¹ Erhi Yesu ayandagala oku ntondo, olubaga lwinji lwa mukulikira. ² Habaga mubenzi muguma, amuyegera amusengera, aderha: Nnahamwirhu, nk'okulonzize, wananjira ncè.

³ Yesu alambula okuboko, amuhumakwo, anamubwira: nonzize ocè. Honaho ebibenzi byage byayuma. ⁴ Yesu amubwira: ocilange orhabwire ndi yeshiyeshi; cikwone ogende ociyerekane emw'abadahwa, onahane enterekero erya Musa arhegekaga, lyo ebyo buba buhamiriza bwawe emunda bali.

⁵ Ntyo Yesu anaja omu kapernaumu, omukulu w'abasirika amuyishira, ⁶ amusengera anaciderha: Nnahamwirhu, omukozi wani agweshire omu nyumpa, ahozire ebirumbu analibwire bwenene.

⁷ Yesu amubwira: nayisha nayishi mufumya.

⁸ Omukulu w'abasirika amushuza: Nnahamwirhu, ntashinganini oje omumwani, ci oderhe kwone cinwa ciguma, n'omukozi wani afuma. ⁹ Bulya, nkenzire abakulu, nani ngwerhe abani basirika ntegeka; nambwire muguma: genda! Anagende; n'owundi: Yisha! Anayishe; n'omukozi wani: jira kulebe! Anakujire.

¹⁰ Erhi aba amamuyunva, Yesu asomerwa, anabwira abalimushimbulire: Mmubwizire okunali, ciru omu Israeli ntabonaga mwo obuyemere bunene nkobu. ¹¹ Cikwone, Mmubwizire oku banji bayishi rhenga ebushoshokero bw'izuba n'emunda lizikira, n'okulya haguma n'Abrahamu, Isaki, na Yakobo omu bwami bw'empingu. ¹² Cikwone abana b'obwami bayishi kabulirwa omu mwizizi gw'embuga, bayishi kalaka n'oku kugurh'amino. ¹³ Buzinda Yezu abwira omukulu wabasirika: gendaga, bikubere nk'okw'obwemere bwawe bunali. Konako kasangi omukozi anafuma.

¹⁴ Yesu anashubi gera omu mwa Petro, ashimana nazala agweshire, erhi agwerhwe n'ishushira. ¹⁵ Amuhuma oku kuboko, ishushira lyamurhengakwo; azuka, abakolera.

¹⁶ Bijingo, balerha hofi na Yezu banji baliko abazimu. Ahinva abazimu oku Kanwa Kate, afumya n'abandi balwala boshi, ¹⁷ lyo bihikirira abyaderhagwa n'Isaya, mulebi, abarhula n'endwala zirhu.

¹⁸ Yesu anacibona lubaga lwinji lukola lumuzungulusire, arhegeka oku bagereraga erind'ishiriza. ¹⁹ Mwandisi muguma amuyegera, anamubwira: nakushimba ngasi hoshi wanaja.

²⁰ Yesu amushuza: banyambwe bajira enyala, n'orhunyunyi rhw'emalunga rhugwerhe enyogo; ci omwana w'omuntu arhagwerhi ahakaheba irhwe lyage.

²¹ Wundi muguma omu baganda bage, amubwira: Nnahamwirhu, onyemerere ntengi jibisha larha.

²² Cikwoki Yezu amushuza: nshimba, oleke abafu babishe abafu babo.

²³ Ashonera omu bwarho, n'abaganda bage bamushimba. ²⁴ Ala, hanacizuka omunyanja akalaba kanene kuhika obwarho bwalonz'okulohoma. Naye, alihunire. ²⁵ Abaganda bamuyegera bamutula, baderha: orhucize rhwamafa!

²⁶ Ababwira: bici birhumire muyobohire mwe Bantu b'obuyemere butya? Anazuka, akalihira empusi n'enyanja, n'omurhula munene gwanabà.

²⁷ Abantu basomerwa: yendi you wani, kwobakaziriderha, owakengwa ciru n'empusi n'enyanja?

²⁸ Erhi aba akolali erind'ishiriza, omu cihugo c'abagerasi, Bantu babiri balimwo abazimu, barhenga ebwa byusho, bamuja emalanga. Bali bakali bwenene ntaye wankacigezire eyo munda. ²⁹ Lola, bana yakuza: bici rhwe nanawe? K'oyishire eno mpu orhulibuze n'akasanzi karhacihika?

³⁰ Aho, hali obuso bw'engulibe bwali buyabusire.

³¹ Abazimu basengera Yezu, baderha: nkaba orhuhinvire, orhurhumage omwobu buso bw'engulube.

³² Ababwira: gendi! Banarhenga banaja omw'obwo buso. Lolaga, obwo buso bwana libirhira oku mala bwarhogera omu nyanja, bwana mirirwa n'amishi. ³³ Abaliyabwire banalibirha bayaka, baja omu lugo bajayalagaza byoshi bya gezire na gurhi byabire oku balya balimwo abazimu. ³⁴ Ntyo olugo lwoshi bagenda bajiringa Yezu; na, Erhi bamubona, bamuyinginga mpu arhenge emwabo.