, six zuc ayx âyz Canyx-Stâub nzaox nyăngz woac, Nzof nyâuh Yâuf-pez nzăngđ max pyac-nâyx Tauh, mangc stam woax tauh.” ⁷ Toix laiv lanh phunz nyâuh Yâuf-pez ayx năngx lub têx pitc tauh? nyâuh naih laiv hungđ max zâyf nyâuh Yâuf-pez stipx taih nyăngz quah tăngf? Ha six coong nyâuh Yâuf-pez stipx taih nyăngz quah tăngf ha nyâuh Yâuc nzeetx blangc coong nâyx six pănh cănh ayx seetb taih?” ⁸ Nyâuh Yâuf-pez Puv quâyx naih dloih nzuf Muif hungđ max Sămv lungđ nzof, nyâuh Yâuf-pez yâuc max Zâuh buz, Yaz mungc nyâuh Yâuf-pez tuz ayx Hungh, Yaz yâuc tuz cloon nyâuh Yâuf-pez tinyh đoih tuz ayx Hungh.” ⁹ Tênb-Hungh phunz pănh cumh pâuz Munh cayx năngđ nzac tauv zax zuc tingc Stoif, zuc tayx tayc nyăngz Munh, Pănh six cayx năngđ dênx phunz bamh-canz munh Mangc, Canx giaz six Stynz-munh, Cloon bamh-munh mangc ayx đaoc.” ¹⁰ Yaz six săngh munh oongx yămz Njâuv-Zâu , Six nyâuh Yâuf-pez naih Tongb-manyh yămz nănh, Yaz lanz six nyâuh Yâuf-pez yongb, nyâuh Yâuf-pez tuz Munh zanyb, Six yaz zuc munh phătc stanc.” ¹¹ Six tauv nâyx zanyf, Yaz max naih caux Nhlync, Caux zuz, Yaz yâuc zuc munh bopc, Njynh max naih tync zay stynb.” ¹² Yaz nongc cănh yaz nyăngz puf ayx congz zâuđ wâyc nongc yungf mengc. zuc munh zaux, Yaz yâuc pou-woac phunz nănh stiz, zuc munh ayx peo yâuc zuc tanyđ.” ¹³ Zuc munh plongz woac ănz, Yaz yâuc coong woac gongx phunz nănh stiz, Tauv nâyx zanyf, Yaz lauf cayx năngđ bamh canz nyăngz njămc nyav. Yâuc năngđ bamh munh nyăngz đi” ¹⁴ Yaz ja nâyx đomc woac max zâyf lov jau ayx phunz nyâuh Yâuf-pez nyayz đêh, nyâuh Yâuf-pez Six năngđ yaz Stăngz nyăngz Sây, Yaz songđ ja nâyx đomc woac quynb nyâuh Yâuf-pez.” ¹⁵ Max cunv hănđ naih sax panc tauh Stênx-Stengb yeenv nyâuh Yâuf-pez yămz Njâuv-Zâu cah njaf, Six nyâuh max naih đungx tauh Pha đêh, Tongb quaix cuđ-jeenx, Yaz tuz pênx nyâuh Yâuf-pez nyăngz Pha yămz Njâuv-Zâu Yê-su cah njaf.” ¹⁶ Năngđ nâyx yaz jođ nyâuh Yâuf-pez âyz yaz nyăngz gao ayx.” ¹⁷ Wâyc năngđ nâyx, Yaz paiđ Ti-mô-thê, Ninyh nyâuh Yâuf-pez woa, Nănh Six yaz Stăngz nyăngz toonz, Yâuc couv Zâu ayx naih Stymz nyăngz Munh, Nănh oix lănv phunz nyâuh Yâuf-pez pâyz yaz cloon Njâuv-Zâu Yê-su songc Mengc săngh. Six năngđ yaz yămz nzêux muif đoif huyđ toongh nzaox Munh.” ¹⁸ Yămz nyâuh woa naih đomc Yâuf-pez laic stăngz six yaz max hayh ninyh tuz tauv nyâuh Yâuf-pez woa.” ¹⁹ Six coong Zâu năngđ oix têx, Max lauh yaz songđ tuz ninyh tayđ nyâuh Yâuf-pez, Tauv woax zanyf, Yaz songđ tuz phătc nyâuh haif nzongf nyăngz Munh, Max zâyf cungb mangc nănh stiz nyăngz jab, Njynh cloon coong nyăngz woac.” ²⁰ Wâyc zuc Tênb-Hungh nyăngz côkz six max zâyf yămz munh coong nyăngz woac, Six yămz ayx nyăngz jab.” ²¹ Nyâuh Yâuf-pez oix nongc yaz ayx laix? nzâyz pya ninyh panx nyâuh, Mah six oix nongc yaz nzâyz stăngz Munh nyăngz jau phunz nyâuh Yâuf-pez?.”