¹ Ka bulyaho mube batendi bezo ka tenda Nyambe, shinaho muli bane ba shakiwa. ² Mi muyende mwi rato, shina bulyaho ka tushakira Kiresite no kuliha yemwini kebaka lyetu. Kali neu ne chitabero, okuba e chintu chi tabisa kwa Nyambe. ³ E nkezo zo bubuki kapa zonshe ezo zaazya kuchena kapa e ntakazo zo bubuki zi reke oku kuwaurwa mukati kenu, shinaho kayi botere ku barumeli. ⁴ Kapa oku kuwaura ze nkezo embi, e ziambo zaazya e ntuso, kapa kuambaura zo buyazi, ezo kazi rukere kuambwa. Kunje ya bulyaho kubotere kuba noku litumera. ⁵ Muzyibe kute ye no kubure o bubuki, o kusha chena, kapa o musa, eye, a rapera cho kubezya, ozyo naka kabire mu mubuso wa Kiresite ne Nyambe. ⁶ Mureke oku zuminiza bantu niba mihoma na mazywi azya e niti. Kebaka lyezi zintu o kubenga kwa Nyambe kukezya ha bana kaba kuteki. ⁷ Cware mureke oku wanisika ye mutenda ezo batenda. ⁸ Kakuli kamwina mu kansikwe, kono hanu shemwina mwi seli ku Nfumu. Cware muhare nemuli bana bomwi seli. ⁹ Kakuli e misero yo mwi seli yina monshe mu rukite, mu chenete, nomwi niti. ¹⁰ Mu shakisise ezo zi tabisa ku Nfumu. ¹¹ Musiye ku wanisika mu zitendo zaazya entuso zo mu kansikwe. Kunje ya bulyaho, muzi ambe kubantu muba limburure. ¹² Kakuli e zintu batenda ku chikunduko zi fwisa e nshoni nanga kuzi toroka ¹³ E zintu zonshe, heba shiza zwiswa kwi muni, shiza zyibahazwa. ¹⁴ Kakuli zonshe ezo za zyibahazwa shezi bonwa ko kuchena. Kabulyaho yi amba kute ye, "Mubuke, enwe murere, mi mubuke kubafu, mi Kiresite mbwa benye henu." ¹⁵ Kabulyaho mu mamere komo muhalira, mwasha hali mbwe mbantu basiru kono muhare mbwe mbatu ba talifite. ¹⁶ Mu tende zintu ezo muwora kutenda ke nako kakuli a mazyuba sha mabbi. ¹⁷ Mwasha siruhi. Kono, mu shuwisise ye omo a shakira Onfumu momwi. ¹⁸ Mi mwasha korwa kwi waine, kakuli ziya mu bushinyi. Kunje ya bulyaho, mube no Muzya wu Chenete. ¹⁹ Muli ambauze mu njimbo nze ntumbo nize chimoya. Muzyimbe no kurumba e myozyo yenu neyina ku Nfumu. ²⁰ Mu litumere ke zintu zonshe e nako yonshe mu zina lyo Nfumu Jeso Kreste kwa Nyambe Tata. ²¹ Muli kuteke mubeni ke kute elyo mukwatire Kreste. ²² A bakentu, mulibike mwinshi ya bakwame benu, shina mbulyaho mutendera ku Nfumu. ²³ Kakuli o mukwame ndo mukuru wo mukentu, shina bulyaho Kreste ali mukuru we nkereke. Ndo mu rukuruli wo mubili. ²⁴ Shina e nkereke ili bikite kwa Kreste, a bakentu nabo kube bulyaho ku bakwame babo mu zintu zonshe. ²⁵ A bakwame, mushake a bakentu benu shina bulyaho Kiresite ka shakira e nkereke noku lineera yemwini kwayo. ²⁶ Na tenda za bulyena okuteye ayi chenese. Nayi chenesa shina mbwee nkusanza na menji mwi zywi. ²⁷ Na tenda zabulyena okuteye ali sunde ye nji nkereke yi chenete, yaazya e chibata, kunyonyobara kapa za bulyaha, kono kunje yo kuchena noku bura mafosisa. ²⁸ Munjira yiswana, a bakwame ba botere kushaka a bakentu babo shina mbulyaho bashakira e mibili yabo. Ozyo ashaka mukentu wakwe a shaka a lishaka yemwini. ²⁹ Noku bure ozyo a toya o mubili wakwe. Kono, awu babarera noku wushaka, shina Kiresite bulyaho a shakira e nkereke. ³⁰ Kakuli tuli ba hantu honke bo mubili wakwe. ³¹ ''Ka bulyaho o mukwame nara reka beshi ni banyina noka lishanganya kwa mukentu wakwe, mi mu bubeli bwabo ba kabe chintu chonke.'' ³² Ezi nzintu zinene zi lizikite, kono ndiamba kaza Kiresite ne nkereke. ³³ Ko kuekeza, o muntu no muntu kwenu arukere o kushaka mukentu wakwe bulyaho a lishakira yemwini, mi no mukentu a rukere ku kuteka mukwame wakwe.