¹ Kabulyaho,kabo bena mu ntorongo kebaka lyo kuliketera ku tendera Nyambe, ndi mikumbira muyende ke njira eyo nimwa kuiwa kayo. ² Mube no buikokobezo, o kuruka ne myozyo mire. Mu litambure mubeni mwi rato. ³ Mutende omo muworera okuba nemu shangene mu Ruho o kuhara mwi nkozo ne mushangene. ⁴ Kwina o mubili wonke no Ruho ronke, shina bulyaho nimwa kuiwa ko murero wu gorete mu ku kuiwa kwenu. ⁵ Mi kwina o Nfumu yenke, e nsepo yonke, e nkorobezo yonke, ⁶ ne Nyambe yenke eshi wa bonshe. A eterere zonshe no kutenda mukati ka zonshe ni zonshe ⁷ Kwetu twenshe nitwa hewa e chihewa cha Nyambe kokuya komo ashakira ye tube. ⁸ Kubite bulyaho liwamba e ñoro ye: Aho ka ya mwi wiru, na rukurura bantu mu bukoba. Na ha e mpo ku bantu.'' ⁹ Nchinji ku toroka o kuteye, " Naya muwiru" o kuzwisa ko kuteye na suka hanshi mu zibaka zire za hanshi? ¹⁰ Eye ozyo na suka hanshi ndeye yenke na naya mu wiru hape kure mu chibaka e chinene chihita e wiru lyonshe. Natenda ezi okutiye a tende zintu zonshe. ¹¹ Kiresite naha e chihewa Nyambe bulyena: baapositola, baporofita, abo hasanya ezywi lya Nyambe, a bakutazi, na bazyiizi. ¹² Natenda ezi oku rukisa a barumeli ko mutendo ku tendera bamwinya, ko kuzyaka o mubili wa Kiresite. ¹³ Akwesi a tenda ezi mani mbita kahura ho kushangana kwe ntumero ne nzibo ya Mwana wa Nyambe. Akwesi ko a tenda ezi mbita netube barumeli bakulite mbwe mbabena bahulite mu kuzyura kweniti kwa Kiresite. ¹⁴ Ezi nkutiye tusiye kuba shina mbanche hape. Ezi nkutiye tusiye ku zoraurwa zoraurwa. Ezi nkutiye twasha yemburuki ko muzya wo buzyiisi, ko kuhomwa kubantu kezo ba amba ko butali bwabo bo kuhoma. ¹⁵ Kunje ya bulyaho, mbotu ambe e niti mwi rato noku kura mwi njira zonshe kwakwe eye o mutwi wetu, Kiresite. ¹⁶ Kiresite a shanganya o mubili wonshe wa barumeli hantu honke. Zikwatwa hantu honke ke ntuso ye zifuha okute ye o mubili wonshe wu kure no kulizyaka owo wini mwi rato. ¹⁷ Kabulyaho ndi amba ezi, mi ndimi yereza ko kugora kwa Nyambe: kamu sihali mbwe mbashi Zishi ba lihalira bulyo ke minahano yabo yaazya e ntuso. ¹⁸ Kaba shi azyali nenja. Kaba shihali mwi njira eyo ashaka Nyambe ye ba hare a bantu bakwe kono bali kambwise kwakwe kebaka lye myozyo yabo yi lizyuminize. ¹⁹ Ka bafwi nshoni. Niba litaha abo beni mu kutenda ezintu zibbi zi tabisa e ngazyaro zabo, mwi njira yonshe eyo yi woreseka. ²⁰ Kono kali mbobulyena nimwa li zyiya kuamana ne Kiresite. ²¹ Ndizyi ye nimwa shuwa zakwe. Ndizyi ye nimwa zyiiswa kakwe, shina mbwe njiniti yina kwa Jeso. ²² Muzwise e zipangaliko kamwina mwazo kare, ezo niza yayilira ke zibbi ze ngazyaro zenu niza mihomenena. ²³ Muzwise e zipangaliko zenu za kare okute ye nemu tendwa a baya mu muzya we ngazyaro zenu. ²⁴ Mutende zi okute ye mubikwa ha zipangaliko e ziya, kokuya ka Nyambe. Zi tenderwa mu kuruka no kuchena kwe niti ²⁵ Kabulyaho muzwe ku kuamba e mbuzi. "Muambe e niti, neni neni kwa muyenze," kakuli tuli bantu ba Nyambe. ²⁶ "Muwora ku nyeerwa kono mwasha tendi zibbi." Mwasha rekereli e zyuba neli mina nemushi nyeerwa. ²⁷ Mwasha rekereli dyaburusi nami twara mu zibbi. ²⁸ Bonshe abo kaba hiba basiye kuhiba hape. Kunje ya bulyaho, ba rukere oku libereka. Batende mitendo ke mboko zabo, okute ye niba wore ku liabera nabo baazya. ²⁹ Kureke kuba ne chiambo chibbi chizwa mu kanwa kenu. Kunje ya bulyaho, kuzwe a mazywi awo a tusa ezo bashaka bamwi, o kutusa bena ba teezete. ³⁰ Mi mwasha nyeezi o Muzya wu Chenete wa Nyambe. Nji baka lyakwe nimwa hewa e chibata chisunda ye muli bakwe ke zyuba lyo kuwurwa. ³¹ Muzwise a kanyeezi, na matapa, ne mikwa yonshe yo bubbi. ³² Mube ba rukite kwenu mwenshe. Mube ne rato. Mu likwatire zibbi zenu, shina bulyaho na mikwatira Nyambe ka Kiresite.