¹ Lero yezu anacihekwa na mûka omw'irungu, okujirhangulwa na shetani. ² Enyuma z'okucishalisa nsiku makumi gani budufu n'omushi, agarhwa n'ishali. ³ Owokumurhangula anacimuyishira, amubwira: akaba oli mwana wa Mungu, orhegeke aga mabuye ebé migati.

⁴ Yezu ashuza: amubwira: omuntu arhankalama oku mugati gwone, cikwone oku mwanzi guhuluka omukanwa ka Nnamahanga.

⁵ Shetani anacimuheka omu murhundu mucesibwa, amushoneza okuburhungiri bw'akanyamuzinda, ⁶ amubwira: akab'oli mwene Mungu, ohamire okw'idaho; bulya biyandisirwe: arhegeka bamalahika bage erhi werhuma; banakugwarhira oku maboko, ly'olekisarhaza okugulu kwawe okw'ibuye.

⁷ Yezu amubwira: kandi biyandisirwe: orharhangula nnahamwinyu, Mungu wawe.

⁸ Shetani aciri muheka oku ntondo ndiri bwenene, amulangula amami goshi g'igulu, n'irenge lyagô; ⁹ anamubwira: ebi byoshi nakuha okafukama onacikumbe.

¹⁰ Yezu amubwira: rhenga, shetani! Bulya biyandisirwe: wanakacikumba, nyakasane, nyamuzinda wawe n'okuka mukolera yenene.

¹¹ Lero shetani amuleka, na alaga, ba malahika bayisha hofi na yezu, bamukolera.

¹² Yezu, anacimanya oku yowane anagwasirwe, ashubira egalileya. ¹³ Arheng'énazareti, ajiciberera Ekapernaumu, hofi n'ényanja, elubibi lwa zabuloni na nafutali. ¹⁴ Lyobihikirira ebyaderhagwa n'Isaya, mulebi: ¹⁵ olubaga lwa zabuloni n'olwa nafutali, yo njira egera ebwa nyanja, ishiriza ly'eyorodani na muli galilaya w'embaga. ¹⁷ Kurhenga agomango yezu arhondera ayigiriza, n'okuderha: erhi muciyunjuze, buly'obwami bw'empingu bukola bumuli hofi.

¹⁸ Yezu anabà ajagera eburhambi bw'enyanja y'é galilaya, abona babiri balondana, Simoni aderhaga Petro, na Andreya, mwene wabo, erhibalibakweba akeshe omunyanja; bulya bali badubi. ¹⁹ Anacibabwira: Nshimbî, najimujir'okuba badubi ba Bantu. ²⁰ Honaho balek'orheshe, bamushimba.

²¹ Naye erhiaba arhacihali, abona bandi babiri balondana, Yakobo, mwene Zebedayo, na Yowane mwene wabo, erhi bali omu bwarho bw'ishe Zebedayo, banakagi kubula orhweshe rhwabo. ²² Acibahamagala, na bwonobwo balek'ishe, bamushimba.

²³ Yezu azunguluka galilaya mwoshi, ajayigiriza omu bibanda, n'okujamanyis'emyanzi y'akalembe y'obwami, anaj'afumya ngasi ndwala, na ngasi buzamba bwali omu lubaga. ²⁴ Irenge lyage lyalumira omu Siriya mwoshi, banakagi mulerhera, abalwala balilamire n'amalumwa ga ngasi lubero, n'abali gwerhwe n'abazimu, n'ab'oluhungu, n'alihozir'ébirumbu; anakabafumya. ²⁵ Lubaga lunji bamushimbulira, Egalilaya, Edecapoli, eyerusalemu omu lya yuda, n'olubaga lw'ishiriza ly'eyorodani.