¹ Imhola ja Nehemia u mwana ghwa Hakalia Jiiti, mu mwaka ughwa vijigho fivili, u mwesi ghwa Kisleu, nikava mulikaaja ilivaha likatambulwagha Shushani, ² umhunu jumonga mu vanyalukolo vaango akatambulwagha Hanani, akiisa na palikimo na vanhu avange kuhuma ku Yuda, une nikivaposya mulwa va Yahudi vano vakulwike na vano vasighile ukwo ni mhola ja likaaja ilya Yerusalemu.

³ Vakambuula vakati, "Avayahudi vano valimu mkighavo kila vakakulwike mundinde valimuvukunwe uvuvaha ni soni, ulwakuva uvujengo vya Yerusalemu vughwile na gha malyango ghake ghipile nu mwoto."

⁴ Nakalingi ye nipulike amasio aghwo, nikikala nilila nikasukunala ifighono nafilingi, pe nikisigha pilya mu lwa kufunya pa maaso gha Unguluve ughwa kukyanya. ⁵ Pe pano nikasuma nikati, "Uve veeve Mutwa, Nguluve ghwa kukyanya, Nguluve ghwe m'baha ghwa kudegha, uve mukululeka ponu ulifingo nu lusungu lyako, kuvano vikagadilila indaghilo sako. ⁶ Pulika inyifunyo sango, udindule amaaso ghako, neke upulike ulufunyo lya m'bombi ghwako kuuti lino nikufunya pamaaso ghako, pamwisi na pakilo vwimila avavombi vaako, avaanhu va Isilaheli. Lino nilaata inyivi sa vaana Isilaheli sino tuvombile kulyuve. Twe palikimu nuune na vaana Israeli tuvombile inyivi. ⁷ Tuvombile imbivi kyongo kulyuve Mutwa, nambe kuvikila mwojo indaghilo sako ni mbulanisio sino ulyamlaghile u Mose um'bombi ghwako.

⁸ Sivuo kumbuka ilisio lino ulyamlaghile uMose, 'om'bombi ghwako kuuti, nave mungavombe kisila kufingilila nikuvapalasania muve mufisini ifinge, ⁹ looli nave mungagomoke kulyune, nakuvingilila indaghilo sango na kuvomba ndavule sivulanisia, nambe pano avanhu vaako valyapalasine kuluta kuvutali, une mkuvakong'ania kuhuma ukuo neke nikuvaleta pavuvo pano ulyasalwile kukulimika ilitavua lyango.'

¹⁰ Lino aveene vavombi vaako, kange vanhu vaako vano ulyavapokile mungufu saako imbaha nu luvoko lwako ulunyangufu. ¹¹ Ghwe Mutwa, lino nisuma upulike inyifunyo sa m'bombi ghwako nu lufunyo lya vavombi vaako vano vikeela kughinia ilitavua lyako. Lino nisuuma unhange umusyughu ne m'bombi ghwaho neke umhele kusaghilya pa maaso gha munhu uju." Ulwakuva nene nikampelagha ifyakunywa untwa.