¹ Kebaka lyezi Eme, Paulusi, ndili mushuminwa wa Kiresite Jeso kwenu bashi Zishi. ² Ndi zumina nimwa shuwa o mutendo we chishemo cha Nyambe owo ninda hewa kenu. ³ Ndi ñora ezi kokuya kezo ninda sundwa. Eyi nje niti yi lizikite ninda ñora zayo ko bufuhi mwi ñoro limwi. ⁴ Shaka nemu zibare, ni mwara wora ku shuwisisa kute ye ndi shuwa hawa mweyi niti yi lizikite ya Nyambe. ⁵ Mwayina e nako e niti kali niya sundwa ku bana bo muntu. Kono hanu niya sundwa ko Ruho ku Baaposotora na Baporofita bakwe abo niba cheneswa. ⁶ Eyi niti yi lizikte njo kute ye bashi Zishi mba joboli ba yenzenu na bantu bo mubili ba yenzenu. Mbakwenu mu shanganine nabo mu nsepiso kwa kiresite Jeso mu evangeli. ⁷ Kakuli ni ndaba o mwika weyi evangeli ke chihewa cha Nyambe che chishemo ninda hewa mu nxdamu zakwe zi berekete. ⁸ Nyambe nandiha eyi ntuhu, nanga nendili muchenya kwabo ba bikirwa ku mbali ba Nyambe. Echi chihewa ncho kuteye ndi ambe ku Zishi ezywi kali mani kuzyibahazwa ke nfuyauzi ya Kiresite. ⁹ Ndi botere ku sukurwira bantu bonshe kuamana nezo a azyara kutenda Nyambe zi lizikite. Ezi ngazyaro Nyambe kazi zikite ke zilimo zingi mu rushara, ozyo na tenda e zintu zonshe. ¹⁰ Ezi kazili zo kute ye hanu, ke nkereke. A bayendesi ni bashi nkuta mu zibaka zomwi wiru nibara kezya kuzyiba zingi zi lizikite zo butali bo mukaliro wa Nyambe. ¹¹ Ezi nezira tendahara kokuya ke miazyaro kaimani eyo na tenda kwa Kiresite Jeso Nfumu wetu. ¹² Ke baka lya Kiresite katu tiyi mi tuwana e njira netu gorete ke baka lye nsepo yetu kwakwe. ¹³ Kabulyaho ndi mikumbira ye mwasha zwafwi ke baka lyo kumi sehekera. Ezi nji tubo lyenu. ¹⁴ Ke baka lyezo na mitendera zonshe ndi tongama ha mazwi angu ku Batata, ¹⁵ ozyo na bumba no kuha mazina o rusika ronshe kuwiru ni hanshi. ¹⁶ Ndi rapera ye na mihe, kokuya ko bunene bwe tubo lyakwe, mu goreswe a nxcamu mu Ruho rwakwe, ozyo ena kwenu. ¹⁷ Ndi rapera ye Kiresite na hare mwi mozyo yenu mu ntumero. Ndi rapera kute ye a mazyimo enu abe mwi rato lyakwe. ¹⁸ Mube mwi rato lyakwe okute ye muwore ku shuwisisa, nabo ba zumina bonshe, o bumwa, o bure, o bukuru, no buzungi bwe rato lya kiresite kwi bu kuma. ¹⁹ Ndi rapera kute ye nemu zyibe o bunene bwe rato lya kiresite, obo bu hitilira e nzibo. Nemu tende za bulyena okute ye nemube no kuzyura kwa Nyambe konshe. ²⁰ Hanu yenshe ozyo awora o kupanga zonshe a hare, kure hawiru ya zonshe tu kumbira kapa tu azyara, okuya ke nxdamu ezo zi bereka kwetu, ²¹ kwakwe kube ne tubo mu nkereke nikwa Kiresite Jeso ku bantu bonshe ni kamuta. Kube bulyaho.