¹ Ukwa pabwaka u Kilisitu atusatwile. Imilila nganganga, po utakibike sona pasi pabulaghili bwa bukayidi bwa mbibi. ² Linga, une, u Pawuli, akuti kukwinu nanthi witikizya ukuti udumuliwe, u Kilisitu atazukupindula nachimo mwa uwe. ³ Nkhusimikizya sona ku mwanalume wesi yo ipeleka mwene ukuti adumuliwe, atakwenela ukusunga nalumo ululaghilo. ⁴ Mudumuliweko kwa kilisitu, mwemukenelanga ukuwolosiwa nindaghilo; Temupokele sona ichisa chachala. ⁵ Ukwendela mwa mbepo na mulusubilo, tukulindilila umwakusubila ubwanaloli. ⁶ Mwa kilisitu Yesu kwali udumuliwe pamo utadumuliwe, vitenimbombo nayimo, loli ulwitiko ukubombela mu lughano. ⁷ Mukasamalanga akiza. Wewenu yo abakanizya pakwivwila ubwanaloli? ⁸ Ukulambilizya uku kutakufumila ku yo akukwitizya! ⁹ Ichilungo chakupa loli chikupangisya ukuti ivinthu vitutumuke. ¹⁰ Indi nu lusubilo mwa mwa mwene wane ukuti temwize mube ninyinong'ono izinji awe loli izya kuyana bwaka ni zyane. Wesi yo akukuyinvya azukufundiwa napo angaba wewenu. ¹¹ Loli une banangwa, nanthi une nchili nkhulumbilila izya kudumuliwa, nga choni nchili nkhutamiwa? muchifukwa ichi, ichipunulo icha mphinjika chafumapo. ¹² Ku bosi bo bakubavulungania umwe, nalondanga ukuti nge bing'anamula ukuba bakupasiwa. ¹³ Mukitiziwa mu bwabuke, loli mutakububombesya ubwabuke ubu ngati kabalilo ka mbibi ya chipeliwa; napo, lughano ukumubombela umunyako. ¹⁴ Pakuti amalamulo ghosi ghakwanilisiwe mu lulaghilo loka. '' ubaghile ukughana umupalamani wako ngati mumo wighanile wemwene. '' ¹⁵ Loli pala mukunyamukilana nu kuvulazania, muchebe mungize mumalane bwaka weka nu yunji. ¹⁶ Loli nkhubabuzya, mwende mumuzimu po te munyamule ivinyonywa ivya mbibi ya chipeliwa. ¹⁷ Pakuti ivinyenywa vya mubili vikulimbana nu muzimu, sona ivinyenywa vya muzimu vikulimbana nu mubili. Mwakuti utakabombe ivinthu vyo ukulonda ukubomba. ¹⁸ Loli nanthi ukulongoziwa nu muzimu, utakuba pasi pa ndaghilo. ¹⁹ Po lelo imbombo zya mubili zikubonekela: ubuhule ubupopo, ukunyenywa, ²⁰ ukwiputa ku vifwani, ukulawula, ulubengo, ulombwa, akabini, ubukali, ukuyighana, ukugabinkhana, ²¹ akabini, ubwaching'wela, ukulyakulya nivinji vyo viliko. Nkhubachevya, ngati mo nkhabachevyezya pabwandilo, ukuti bonsi bobakubomba ivinthu ivi tebakapyane ichinamwene chachala. ²² Loli ivikomwa vya muzimu vyovino, ulughano, ulusekero, umutende, ukujimbilila, ichisa, ubwiza, ubusubaliwa, ²³ ubwachimyeka, nukwikola; kutaliko ululaghilo lolukususania nivi. ²⁴ Bonsi bobache u kilisitu Yesu, bawupamanthile umubili wabo pamphinjika poka nukulakalaka kwache ni vinyenywa vyache. ²⁵ Nanthi tukwikala mumuzimu, po za twende mumuzimu. ²⁶ Za tutakabe twe bakwikwezya, ukukalipilana nukupangilana ibina weka numunyabo.