¹ Mucilange n'okuyerekana obwindja bwinyu embere z'abantu, mpu lyo bamubona; okubundi murhakacihabwa ulehembo n'asho winyu w'embingu. ² Amango wahana enterekero, orhajag'aband'omushekera nkakula endyalya zijira omu bishagala n'oku mirimbwa, mpu lyo bakuzibwa n'abantu. Okunali mmulibwire oku mira baya nkiriraga oluhembo lwabo. ³ Cikwone nkawahana entulo, okuboko lwawe kwelumosho kurhamanye ebi okulyo kwawe kwajira, ⁴ lyo entulo yawe ejirwa okw'ihwe; na sho wawe, abona okw'ihwe, ayishi kugalulira.

⁵ Amango mwashenga, murhayorhaga nka ndyalya, zinakasima okushenga bwimanga omu bishagala n'omu mirimbwa, mpu lyo babonwa n'abantu. Mmubwizire okunali, oku mira bahabirwe oluhembo lwabo. ⁶ Cikwone nkamwashenga, onaje omu mwawe, oyigale olunvi, oshenge emwasho âli ahantu hihwe, na sho wawe, obon'ishwe; anakugalulira. ⁷ Omu kushenga murhaderhaga myanzi minji minji, nka bapagani, bobacikebwa mpu omukuluz'emyanzi bayunvibwa. ⁸ Murhashushane n'abo; bulya sho winyu amanyire ebimulagirire kwo, cirw'akaba murhacishengà.

⁹ Alagi okumukwanine oku shenga: larha wirhu oli omu mpingu! Izino lyawa likuzibwe; ¹⁰ obwami bwawe buyishage; okuw'alonza kube en'igulu nk'omu mpingu. ¹² Orhubabalire n'ébyaha birhu, nkoku nirhu rhubabalira aba rhujirira kubi; ¹³ Orharhulekaga rhwahirimira omu mashumi mabi, cikwone orhulikuze kuli olya mubi. Bulya wen'obwami, n'obuhashe, n'obukuze, emyka n'emyaka. Bibe ntyo.

¹⁴ Nka mwankababalira abantu amahushe gabo, sho wenyanya naye anaishi mubabalira ninyu. ¹⁵ Cikwone nawe nkaba orhababalira abantu, na sho naye arhakababalira ciru n'ehitya.

¹⁶ Amango mwacishalisa, garhabaga mango ga burhe, nka ndyalya, banacihindule amalanga gazinzibire, lyo balangûla abantu okubacishalisizé. Mmubwizire okunali, bahabirwe oluhembo lwabo omukujira ntyo. ¹⁷ Cikwone nkawacishalisa, anashîge irhwe lyawe, ashuke n'amalanga gawe, ¹⁸ lyolekiyerak'abantu okuc'ishalisizé, cikwone sho oliho okw'ihwe, na sho, abona okw'ihwe, akugalira.

¹⁹ Murhacijiraga omuhako omw'igulu, mwo enshwa n'engishi zayishishereza, na mwo ebishambo bya yishiba binazimbwe. ²⁰ Cikwone murhumbike emihako yinyu omu mpingu, mwo enshwa n'engishi zirhashereza, mwo n'ebishambo birhakadaha n'okuzimba. ²¹ Bulya aha omuhako bwawe guli, ho n'omurhima gwawe gwanàbé.

²² Isu ly'itra ly'omubiri, isu lyawe nkaliri linja, omubiri gwawe gwoshi gwanaba n'obulangale. ²³ Cikwone nk'isu lyawe lirhali lindja, n'omubiri gwawe gwoshi gwanaba omu mwizimya. Akaba obulangale bwawe bwakaba mwizimya, lugero luci ogw'omwizimya gwa nkaba munene!

²⁴ Ntaye wakakolera bami babiri, bulya anashomba, muguma, azigire owundi, kandi erhi acishwekere oku muguma, anaganyaguse owundi. Murhankakolera nnamahanga n'ebirugu.

²⁵ Co cirhumire mmubwizire: murhakagi derha oku kalamo kinyu mpu bici mwalya, erhi oku mubiri gwinyu, mpu bici mwa yambala, ka akalamo arhali kokakulu oku biryo, n'omubiri gw'omukulu kulush'omwambalo? ²⁶ Sinzagi orhunyunyi rhw'emalunga: rhurharhwera, rhurhanasarula, rhurhahaka bici omunguli, na sho winyu w'empingu anarhulise, karhali mwe bakulu kumusha rhwo? ²⁷ Ndi muli mwe, ciru AKA cirhindibuza, wakaciyushulira ikano liguma oku kasangi ka kalamu kage?

²⁸ Nacirhumaga mulibulira enyambalo? Rhengi mulole obwaso bw'omu mashwa: burhakola burhanaluka; ²⁹ gomango mmubwizire oku ciru salomoni, omw'irenge lyage lyoshi, arhayambalaga nkago maso. ³⁰ Erhi akaba Nnamahanga anayambike ntyo olubala lwo mw'ishwa, luhali ene sezi lukwebwe okuciko mwebo bwemere bunyi, karhankamuyambika kulusha aho? ³¹ Murha cicilibuzagya, mpu bici rhwalyaga, erhibirhwa nywaga? Nabici rhuyambirhage. ³² Bulya ebyo byoshi, bapagani babilonza, sho winyu w'empingu amanyire oku mubilagirire kwo. ³³ Murhangi lonza obwami n'obushinganyanya bwa Nnamahanga, nebyo bindi byoshi mwabiyushulirwa. ³⁴ Kuziga murhakagi ciyirha oku birhindo; olusiku lw'irhondo lwa cilongeza lyone. Ngasi lusiku n'amabi galwo.