2 ۔ خدایِہ سُند رُوح ہیکؠو توہؠ یِتٕھہ کٕنؠ پہچٲنِتھ زِ یُوس رُوح اقرار کرِ زِ عیسیٰ مسیح چُھ جسم بنِتھ آمُت، سُہ چُھ خداۓ سٕندِ طرفٕہ۔
3 ۔ تٕہ یُوس کانٛہہ رُوح اقرار کرِنٕہ سُہ چُھنٕہ خداۓ سٕندِ طرفٕہ تٕہ یُوہے چُھ مسیحَس خلاف رُوح۔ یمسٕنز خبر توہِہ چھؠو بُوزمٕژ زِ سُہ چُھ یِنٕہ وۄل بلکِہ چُھ ونِکؠس تِہ دُنیاہَس منز مُوجود۔ 4 ۔ ہے شُرؠو! توہؠ چُھو خداۓ سٕندِ سٲتؠ تٕہ تِمن پؠٹھ چُھو غٲلِب آمٕتؠ تکیازِ یِہ توہِہ منز چُھ سُہ چُھ تؠمِہ کھوٚتٕہ تِہ بوٚڑ یِہ دنیاہَس منز چُھ۔
5 ۔ تِم چیھ دُنیاہٕکؠ اوٕہ موکٕٕھہ چِھ دنیاہکُوۓ ونان تٕہ دنیا چُھ تِہُند بوزان۔
6 ۔ اسؠ چِھ خداۓ سٕندِ سٲتؠ یِم خدایَس چِھ زانان سُہ چُھ سُون بوزان۔ یُوس نٕہ خداۓ سُند چُھ سُہ چُھنٕہ سون بوزان۔ امے سٲتؠ چِھ اسؠ حقُک رُوح تٕہ گمرٲہی ہُند رُوح پرزٕہناوان۔ 7 ۔ ہے ٹاٹھؠو! ولؠو اسؠ تھاوُۄ اکِس بؠکِس سٲتؠ محبت تکیازِ محبت چُھ خداۓ سٕندِ طرفٕہ آسان تٕہ یُوس اکھا محبت چُھ تھاوان سُہ چُھ خداۓ سٕندِ سٲتؠ پٲدٕہ سپدمُت تٕہ خدایَس چُھ زانان۔
8 ۔ یُوسنٕہ محبت چُھ تھاوان سُہ چُھنٕہ خدایَس زانان تکیازِ خدا چُھ محبت۔ 9 ۔ یُوس محبت خدایَس اسِہ سٲتؠ چُھ سُہ سپُد امِہ سٲتؠ ظٲہر زِ خدایَن سُوز پنُن کُن فرزند دنیاہَس منز تاکِہ اسؠ روزو تؠمِہ سٕندِ سببٕہ زندٕہ۔
10 ۔ محبت چُھنٕہ اَتھ منز زِ اسِہ تُھوۄ خدایَس سٲتؠ محبت بلکِہ چُھ اَتھ منز زِ تؠمؠ کوٚر اسِہ سٲتؠ محبت تٕہ سانِہ کفارٕہ خٲطرٕہ سُوزُن پنُن فرزند۔ 11 ۔ ہے ٹاٹھؠو ییلِہ خدایَن اسِہ یوتھ محبت کوٚر تیلِہ چُھ اسِہ پؠٹھ تِہ فرض زِ اکِس بؠکِس سٲتؠ تھاوَو محبت۔
12 ۔ خدا چُھنٕہ زانٛہہ کٲنسِہ وُچھمُت۔ اگر اسؠ اکھ اکِس سٲتؠ محبت تھاوَو تیلِہ چُھ خدا اسے منز روزان تٕہ تَسُند محبت چُھ سٲنِس دِلس منز کٲمل سپدمُت۔
13 ۔ تکیازِ تؠمؠ چُھ پننِہ روح منزٕہ اسِہ دؠوتمُت امِہ سٲتؠ چِھ اسؠ زانان زِ اسؠ چِھ تَس منز قٲئِم روزان تٕہ سُہ اسِہ منز۔
14 ۔ تٕہ اسِہ چُھ وُچھمُت تٕہ گوٲہی چِھ دِوان زِ ببَن سُوز فرزند دنیاہَس نجات دِنٕہ باپَتھ۔ 15 ۔ یُوس اکھاہ اقرار چُھ کران زِ عیسیٰ چُھ خداۓ سُند فرزند، خدا چُھ تَس منز روزان تٕہ سُہ خدایَس منز۔
16 ۔ یُوس محبت خدایَس اسِہ سٲتؠ چُھ تِہ زُون اسِہ تٕہ اسِہ چُھ تیمؠُک یقین۔ خدا چُھ محبت تٕہ یُوس محبتَس منز قٲئِم چُھ روزان سُہ چُھ خدایَس منز قٲئِم روزان تٕہ خدا چُھ تَس منز قٲئِم روزان۔ 17 ۔ امے وجہ چُھ محبت اسِہ منز کٲمِل گومُت تاکِہ قیامژ دوہ آسِہ اسِہ دلیری تکیازِ یُوتھ سُہ چُھ تِتھؠ چِھ اسؠ تِہ دنیاہَس منز۔
18 ۔ محبتَس منز چُھنٕہ وہمٕہ بلکِہ کٲمل محبت چُھ وَہمَس دُوٗر کران تکیازِ وہمٕہ سٲتؠ چُھ عزاب سپدان تٕہ کانٛہہ وہملَد سپُدنٕہ محبتَس منز کٲمل۔ 19 ۔ اسؠ چِھ امِہ موجوب محبت تھاوان زِ گوڈٕہ تھوۄ تؠمؠ اسِہ سٲتؠ محبت۔
20 ۔ اگر کانٛہہ ونِہ زِ بُو چُھس خدایَس سٲتؠ محبت تھاوان تٕہ سُہ تھایِہ پننِس بٲئِس سٲتؠ دُشمنی تٕہ سُہ چُھ اپُزِیور تکیازِ یُوسنٕہ پننِس بٲیِس سٲتؠ محبت چُھ تھاوان یُوس تؠمؠ وُچھمُت چُھ سُہ ہؠکنٕہ خدایَس سٲتؠ تِہ محبت تھٲیِتھ یُوسنٕہ تؠمؠ وُچھمُت چُھ۔
21 ۔ تٕہ اسِہ میُول تِہٕندِ طرفٕہ یِہ حُکم زِ یُوس اکھاہ خدایَس سٲتؠ محبت چُھ تھاوان سُہ تھٲیِن پننِس بٲئیِس سٲتؠ تِہ محبت۔