¹ Kavulyaho, banchuvangu vachenete, muli bvatwirwa oku kuwiwa kwewiru. Muazyare kaza Jesu, o muapositora no mupirisita o munene woku zumina kwetu. ² Kasepahara kwa Nyambe, ozyo na mushara, shina vulyena Mushe kasepahara mwinjuwo ya Nyambe. ³ Kakuli Jesu nabonwa ye ndeye avotere etuvo enene ihita ya Mushe, kakuli o muzyaki we njuwo asepehara kuyihita enjuwo. ⁴ Yonshe enjuwo ikwesi o muzyaki, kono ozyo azyaka zonshe ndi Nyambe. ⁵ Eye Mushe na sepahara mwinjuwo ya Nyambe yonshe, kuva empaki ye zintu ezo nazi ambwe kuvuso. ⁶ Kono Kiresite a sepahara shina o mwana ozyo ayendesa enjuwo ya Nyambe. Ndishe vashinjuwo yakwe ati natu kwatilira kezo zitu goresa ne nsepo eyo tulitunta kayo. ⁷ Kavulyaho, vulyena o Ruho ru Chenete ezo ru amba: ''Shunu, shake mushuwe ezywi lyakwe ⁸ mwasha zyuminizi emyozyo yenu omo nimwa tendera aho kamundi zokere, mwi nako yoku yereka mwinkanda. ⁹ Bashukurwenu aho vandi zokera nokundi yereka, aho vabona e mitendo yangu ¹⁰ ke myika ya makumi wone. Kavulyaho kandi vengere lina eshika. Ndokuli ambira ye, 'Mbovulyaho vana yemburuki mu myozyo yavo. Kali niva zyiva enjira zangu.' ¹¹ Mi ninda konka kovu kali bwangu ye: 'Kali nava kavire ku mashweneno angu.'' ¹² Mutokomere, bakwangu, kwashavi niyenke ozyo akwesi o mozyo o mubbi wokusha zumina, o mozyo uzoka kuza Nyambe ahara. ¹³ Kono muli jingize ezyuva ne zyuva, ati vulyaho li kuyiwa ye ''shunu,'' okutiye kwashavi niyenke mukati kenu ozyo azyuminiza o mozyo koku homiwa ku zibbi. ¹⁴ Kakuli nitwava echibamu kwa Kiresite ati natu kwatilira kuzwa kuma tatikizo kutwara kuma maninikizo. ¹⁵ Kezi nikwa ambiwa, ''Shunu, ati namushuwa ezywi lyakwe, mwasha zyuminizi emyozyo yenu, vulyena kakwina kuku zokera. ¹⁶ Mbani niva shuwa Nyambe mi voku muzokera? Kali mbavo vena niva kazwa mwa Egepita avo kava hitilirwa kwa Mushe? ¹⁷ Abo kavengere e myaka ya makumi wone? Kali mbavena kavena navena niva tenda ezibbi, avo e mivili yavo niya wira mwinkanda. ¹⁸ Avo nali konka ye kali nava kavire muma shweneno akwe, ati kali mbavo niva kana ku chilira zakwe? ¹⁹ Tubwene ye kali kavawora ku kavira muma shweneno akwe kevaka lyokusha zumina.