¹ Nkhunena ukuti umwana angapyana pene achili munandi, loli atakupambanapo nu muzya, napo umwene mwenencho wa vyonsi. ² Loli akuba pansi pa basungilili, nabakupwelelela ivyuma vyache mpaka po utata wache akabikila. ³ Nuswe bwaka, po tukaba swe bana abanandi, tukaba twe bazya ba myiko ya chisu chapansi. ⁴ Loli bo akabalilo kakwana, uchala akatuma umwana wache yo akapapwa mumwanakazi, sona yo akapapwa pansi pa ndaghilo. ⁵ Akapanga ichi ukuti asatule abanthu bo bali pansi pa ndaghilo, ukuti tupokele ubumwana. ⁶ Pakuti umwe mwe bana bache, U Chala akatuma mumyoyo yitu umuzimu wa mwana wache, wuwo wukupundilizya ukuti, '' Abba, Tata.'' ⁷ Po lelo te we muzya sona loli umwana, po nanthi we mwana, koti we wamphyana mwa chala. ⁸ Pakwanda pakabalilo ko mutakamumanya uchala, mukaba mwe bazya kubo baliko, amaka agha bupeli aghambula chala. ⁹ Po ilelo pakuti mwamumanya uchala, sona nukuti mwamumanya uchala, nga choni cho mukupyanila ku mizimu ya muchisu yoya mwalwe na yoyite namaka, sona choni cho mukupyanila sona kubuzya bwa mizimu iyi. ¹⁰ Mukusunga amasiku nimyezi sona utubalilo nimyaka! ¹¹ Indi nu bogha numwe pakuti pamo imbombo yo nkhabomba nkhabomba kukwinu yingaba yambula phindu. ¹² Nkhubalenga, mwebawamwitu, mube ngati nene, pakuti nune indi ngati mwemwe. Umwe mutanangile lumo. ¹³ Loli muzimenye ukuti chifukwa cha vyakubaba vya mumubili chobene nkhalumbilila amazyu kukwinu pabwandilo. ¹⁴ Nanga buli akabele ka mubili wane kakipela ngati ngero kukwinu, loli mutakansula ndipo mutakankhana. Loli umwe mukamphokela une ngati ne mungelo wa chala, ngati nkhaba ne kilisitu Yesu umwenecho. ¹⁵ Ngapo ulusayo lwako lulikwiyi akabalilo kano? po nkhubasimikizya ukuti nanthi chikabanga chamachitiko nge mukolobwile amaso ghinu nukumpha une. ¹⁶ Ka pokoti, naba ne mulwani winu pachifukwa chakuti nkhubabuzya ubwanaloli? ¹⁷ Abanthu bala bengo nkhani kukwinu ukuti babadebe, loli tepopabwiza. Bakulonda bwaka ukubighalila umwe kunzi, ukuti numwe mube numutukutuku pakusekela kukwabo. ¹⁸ Akabalilo konsi chochiza pakuba numutukutuku pafundo inyiza, sona tepene ponanthi indi numwe. ¹⁹ Mwebana bane abanandi, sona ndi nububavu ubwakubapapa umwe mupaka u Kilisitu apangiwe mumwinu. ²⁰ Nanyenywanga ukuti ngenabanga numwe akabalilo kano, ukuti nsinthe akanenele ka mazyu ghane, pakuti nkhusikulwa numwe. ²¹ Mumbuzye, umwe mwe mukunyenywa pakuba pasi pa ndaghilo, ka mutakwivwa ku ndaghilo? ²² papo lisimbiwe ukuti u Abulahamu akaba na bana babili, weka ukufumila kuwambombo umusungu, sona weka nu mwanakazi umusatuke. ²³ Weka akapapwa nu wambombo umusungu ukulingana numubili, loli uyunji akapapwa numwanakazi umusatuke ukwendela mu lufingo. ²⁴ Ivinthu ivi vingang'anamuliwa ngati chochifwanikizyo, pakuti abanakazi aba bakwimilila infingo zibili. Weka papabo wakufumila ku chipili cha Sinayi po akupapa abana bobobazya. Uyu we Hagara. ²⁵ Po u Hagara akwimilila ichipili cha sinayi ku Alebiya; sona akwimilila u Yerusalemu wa kabalilo kano, pakuti ali mubuzya nu mwana wache. ²⁶ Loli u Yerusalemu yo ali kumwanya musatuke, sona we mama witu. ²⁷ Papo lisimbiwe, '' Hobokanga, uwe we chumba we utakupapa; lila nkhani sona pundilizya mubuhoboke, umwe mwemutabumenye lumo ububavu bwakupapa kupapa kwa mwana; chifukwa abana abamwanakazi uwakulekiwa bobabalite nkhani ukupota abana ba mwanakazi yo ali nu mwanalume.'' ^{28 29} Po lelo, mwebawamwitu, ngati we Ayizeki, mwebana lulayizyo.Pakabalilo kalanyene umwene yo akapapiwa ukuyana nu mubili akamuvwimanga yo akapapiwa ukuyana numuzimu. Momo chibelile nulu. ³⁰ Nga amasimbo ghakuti choni? ''Musamazyepo umulindu umuzya poka numwana wache. Papo umwana umulumendo uwa musungu umuzya te akagabana ivyamphyana nu mwana uwa mumwanakazi umusatuke.'' ³¹ Polelo, bawamwitu, tetwebana bamwanakazi umuzya, loli abamwanakazi umusatuke.