Pasal 9

WALRI YEI PEKOTE BAITE SUKUMBUKO NEPELRE MENDAINA DETELROTE POYE MEKOMBUKO

1 Nepe, ei bulrate sekaipeko, Walri Yei nenei yo budisunasute yowe. 2 Nepelre, teyowe, mendaina detelro ku awlra bulrane tenoyowenate. Doukainyelre yaye nemenakaye nena telrepelrete temupuko, Walri Yei mendaina detelrote saneyounu, "Wei wena kenate dusungkonde, delrei Yei, wena peko nepete baite sukumbukalre." 3 Nemenakaye, mendona-mendona detelro si nenei kenabulrune elriyaye, "Da detelro apekote elrewe !" 4 Nemaneye, Yesus nena mendote nepe nimeyumupuko, Ne saneyoumu, "Beyamanepote mendo pekote wei kena bulrune mekauwe? 5 Beyamane apoite santeweponde, 'Wena pekote baite sukumbukalre,' mbai, 'Esuemime nepelre oto te ewe' ? 6 Netenate, we nimeyenembombena da yo bulrana Walri Yei kena delre te detelro kena pekote baite sukunemlre." Nepelrenaye, Yesus mendaina detelrote saneyoumu, “E'su e'mime wei ku aulrate e'lretune, nepelre dite miete ewe!" 7 Nemenakaye, ne e'suemike nepelre diteyouwe. 8 Nepelre, detelro dopelre nena kembalri mekopukonate tiyainye, kembengte bitiyaye, nepelre Mang Walrite kapiyainye. Nena kembalri delre detelro kena nelrone mekopuko.

MATIUS PAJAK KOPLRIYONUNA WALRI YEI TE TAKUNULRE

9 Nemenakaye Yesus nepelre dite yowe, Ne teyowe Matius pelre simimbukona detelro pajak kopriyonuna nowne nekeyowe. Nemenakaye, Yesus nete saneyoumu, “De te tawutulre.” Nepelre, Matius e'suemukunakaye Yesus te takunulre. 10 Ne suselrei Walri Yei nekeyowe sate ne miye'ne aneyowe, teyowe, pajak plre kopiranyena detelro nepelre peko pelre mekayena detelro miyaye, nepene nikiyaye sate Walri Yei pelre Nenei ototouna pelre sate nembeiye aniyaye. 11 Nemenakaye, Farisi detelro kembalri mekoyowenate tiyanye, Nena ototounate smiyame, beyamenapotenate wena kilri-kilri pelre kilrimuna detelro, "Nepelre detelro peko pelre mekayena detelro, pajak plre kopilranyena detelro sate nembeiye aniyaye?" 12 Neplrenakaye, Yesus nena ate betopuko, nete saneyoumu, "Sa mekoipanya detelro tabib tena duweipai, sa mekaimena detelro tabib tena duweiye. 13 Netenate, embe nepelre poye olronembombe, 'De poite mekombenate kenate danalre, doitena ambai,' netenate demiyalrena detelro poitena simipai, Depe detelro peko te mekoyaina detelro kote miyalre.
Kwalri Tenate Simiyanye
14 Nepelrenakaye, Yohanis kena ototouna Yesus kote miyayenakaye simiyanye, “Beyamenapote dembelre Farisi detelro pelre kwalrite mekande, nepelre Wena ototouna kwalri tena nikipai?” 15 Nemenakaye, Yesus nete saniyoumu, "Beyayang do nembelre nembe'ye nekayena, baynyang te taukanelre miyayenayo kena sete tuwayanye? Nepelrena, neya dounenelre mendena bainyang dote nenalre baite dounainelre, nepelrenakaye ne kwalrite nekenaye." 16 Detelro mayong sumu baite besaipekona, mayon nemetena senaiponde, nemane mekonaiponde, mayong nemetena tikeinaimbondena, mayong sumute baite besembonde, nepelre besaipekona nou delre dumbonde. 17 Nemandlrati, detelromanipana anggur yansina tangke ye'itena dilripainya. Nemane mekonaipondena, anggur tangke tiye'naiponde, anggur tangke pelre pe'ko dunaiponde. Nepelre, ne anggur manimpana pelre manimpa tangke pelre semate bebenamane poineneiye."
YESUS DEYEMBUKO NEPELRE PIYE MEKOMBUKO
18 Yesus nekalrote nete saneyoumu, tenembe, detelro mbei ongko miyene belrengkate nekewena meyowe, nepelre Nete yengkengte dusunkuko, nepelre saneyounu, “Dena yei milre manimba tetepuko. Netenate, mewe wena mete Nena eubulrane kelroubonde nepelre ne deyembonde." 19 Nemenakaye, Yesus esuemike nena oto touna pelre nete tau keinalre yaiye, nepelre Nena ototouna lati. 20 Nepelre, tenembe, milre mbei mai mebe bepelre sanikite mekoyouwena Yesus kena e'utoute metosulre youwe, nepelre Nena mayon tute meye kelrouku, 21 neplre ne milre nenei eute sayounu, “De Nena mayong tumote kelroutelrena, de nepe poi duteponde.” 22 Yesus belrusuku ne milre te teyounu, saneyounu, "Wena kenate suwembone, we delrei Yei, wei telrepelre, wete poiye mekonewpune." Ne suselrei dlrati, ne milre poiye dupuko. 23 Nepelrenkaye Yesus walri ongko belrengka kena miete yowe seruling pelre mapiyayena detelro tenoyouwena pelre nena palrimena pelre boyowe, 24 Ne elriyowe dite ewe, "Ne yei milre titipai, neme'ye kute tenowe." Nepelre, ne Yesus deye diyaineng. 25 Nepelre, detelro doplre'te se'kemupuko diyasute miyaye, Yesus esute yowe, nepelre, neyei kena mete kelroukku, neplrenakaye ne yei milre esuemike. 26 Ne a dusupuko yote-yote walriyowe.
Douw Bisena Do Bete Poi Mekopuko
27 Yesus nepelre dite yowe, douw bisena do be nete tau keinyalre alra seiyoye, ''Daud Nuwei, detena kena bis'e dine." 28 Ne pe Ne miyete esute yowe, douw bise'na detlro beserei nekote miyoye, nete simiyopu, "De damena kembalri te mekalrena we trepelretena mekauwe?" Ne, Nete saniyanye, "Ya, Tuhan!" 29 Neplrenakaye, Yesus nena dow bulrane mete kelroupuko, nete saniyope, "Byamena tu kilrindena mekondena nena wena tlreplre b'ulra mone nekepe." 30 Nemenakaye, nena dow nepe pekikuko. Yesus nete aseklre te tayopu, “Doute poiye tenepe tembe, da kembalri mekopukalrena detelrosi bete nimeipai." 31 Nemaneye, ne diyate yaye nepelre Yesus kena ate meterna yote saniyayme.
YESUS ATUNA DETELROTE POI MEKONBUKO
32 Ne dobe diyate miyoye, tiyoye, atuna detelro alru peko-peko kelrokunulrunate Yesus kote miyaye. 33 Nepe alru peko-peko sekembuko, ne detelro atuna nepe ate elreyowe. Detelro doplre kembeng te bitiyaye, "Nakaye elriyaye Israel na da kembalri bete pelrena itipai nikiyande." 34 Nepelre, Farisi detetro te elriyaye, "Alru peko kena delre polre ne alru peko baite se'keyoumu."
EUTE DUNAYENA DOPELRE, KEMBALRITE DETELRO SEREIBETE
35 Nepelre, Yesus yolre-yolre walreyowe, Nena sinagoge-sinagoge miyena nete kilriyomu nepelre Asena Walri saneyomu Injil Kerajaan, e'metelre sa nate sangkemelre miyowe. 36 Yesus ne detelro doplrete teyomuna, Nena kena bise nete tiyome Sema detelro ambainya mane. 37 Nepelre Ne nenei ototounate sameyomu, “Telrepelretelre, eute dunayena, dopelre nena kembalrite detelro selreibete.” 38 Netenate, Walri te diyinembe, Ne nenei emi detelro, kembalri detelrote sanenemponde menaye emina sate olrunaiye."