¹ Hanu oku amana nezi zintu: '' Mburotu ye o mukwame areke o kuba no mukentu.'' ² Kono kevaka lye miliko ze nkezo zo bushayi, o mukwame a votere o kuba no mukentu wakwe, mi o mukentu a botere o kuba no mukwame wakwe. ³ O mukwame a votere oku bumbiliza o musebezi wakwe zoku shangana ne mukentu wakwe, mi mwinjira ifwana no mukentu kwa mukwame wakwe. ⁴ Kali mukentu akwesi nkamaiso ha mubili wakwe, kono ndi mukwame wakwe. Mwinjira ifwana, o mukwame a azya enkamaiso ha mubili wakwe, kono mukentu wakwe ndeye akwesi. ⁵ Mureke o ku linyima, mbita koku zuminzana nike nako yo vutokwa. Mutende vulyaho o kutiye muhe nako ku ntapero. Mi mu votere oku voora hantu honke hape, oku tiye Satani areke oku mi yereka kevaka lyoku sha wora oku liyendesa. ⁶ Mi ndimi sumwina ezo zintu okutiye mu toreherwa kono kali murawo. ⁷ Ndi shilra ye nali o muntu yenshe afwana shina ndime. Kono o muntu no muntu ena echihewa o kuecho nahewa kuzwa kwa Nyambe. Zyumwi ena yowu mushovo zyumwi ena yo wina. ⁸ Kuva nzike navo niva fwirwa ye mburotu ye bakare niva azya oku sheshetwa, shina ndime. ⁹ Kono ati kaba woli okuli kwata nenja, va sheshe noku sheshiwa. Kakuli mburotu ye vasheshiwa okuhita ye vafwe ku ntakazo. ¹⁰ Hanu kwavo vasheshete noku sheshiwa ndimiha entaero - Kali ndime, kono ndu Nfumu - o mukentu areke oku bbatuka kwa mukwame wakwe ¹¹ (kono ati na bbatuka kwa mukwame wakwe, akare naazya oku sheshetwa kapa ashuwane nokuli booza ne mukwame wakwe), mi o mukwame asha bbatuki ne mukentu wakwe. ¹² Mi kuvonshe ndita ye - eme, kali ndu Nfumu - okutiye ati o mukentu nakwesi o mukentu ozyo a azya entumero, okutiye azumina okuhara neye, areke oku mukana. ¹³ Ati o mukentu akwesi o mukentu a azya e ntumero, ati a zumina oku hara neye, areke oku mukana. ¹⁴ Kakuli o mukwame ka azya e ntumero avikitwa kumbali kevaka lya mukentu wakwe, no mukentu ka azya e ntumero a vikitwa kumbali kebaka lyo mukentu. Kunje ya vulyaho a vanenu va siyara niva azya oku chenete, kono va kungwira kumbali. ¹⁵ Kono ati ozyo azya e ntumero za zwaho, mu mureke ali yendere. Mweyi entava, a vakentu niva nchiyetu vaazya oku shuminwe kwi ngoro zavo. Nyambe na tukuwa tuhare mwi mpore. ¹⁶ Cware mbuti muzyi, vakentu, kapa mura verekera ava kwame venu? Kapa mbuti muzyi, mu vakwame, kapa mura verekera a vakentu venu? ¹⁷ Muzuminine o muntu no muntu ahare o vuharo komo navu muhera o Nfumu, vulyaho Nyambe namu kuwira. Owu ngo musevezi wangu mwi nkereke zonshe. ¹⁸ Nga kwina ozyo kena ku mukanda ozyo nakuyiwa noku zumina? Areke oku yereka kokuli vonahaza ye kali naya ku mukanda. Kwinazo kali naya ku mukanda aho akuwirwa mwi ntumero? Areke o kuya ku mukanda. ¹⁹ Kakuli kali kuya ku mukanda kapa oku shaya ku mukanda oko ku shakahara. Echo chi shakahara ku mamera entaero za Nyambe. ²⁰ Zyumwi no zyumwi asiyara mwi mpizo eyo kena mwayo amu kwiwira Nyambe mei Ntumero. ²¹ Nga kamuli vakana Nyambe aho ami kuwa? Mureke oku viraera kezo. Kono ati nemu wora o kuva avo va rukuruhite, muhinde yo nkaruro. ²² Kakuli yenshe ozyo nkauyiwa ku Nfumu nali mukana muntu wo Nfumu ozyo a rukuruhite. Munjira ifwana, ozyo kena mwi ntukuruho aho akuwirwa mwi ntumero mukana wa Kiresite. ²³ Nimwa wuliwa ke Nteko, kavulyaho mureke o kuva vakana va vantu. ²⁴ Vayawe, mu mayemo wonshe awo kena mwawo aho akuyiwa, mureke o muntu no muntu a asiyare ne Nyambe. ²⁵ Hanu ku amana niva tumware, ndaazya e ntaero izwa kwa Nyambe. Kono ndimiha ke ngazyaro yangu, eyo isepahara, keshemo cho Nfumu. ²⁶ Kavulyaho, ndibwene okutiye kevaka lyo vukavavu vukezya, mburotu ye o mukwame akare vuti akere. ²⁷ O sheshetwa kwa mukentu wako? Washa shaki shaki oku bbatuka. Ati waazya ku sheshete, o reke o ku shaka o mukentu. ²⁸ Kono ati no shesha, kono tendi echibbi, ati kamware na sheshwa, kanatendi e chibbi. Kono avo vashesha navara shangana no vukavavu ovungi bwe fasi, mi ndishaka o kumihaza kwezi. ²⁹ Kono echi checho ndita, vayawe: enako njifwihi. O kuzwa hanu, mureke avo vakwesi avakazi vahare shina vaazya. ³⁰ Avo valira vena nokutenda shina vaazya oku lira, navo va voterwa shina vaazya o kwina mwi mboterwa, navo va wura shina kwaazya echo vena necho, ³¹ navo vaverekisa efasi vareke okutenda shina bali varekisa koku manikiza. Kakuli efasi komo likalire shunu sheliya kuma maninikizo. ³² Ndishaka ye muve varukuruhite kwi mpiraero. O mukwame ozyo a zya o ku sheshete a viraera o kuamana ne zintu zo Nfumu, vuti awora o ku mutavisa. ³³ Kono ozyo asheshete a viraera oku amana ne zintu ze fasi, kovuti awora kutavisa mukazu wakwe - ³⁴ ali bbatwire. O mukentu ozyo a azya oku sheshetwa kapa kamware a viraera ke zintu zo Nfumu, kovutio awora oku likira ku mbali mu muvili no ruho. Kono o mukentu a sheshetwa a viraera ke zintu ze fasi, kovuti awora oku tavisa mukwame wakwe. ³⁵ Ndi amba kezi ko vurotu vo muwana mo, mi kali kuvika o vukavavu henu. Ndi amba ezi kezo zirukite, o kutiye mwaku livikite ku Nfumu noku azya echo chi mivinda. ³⁶ Kono ati no kwina ozyo a azyra ye azya kutenda kamware wakwe ke kute - ati sha hitilire e myka ya masheshwa mi kuve vulyaho - a votere oku tenda echo ashaka. Katendi e chibbi. Va votere oku shesha. ³⁷ Kono ati nazyimene koku gora mu mozyo wakwe, ati na azya oku hambilizwe kono nawora oku yendesa entakazo yakwe, mi ati na liketera mu mozyo wakwe oku tenda vulyaho, oku livikira ovu kamware bwakwe, atenda nenja. ³⁸ Mi ozyo ashesha kamware wakwe atenda nenja, mi ozyo ali ketera okusha shesha atenda nenja hawa. ³⁹ O mukentu a shiminwa kwa mukwame wakwe nashi hara, kono ati mukwame wakwe nafwa, a rukuruhite oku shesha yenshe ozyo a shaka, kono ka Nyambe vulyo. ⁴⁰ Kono ke ntakazo yangu awora okuva ne mboterwa nakara vulyaho. Mi ndi azyara o kutiye neme ndina no ruho rwa Nyambe.