¹ Murhakagitwa olwabe, lyo ninyu murh'ishigilutwirwa. ² Oku mwanatwe oluli omu mwabene, kwo naninyu mwalutwirwe. ³ Carhuma wadokola ehyasi hiri okw'isu ly'owinyu, orhanabwini enduluma eri omu lyaw'isu? ⁴ Erhi gurhi wakabwir'owinyu, oku aleke omudokole ehyasi himuli okw'isu, w'enduluma eri omu lyawe? ⁵ Eyi ndyalya, orhengirhenza enduluma eri omu lyaw'isu, na ntyo lyo wahashibona ehyasi hiri okw'isu lya mwene winyu.

⁶ Murhakagiha orhubwa ebiryo bicîre, murhanakweba enjuma zinyu embere z'engulube, zirekilabarha, na gani zimuhindukira.

⁷ Muhune, mwahabwa; mulongereze; mwayishibona, mukomombe, mwanishi yigulirwa. ⁸ Bulya ngasi ohûna anahabwe, n'olongereza anarhole, n'okomomba okulunvi anayigulirwe.

⁹ Ndi mulimwe oha omwanawag'ibuye, erhi akamuhuna omugati? ¹⁰ Erhi nka akamuhun'ensamaki, k'anamuha omujoka? ¹¹ Lero, mwe bagalugalu, muyîshiha abana binyu ebintu binja, manga sho oli omumpingu alimwinja kulusha, n'okuhana ebintu binja okubamuhuna.

¹² Ngasi byoshi mwalonze abantu bamujirire, mubire kuli bonabo, bulya lyoli'irhegeko n'obulebi.

¹³ Mugerere omu muhango mufunda, buly'omuhango mugali guna shanjusire erinjira ehêka ebwa kuhéra, na banji bayigerera mwo. ¹⁴ Ci omuhango mufunda n'enjir'enfundîre yo ehéka ebwa buzine, na bagerwa bayibona.

¹⁵ Mucilange n'amalebi g'obunywesi, bakamuyishira n'enyambalo ye bibuzi, n'omundalala eri mirunga. ¹⁶ Mubamanyire oku bijiro byabo karhwanahumba amalehe okumishugi? Erhi enyungu oku ntandagule? ¹⁷ Ngasi murhi mwinja malehe minja gulehêka, ci omurhi mubi malehe mabi gulehêka. ¹⁸ Omurhi mwinja gurhankaleheka amalehe mabi, n'omubi gurhakaleka amalehe minja. ¹⁹ Ngasi murhi gurhayana malehe minja gunatubwe gukwebwe n'omu muliro. ²⁰ Mwayishibamanyir'okubijiro byabo.

²¹ Arhali ngasi boshi banyakuza: mpu larha, larha! Banâjè omu bwami bw'empingu, ci olya ojira obulonza bwa larha oli omumpingu. ²² Banji bayishire Aida olwo lusiku: nnahamwirhu, nnahamwirhu, karhurhakagileb'okwizino lyawe? Karhurhakagihinva abazimu okw'izino lyawe? Karhurhanakagijira ebisomerine binji okw'izino lyawe? ²³ Lero nayishi babwira n'obwalagale: ntaco mumanyaga, ntengiho, mwe nkozi z'amabî.

²⁴ Co cirhumire ngasi yeshi mwanayunve emyanzi ndesire anayishimbe, ayishishushanyibwa n'omuntu mwirhonzi, wayubakiraga enyumpa yage okwibuye. ²⁵ Enkuba erhinia, olubula lwayisha, empusi yahusâ byashurha erya nyumpa: erhahirimaga bulya yalinyubakire okw'ibuye. ²⁶ Ci owayumva emyanzi ndesire arhanayishimbe ashushanyibwe n'omusire wayubakiraga enyumpa yage okumushenyi. ²⁷ Enkuba yania, olubula lwayisha, empusi yahusâ yanashurha eyo nyumpa: yanahirima n'okuhirima kwayo kwaba kunene.

²⁸ Erhi yezu ayusiderha eyo myanzi, olubaga lwa hya n'ezo nyigirizo; ²⁹ bulya akagiyigiriza nk'ogwerhe obuhashe, carhali nka abagiriza babo.