¹ Pepano u Eliashibu, untekesi umbaha akiima palikimo na vanyalukolo vaake avatekesi, vakajenga umulyango ghwa ng'holo. Vakavalasia na kuviika amalyango ghake vakimika kuhanga ikimilo kya Halumea mpaka ikimilo kya Hananeli. ² Yevamalile avuo avanhu va Yeliko vakajenga, u Zakuli umwana ghwa imuli akajenga.

³ Avaana va Senaa voope vakajenga umulyango ghwa samaki. Vakaviika amiimo na malyango ghako na fifyuma ni komelo sake. ⁴ U Melemoti ghwope akaling'hania akajenga ulubale ulunge. Umwene ujuo ghwe mwana ghwa Ulia mwana ghwa Hakosi. Naju Mesulamu ghwope akatenda ghwe mwana ghwa Belekia, mwana ghwa Mesesabeli. Gwope uSadoki akajenga ujuo. Ghwe mwana ghwa Baana. ⁵ Avatekoi voope vakajenga avalongosi vaave valyakanile kuvomba imbombo jio valyalaghilwe na vavaha vaave.

⁶ U Yehodaya umwana ghwa Pasea, nu Mesulamu umwana ghwa Besodeya, valyatendile umulyango Unkuulu. Vakaviika amiimo na kuviika amalyango ghake na fifyuma fyake ni komelo sake. ⁷ Voope, uMelatia umuGibioni nu Yadoni Melenoti, avaanhu va Gibioni na va Misipa, vakavomba pinosia pano akikalagha um'baha ghwa kighavo kya mwambo ja kikogha. ⁸ Pambele u Usieli u-mwana ghwa Harhaya, jumonga muvatenda sahabu, ghwope akatenda, naju Hanania, untenda amafuta amanofu. Valaajenga kange i Yelusalemu uluvumba ulwelefu. ⁹ Pihuma apuo ghwope uRefaya umwana ghwa Huli akajenga. Alyale m'baha ghwa kighavo ikidebe kya Yelusalemu. ¹⁰ Naju Yedaya umwana ghwa Halumafu akajenga piipi ni nyumba jaake. Ghwope u Hatushi umwana ghwa Hashabneya akajenga. ¹¹ U Malikiya umwana ghwa Harimu nu Hashubu umwana ghwa Pahat Moabu, wakajenga ulubale ulunge vakajenga ikimilo kya mbembelo. ¹² Ye vajengile avuo, u Shalumu umwana ghwa Haloheshi um'baha ghwa kighovo ikidebe kya Yelusalemu, akajenga palikimo na valive.

¹³ U Hanuni palikimo na vano vakikalagha pa Zanoa vakajenga umulyango ghwa kuluvoonde. Kange vakajenga nakuviika amalyango ghaake. Na fifyuma fyake ni komelo sake.

¹⁴ U Malikiya, umwana ghwa Rekabu, um'baha ghwa ikighavo ikidebe ikya Beth - Hakelemu, akajenga umulyango ghuno vikung'ha amakakala. Akajenga na kuviika amalyango ghake na fifyuma fyake na sikomelo sake.

¹⁵ Ghwope u Shalumu umwana ghwa Kolihoze, um'baha ghwa kighavo ikidebe kya Mispa, akajenga umulyango ghwa kindwivu akajenga na kuviika ikya kukupika pakyanya na kuviika amalyango ghaake ni fyuma fyake ni komelo saake. Akajenga vupia uluvumba ulwa lwa Sillowamu mu akaghunda akadebe aka ntwa ku mpaka kuntandalilo gwa kulongosya kuhuma mulikaaja lya Davidi. ¹⁶ Naju Nehemia umwana ghwa Azbuki, umulongosi ghwa ikighavo ikidebe ikya Beti-suli, akajenga kutengapuo pa mbiipa sa Davidi mpaka kukisima kino kilyajengilwe na vanhu, ni nyumba ja vanhu vano vali ni ngufu.

¹⁷ Kuhuma apuo, Avalevi vakajenga palikimo nu Rehumi umwana ghwa Bani pambele, u Hasabia, juno alyatemile ikighavo ikidebe ikya Keila, kwa wilaya yake. ¹⁸ Pambele avanhu va iisi jave voope vakajenga palikimo nu Binui umwana ghwa Henadadi, um'baha ghwa kighavo ikidebe ikya Keila. ¹⁹ Pambele akajenga u Ezeli, umwana ghwa Yeshua, untwa ghwa Misipa, alyajengile ulubale ulunge kuluta kukihenge kwa kuviika ifilwilo ku uguto ja luvumba. ²⁰ Pambele uBaluki, umwana ghwa Sakai, muvughane vwake akajenga ulubale ulunge, kuhuma inguto ja luvumba mpaka kumulyango ghwa nyumba ja Eliashibu, untekesi um'baha. ²¹ Pambele u Melemoti umwana ghwa Ulia, umwana ghwa Hakosi akajenga ulubale ulunge, kuhuma umulyangu gha nyumba ja Eliashibu mpaka pavusililo vwa nyumba ja Eliashibu.

²² Pe pambele avatekesi na vanhu va mbale ijio piipi ni Yelusalemu, vakajenga. ²³ Pambele u Benyamini na Hashubu vakajenga kuluta kunyumba jaave. Kuhuma avuo uAzalia umwana ghwa Maaseya, umwana ghwa Anania, akajenga piipi ni nyumba jaake. ²⁴ Pihuma avuo u Binui umwana Henadadi akajenga ulubale ulunge, kuhuma inyumba ja Azalia mpaka inguto ja luvumba. ²⁵ U Palali umwana ghwa Usai, akajenga pakyanya panguto ja luvumba ni kimilo kino kilipyakyanya kuhuma kunyumba ija kukyanya ija ntwa pano vikukala avaloleeli. Kuhuma avuo u Pedaya umwana ghwa Paloshi akajenga. ²⁶ Lino avavombi va inyumba imbaha ijakufunyila vano valikalile Ofeli vwalyajengile mpaka ulubale lwa mulyango ghwa malenga, imbale ja kuvuhumo wa kimilo ikitali. ²⁷ Pihuma apuo, Avatekoi vakajenga ulubave ulunge kuluta kukimilo ikivaha kino kilikunji mpaka kuluvumba lya Ofeli.

²⁸ Avatekesi voope vakajenga kukyanya ku mulyango ughwa falasi, kila ntekesi ulubale lwa nyumba jaake. ²⁹ Kuhuma avuo, uSadoki, umwana ghwa Imeli, akajenga ulubale ulwa kunyumba jaake. Kuhuma kwa ujuo ghwope Semaya umwana ghwa Sekania, juno alyale muloleeli ghwa mulyango ughwa kuvuhumo, akajenga. ³⁰ Kuhuma kwa ujuo, u Hanania, umwana ghwa Selemia, nu Hanuni, umwana ghwa ntanda Salafu, vakajenga ulubale ulunge. U Mesulamu umwana ghwa Belekia akajenga kuluta kufyumba fyake. ³¹ Kuhuma kwa ujuo u Malikiya, jumo muvatenda isahabu akajenga na jinyumba ja vavombi va nyumba ja kufunyila, na vano vighusia ifya kughula vano vaale valipiipi nu mulyango ghwa mundinde mpaka kufyumba ifya kulubale. ³² Voope avaghusia sahabu na va ghusia ifinu ifinge vakajenga ikyumba ikya kukyanya ikya panguto nu mulyango ghwa ng'holo.