¹ Nitwa shuwa e mbuzi ye kwina ovu shayi mukati kenu, ovu shayi ovo bwaazya kuzumininwa nava kava zumini: O mukwame ali hindira o mukentu u veshi. ² Muli hinda hawa! Kamwa kuvotere oku lira kanti? Ozyu natenda ezi avotere oku zwiswa mukati kenu. ³ Nanga ndaku azya mwi nyama, mu muzya nkondina. Shindahi kare e kanturo kozyo natendi eyi nkezo mani mbwe ku kandina. ⁴ Shinga shemu shangana kezina lya Nyambe wetu ndina nenwe mu muzya, mi engamu zo Nfumu Jesu nkuena, ⁵ mutware ozyu mukwame kwa Satani okutiye enyama isinywe, o kutiye o muzya wakwe nawu hazwe mwi zyuva lyo Nfumu. ⁶ Kulitunta kwenu kali nkurotu. Nga muzyi ye o mumeno o munini u zimbisa e chinkwa chonswe? ⁷ Mulichenese ku mumeno wa kare o kutiye muve e furawa enja, o kutiye muve e chinkwa chichena. Kwa Kiresite e mberere ye citavero, niya vikiwa ha chitavero. ⁸ Tulikore tuve ne mboterwa ye pobwe, kali ko mumeno wa kare, o mumeno o mubbi. Kono, tuvoterwa ne chinkwa cha azya o mumeno koku sepahara ne niti. ⁹ Nda miñoreli mwi ñoro lyenu o kutiye musha shangani na vantu a vashayi. ¹⁰ Kwaazya aha ninda toroka ye a vantu va fosahere velyinu e fasi, vasika tambiki, kapa ava vahira vamwinya, na vashayi, kakuli okuzwa kwavo muvotere o kuzwa mwelinu efasi. ¹¹ Kono hanu ndimi ñorela mwashali zwaki nava mukuwa ye mbakwenu. Kono ozyo a kara muvu shayi, kapa o mulyavi, ezi tenda zibbi, kapa o mushayi, nozyo arwisa ke ziyambo, nezi dakwa, nezi sinyi. Mwashalyi e zilyo na vantu. ¹² Mbuti ndina mweyi nkaturo yava vaazya kwina mwi nkereke? Kono, kavulyaho mwasha atuli bena vakere mwi nkereke? ¹³ Kono Nyambe a atura vena vakere hanje. ''Muzwise a vantu vabbi mukati kenu.''