¹ ۔ وُچھؠو کِیُوتھ محبت چُھ ببَن اسِہ سٲتؠ کوٚرمُت زِ اسؠ آے تَسٕندؠ فرزند گنزرنٕہ تٕہ اسؠ چِھ تِہ۔ دُنیا چُھنٕہ اسِہ اوٕہ موکٕھہ زانان زِ تؠمؠ چُھنٕہ سُوتِہ زونمُت۔

² ۔ ہے ٹاٹھؠو! اسؠ چِھ ونکؠس خدایِہ سٕند فرزند تٕہ ونؠُک تام چُھنٕہ یِہ ظٲہر سپُدمُت زِ اسؠ کیا کینٛہہ آسَو! پُوز یِیژہَن چِھ زانان زِ ییلِہ سُہ ظٲہر سپنِہ تٕہ اسؠ تِہ آسَو تسؠ ہِی تکیازِ سُہ وُچھوَن اسؠ تِتُھوئ یُوتھ سُہ چُھ۔

³ ۔ تٕہ یُوس اکھاہ تَس نِش یِہ اُمید چُھ تھاوان سُہ چُھ پنُن پان تؠوتٔھی پاک تھاوان یُوتھ سُہ پاک چُھ۔ ⁴ ۔ یُوس اکھاہ گناہ چُھ کران سُہ چِھ شریعتٕچ مُخالفت کران تکیازِ گناہ چُھ شریعتٕچؠ مُخالفت۔

⁵ ۔ تٕہ توہؠ چُھو زانان زِ سُہ اُوس اوٕہ موکٕھہ ظٲہر سپدمُت زِ گنہَن تُلِہ تٕہ تَس منز چُھنٕہ گناہ۔

⁶ ۔ یُوس اکھاہ اَتھ منز قٲئِم چُھ روزان سُہ چُھنٕہ گناہ کران۔ یُوس اکھاہ گناہ چُھ کران، نَہ چُھ تؠمؠ سُہ وُچھمُت تٕہ نَہ چُھن زونمُت۔ ⁷ ۔ ہے شُرؠو! کٲنسِہ ہٕندِس دھونکَھس منز گژِھنٕہ یُون۔ یُوس نیکی ہٕنز کٲم چُھ کران سُوۓ چُھ تؠمسٕندؠ پٲٹھؠ نیک۔

⁸ ۔ یُوس شخص گناہ چُھ کران سُہ چُھ شیطان تٕہ شیطان چُھ گوڈٕہ پؠٹھے گناہ کران آمُت۔ خدایِہ سُند فرزند اُوس امِہ باپَتھ ظٲہر سپُدمُت زِ شیطان سٕنزَن کامؠن مِٹایِہ۔ ⁹ ۔ یُوس اکھاہ خدایِہ سٕندِ سٲتؠ پٲدٕہ سپدمُت چُھ سُہ چُھنٕہ گناہ کران تکیازِ تسُند بیُول چُھ تَس منز روزان۔ بلکِہ ہؠکنٕہ سُہ گناہ کرِتٔھی تکیازِ خدایِہ سٕندِ سٲتؠ چُھ پٲدٕہ سپدمُت۔

¹⁰ ۔ امے سٲتؠ چھے خداۓ سٕندِس فرزندَس تٕہ شیطان سٕندِس فرزندَس منز فرق ظٲہر سپدان۔ یُوس اکھاہ نٕہ راستبٲزی ہٕنز کٲم کران چُھ کینٛہہ سُہ چُھنٕہ خدایَس سٲتؠ کینٛہہ تٕہ سُتِہ نٕہ یُوس پننِس بٲیِس سٲتؠ محبت چُھنٕہ تھاوان۔ ¹¹ ۔ تکیازِ یُوس پیغام توہِہ گوڈٕہ پؠٹھے بُوزو سُہ چُھ یِہ زِ اسؠ تھاوَو اکِس بؠکِس سٲتؠ محبت۔

¹² ۔ تٕہ قٲئین سٕندؠ پٲٹھؠ مٕہ بنؠو یُوس شیطانَس سٲتؠ اُوس تٕہ یمؠ پنُن بُوۓ قتل کوٚر۔ ¹³ ۔ ہے بایو! اگر دنیا توہِہ سٲتؠ دُشمنی چُھ تھاوان تٕہ تعجب مَہ کرؠو۔

¹⁴ ۔ اسؠ چِھ زانان زِ موتٕہ نِشٕہ بچِتھ گر اسؠ زندگی منز دٲخل تکیازِ اسؠ چِھ بائیَن سٲتؠ محبت تھاوان۔ یُوس نٕہ محبت چُھ تھاوان سُہ چُھ موتکِس حالتَس منز روزان۔

¹⁵ ۔ یُوس اکھا پننِس بائیِس سٲتؠ دُشمنی تھاوان سُہ چُھ قٲتِل تٕہ توہؠ چُھو زانان زِ کٲنسِہ قٲتِلَس منز چھؠنٕہ ہمیشٕہ ہٕنز زندگی موجود کینٛہہ روزان۔ ¹⁶ ۔ اسِہ چُھ محبت تسؠ نِش زونمُت زِ تؠمؠ چُھ سانِہ باپَتھ پنُن زُو دیومُت تٕہ اسِہ پؠٹھ تِہ چُھ بائیَن ہٕندِ باپَتھ زُو دؠون فرض۔

¹⁷ ۔ یمِس کٲنسِہ نِش دناہُک مال آسِہ تٕہ اتی وچِھہ سُہ پننِس بائیِس محتاج تٕہ تَس پؠٹھ رحم کرنَس کرِ ژِیر۔ تَس منز کِتٕھہ کٕنؠ ہؠکِہ خدایہ سُند محبت قٲئِم روزِتھ؟۔

¹⁸ ۔ ہے شُرؠو! اسؠ کرونٕہ کلام تٕہ زؠیِہ سٲتی یُوت کینٛہہ بلکِہ کرو اسؠ کامِہ تٕہ پزرٕکِہ ذریعہ سٲتؠ تِہ محبت۔ ¹⁹ ۔ امِہ سٲتؠ اسؠ زِ حق کیا چُھ تٕہ یَتھ کتِھہ منز سون دِل اسِہ الزام دِیِہ تَتھ بارَس منز کرو اسؠ تؠمسٕندِ حضوری منز پننٕؠ دِلجمعی۔

²⁰ ۔ تکیازِ خدا چُھ سانِہ دِلٕہ کھوتٕہ بوٚڑ تٕہ سُورٔی کینٛہہ چُھ زانان۔

²¹ ۔ ہے ٹاٹھؠو! ییلِہ سُون دِل اسِہ الزام چُھنٕہ دِوان تیلِہ چھے اسِہ خدایَس برونٛہہ کنِہ دلیری سپدان۔

²² ۔ تٕہ ییلِہ اسؠ کینٛہہ منگان چِھ، تِہ چُھ اسِہ تَسٕندِہ طرفٕہ میلان تکیازِ اسؠ چِھ تسٕندؠن حُکمن پؠٹھ عمل کران تٕہ یِہ کینژھا سُہ پسند چُھ کران تِہ چُھ بجا انان۔ ²³ ۔ تٕہ تسُند حُکم چُھ یِہ زِ اسؠ انَو تَسٕندِس فرزندَس عیسیٰ مسیح سٕندِس ناوَس پؠٹھ ایمان یِتٕھہ پٲٹھؠ تؠمؠ اسِہ حُکم چُھ دیوتمُت، تؠمِہ موٲفِق تھاوَو اسؠ پانٕہ وٲنؠ محبت۔

²⁴ ۔ تٕہ یُوس تَسٕندؠن حُکمن پؠٹھ چُھ عمل کران، سُہ چُھ امِس منز تٕہ یِہ چُھ تَس منز قٲئِم روزان تٕہ تؠمے سٲتؠ یعنی تؠمِہ پاک رُوح سٲتؠ یُوس تؠمؠ اسِہ چُھ دیومُت اسؠ چِھ زانان زِ سُہ چُھ اسِہ منز قٲئِم روزان۔