¹ Ati zyumwi wenu nava no muzeko no zyumwi, ani awora o kuya ku murawo havuso bwava kava rukite kuhita o kuya havuso bwa vantu va Nyambe ava vachenete? ² Nga muzyi ye a vantu va Nyambe ava vachenete nivara atura efasi? Ati vulyaho, nemu atura efasi, mbuti kamuwoli oku atura otu tavaana? ³ Nga muzyi ye netura atura a mangiroyi? Mbuti ku woreseka, mpaho ye, katu atuli entava za vunu vuharo? ⁴ Ati namuha enkaturo zi yenderera no vuharo bwe zyuva ne zyuva, chinji aha mureta entava zi fwana nezi havuso bwava vaazya a mazyimo nenja mu nkereke? ⁵ Ndi amba chinu koku mi swavera. Mukati kenu haha mwaazya ozyu a talifite ozyu awora oku atura entava mukati ka vantu vazarwa hantu honke? ⁶ Kono omo ku kalire hanu, zyumwi wa vayenzenu aya ku nkunta kuku zekisa muyenze mwi ntumero, mi ezi zitwarwa havuso vo muatuli ozyo kazumini! ⁷ Evaka lyo kutaye ye muzuminzane zyumwi kwa zyumwi she mwina kare o murandu, chinji aha kamuzumini a mafosisa? Chinji aha muli zuminina oku homiwa? ⁸ Kono enwe nimwa foseza noku homa vamunya, mi mutenda ezi ku vayenzenu! ⁹ Kanti mwaazya kuzyi ye avabbi kali nava kajovore o muvuso wa Nyambe? Mwasha homiwa. Avashayi, ava varapera ezintu zoku vumba nizo kuvezya, ava barara niva muka vantu, ava vashayintika nava kwame vayenzavo kapa a vakentu na vakentu. ¹⁰ Avasa, avanyimi, ne zidakwa, niva kanyanso, nava vahominena vamwinya kwaazya kwavo ozyo na jovore o muvuso wa Nyambe. ¹¹ Mbovulyaho kavafwana vamwi venu. Kono nimwa sanziwa, nimwa cheneswa, nimwa vikiwa ava va rukite kezina lyo Nfumu Jesu Kiresite niko Muzya wa Nyambe wetu. ¹² Zonshe ezintu kwangu ziyenda ko murawo kono kali zintu zonshe zi voozera. Ezintu zonshe kwangu zi yenda ko murawo, kono kali nendi yendeswe kwa chimwi chazo. ¹³ Ezilyo nza vumo, mi ne vumo ndya zilyo, kono Nyambe nara zimanisa zonshe. O muvili kali niwa tenderwa o vushayi. Kunje yezo, muvili ngwa Nfumu mi Nfumu nara tenda ezi zishakiwa ku muvili. ¹⁴ Nyambe kame naa vusa o Nfumu mi kame nara tuvusa ke ngamu zakwe. ¹⁵ Haha kamuzyi ye emivili yenu nzirama za Kiresite? Ndiwora mpaho o kuzwisa ezirama za Kiresite nokuzi shanganya ku hure? Nuku reke kuva vulyaho! ¹⁶ Haha mwaazya kuzyi ye ozyu a shanganywa ne hure shanavi o muvili wonke nelyo? Shina aha liamba eñoro ye, ''Vovire nivara va enyama yonke.'' ¹⁷ Kono eye ozyo na shanganywa ku Nfumu ava o muzya wonke neye. ¹⁸ Muvutuke kuzwa kuzo vushayi! Chonshe echibbi chimwi atenda o muntu china kunje yo muvili wakwe, kono o muntu mushayi a tendesa o muvili wakwe ye mwina echibbi. ¹⁹ Haho mwaazya kuzyi ye emivili yenu nji tempere yo Ruho Ruchenete oro ruhara mukati kenu, oru mukwesi ruzwa kwa Nyambe? Kamuzyi ye kamuli munite muveni? ²⁰ Kakuli nimwa wuliwa ke nteko. Kavulyaho mutembe Nyambe ke mivili yenu no muzya, kakuli nza Nyambe.