¹ Pa mwesi ughwa Nisani, mumwaka ughwa vijigho fivili mu vutwa vwa Alatashasta, akalondagha kunyua idivai, nihitoola idifai nikampela untwa. Na nilyaghelile kusunala mulumonga pa maaso ghake. ² Pepano untwa akambula akati, "Kiki ghuvoneka pamaaso usukunile? Naghuvoneka kuuti ulintamu. Luvoneka uli na lumonga mumwojo." Mu uluo nikoghopa kyongo.

³ Nikamwamula nikati, "Ghukalaghe jaatu! Lwakiiki nileke kuuva nu lusukunalo? Pano nilola ilikaaja, nasimbiipa sava nhata vango finangike nagha malyango ghaake ghanyanyilue nu mwoto."

⁴ Pepano Untwa akamosya akati, "Ghulonda nikuvombele kiiki?" Apuo nikansuma Unguluve ughwa kukyanya. ⁵ Nikamwamula untwa nikati, "Ghwe Ntwa nave ukeliile napano nivomba inofu pamaaso ghaako, unoghiile kukusung'ha ku Yuda, mulikaaja pano pwesili imbiipa sava nhata vaango, kuuti nilute unjenge vunono kange."

⁶ Untwa akanyamula akati (valikalile palikimo najumalikiya), "Ndepoonu ghuuva nifighono filingi kuhanga ghugomoka?" Untwa akakeela akatanavula najuune nikambula unsiki ughwa kukala.

⁷ Pepano nikam'bula nikati, "Nave lunoghiile kwa ntwa, amhele ikalata ja kuhufia kuvavaha vano valimwambo ja kikogha, kuuti vanavule nighende mukighavo kyave kuhanga nifike ku Yuda. ⁸ Kange pejiive ikalata ja Asafu, umuloleeli ghwa nsitu ghwa ntwa, kuuti amhele amapiki gha kutendela amalyango gha lilinga, pipi ni nyumba imbaha ija kufunyila nu luvigho lya likaja ni nyumba jango ija Kukala." Ulwakuva uluvoka lwa Nguluve lukava nuune, untwa akamhela uvufumbwe vwango.

⁹ Pe nikfika kuvavaha kumwambo ja kikogha nikavapeela ikalata ja ntwa. Untwa akasung'ha avavaha vava sikali navano vangalile ifalasi palikimo nuune.

¹⁰ U Sanibalati uMuholoni nu Tobia um'bombi ghwa Amoni vakati vapulike imola iji, navalya hovwike ulwakuva isile umhuunu ainya kuvatanga avaanhu va Isilaheli.

¹¹ Pepano, nikagomoka ku Yelusalemu, nikava ukuo ifighono vitatu. ¹² Nikasisimuka pakilo, palikimo na vanhu vadebe pa likimo nuune. Nanilyam'bulile nambe jumonga kino Unguluve alyavikile mumwoja ghwango vwimila ikya kuvomba ku Yelusalemu. Na kyejaale ifalasi ijingi looli jijino nalyangalile une.

¹³ Nikavuka pakilo kukilila isila ja mulyango ughwa kuluvonde kuluta kukkisima/kitimu kya njoka nu mulyango kuno vikung'ha amakakala, na kulingula imbimba sa Yelusalemu, sino sighwile na malyango ghanyanyilwe nu mwoto. ¹⁴ Pepane nikaluta kumulyango ghwa kisima kya Ntwa. Uvwelefu vukava vufinye kyongo na ji falasi najinoghile kukila. ¹⁵ Pe nikaluta ikilo ijio nighenda mieluvonde mulubale nilingula uluvumba, nikagomoka kunsana na kukwingila umwilango ughwa kuluvonde, fyenikagomoka. ¹⁶ Avalongosi navakakagula kuno nilutile nambe ikinu kino nivombile, nanilyavavulile Avayahudi, nambe avatekesi nambe avavaha, avalongosi nambe avange vano valyavombile imbombo ijio.

¹⁷ Nikavavuula nikati, "Mulolile uvukumue vuno tulinavuo, vule i Yelusalemu jinangike, na malyango ghake ghapile nu mwoto. Lino mwise tujenge vunono uluvumba lya Yelusalemu, kuuti tuleke kuuva ni soni kange." ¹⁸ Nikavavuula nikati uluvoko ulya Nguluve lukale palikimo nune naghamasio gha ntwa ghano alyambulile. Aveene vakati, "Lino tuvuke tukajenge." Pepene vakakangasia amavoko ghave vwimila imbombo inofu.

¹⁹ Neke uSanibalati Muholoni, nu Tobia um'bombi ghwake Mwamoni, nu Geshemu, u Mwalabu, vakati vapulike imhola ijio valyatusekile na pikutuligha; vakati, "Vapulike imhola ijio valyatusekile na pikutuligha vakati, "Ghuvomba kiiki? Kwekuti ghulua nu ntwa?"

²⁰ Penikavamula nikati, "Unguluve ughwa kukyanya ikutupeela uvuvombi uswe tulivavombi vaake tuluta kujenga. Neke umwe musila lighavo nambe uvwakyang'hani, nambe uvukumbufu vwimila ilikaaja lya Yelusalemu."