¹ Hanu ke zilyo niza tenderwa echi tavero che zintu zoku vumbwa - tuzyi tukwesi enzivo. ''Enzivo ireta kulihinda hawa, kono erato lizyakisa. ² Ati zyumwi a azyara ye azyi echintu, zywina o muntu ashini kuzyiva komo a votere kuzyiva. ³ Kono ati zyumwi ashaka Nyambe, ozyo muntu ndeye azyiviwa kwakwe. ⁴ Cware vulyena, zokulya ezilyo niza tenderwa echitavero cha vazimu - Tuzyi ye ''echivumbwantu chaazya omo chikalire'' mi '' ye kwaazya Nyambe yenke vulyo.'' ⁵ Nanga ati kwakwina avo vakuwiwa vazimu, kuwiru kapa hanshi, shina aho kuzyire ''mizimu'' na vanfumu.'' ⁶ Kakuli kwetu, ''Kukere vulyo Nyambe yenke Shwetu, oko kuzwa zintu zonshe, mi ndeye tuhalira, mi Nfumu Jesu Kiresite, kakwe zonshe ezintu zihara, mi kakwe neswe tuhara. ⁷ Nanga kwakwina vulyaho, eyi nzivo yaazya kukere ku muntu yenshe. Kono vamwinya kare kava rapera a vazimu, mi kavalya ezi zilyo shina chintu nicha twarwa kuchitavero choku vumba. Omo va azyalira nikwa bbihira kakuli vaazya ku gorete. ⁸ Kono ezilyo kali nezi katu zyimanine kwa Nyambe. Twaazya ku fwililire ati katulyi, kapa kuva nenja ati tulya. ⁹ Kono mu mamere ye oku rukuruha kwenu kwashavi evaka lyokutiye o munini mwi ntumero agwe. ¹⁰ Tu teye zyumwi aku vone, ozyo akwesi enzivo, o lira ezilyo mwi tempere ye zivumbwantu. Vuvu kali mbu fokoli vukere mukulya ezo niza hewa ku vazimu? ¹¹ Kakuli oku shuwisisa hawa kwenu kuza vazimu, a vakata, o mukwetu ozyo na fwirwa kwa Kiresite, a zyonaukite. ¹² Kakuli, shinga shotenda ezibbi ku vakwako mi noku remeka a maikuto avo, ndi Kiresite otenda ezibbi kwakwe. ¹³ Kavulyaho, ati ezilyo zi retera o mukwako oku chunchura, kame kali nendilye enyama, o kutaye nandi reke kuretera o mukwangu okugwa.