¹ Erhi buca cishezi, abakulu b'abajinji n'abagula bw'olubaga boshi bajira ihano enyanya za Yezu, mpu bamuyirhe. ² Erhi baba bama mushweka, bamuhekera Pilato, murhegesi.

³ Lero Yuda, ye wamu hânaga, abona oku amatwirwa olubanja, aciyunjuza, ashubiza zilya nfaranga bihumbi makumi gasharhu emw' abakulu b'abajinji n'abagula, ⁴ Aderha: n'ajijire ecaha omukuhana omuko gw'omweru kweru. Bamushuza: k'ebyo birhuyerekire? Ebyo bikusinzize. ⁵ Yuda akweba bilya bihimbi by'enfaranga omu ka Nnamahanga, aciberula, anagenda cimanika.

⁶ Abakulu b'abajinji bazirhola, baderha mpu: zirhacishinganini okuhembwa omu mbiko ecire, bulya eli ngulo ya muko. ⁷ Na, enyuma ly'oku laganana, zilya nfaranga bazigula ishwa lya mubumbi muguma, lyakubisha bigolo. ⁸ Co cirhumire ely'ishwa liderhwa ishwa lya muko. Kuhika ene.

⁹ Lero byahikirira ebya derhagwa na Yeremiya, mulebi: barhola zirya nfaranga bihimbi makumi asharhu, cishingo bahanaga, abisraeli, okugula oyo balilebesire; ¹⁰ Bazihana okw'ishwa ly'omubumbi, oku Nnahamwirhu ali rhegesire.

¹¹ Yezu asamba embere z'omurhegesi. Omurhegesi amudosa: kawe mwami wa Bayahudi? Yezu amushuza: okudesire.

¹² Cikwone arhashuzagya bici oku manja z'abakulu b'abajinji n'eza bagula b'olubaga.

¹³ Lero Pilato amubwira: k'orha yunviri bintu binga baku yandikire? ¹⁴ Cikwone nta kanwa Yezu amushuzize, byasomeza bwenene omurhegesi.

¹⁵ Oku ngasi indinye, omurhegesi ayorhaga alika mushwekwa muguma, olya olubaga lwali hunyire. ¹⁶ Baligwerhe mushwekwa muguma ojire irenge, izino lyage Barnaba.

¹⁷ Nkoku bali shimanine, Pilato ababwira: indi mulonzize imulikulire, ka Barnaba erhi Yezu, bahamagala kristu? ¹⁸ Bulya alimanyire oku bwagalwa bwahanaga Yezu.

¹⁹ Amango alikola atamire omu kagombe k'oku twira emanja, mukage amubwira: harhabe akantu embere zawe n'oyu muntu mweru kweru; bulya ene nalibusire bwenene omu bilorho erhi ye orhuma.

²⁰ Abakulu b'abajinji n'abagula bashumika olubaga mpu bahune Barnaba, banayirhe Yezu. ²¹ Omurhegesi arhenza ecinwa, aderha: indi mulonzize indike muli aba bombi? Bashuza: Barnaba.

²² Pilato ababwira: gurhi najiraga Yezu, oderhwa kristu? Boshi bashuza: Abambwe oku musalaba!

²³ Omurhegesi aderha: cikwone bubi buci ajijire? Banaciri yama kulusha mpu: abambwe oku musalaba.

²⁴ Pilato abona oku arhajijiri bici, cikwone akadugundu kayushuka, arhola amishi, akalaba enfune emalanga g'olubaga, anaderha: ndi mweru kweru oku muko gw'oyu oshinganine. Mwene birikwo.

²⁵ N'olubaga lwoshi lwashuza: mpu omuko gwage kube kuli rhwe n'oku bana birhu! ²⁶ Lero Pilato abalikira Baraba; n'erhi aba amashurha Yezu, emikoba abaha ye mpu abambwe oku musalaba.

²⁷ Abasirika b'omurhegesi baheka Yezu omu nyumpa y'olubanja, n'omurhwe gwoshi gwamuzunguluka. ²⁸ Bamuhogola emishangi yage bamuyambika ecishulu cidukula. ²⁹ Banaluka ishungwe ly'emishugi, bamuhira lyo omw'irhwe, bamufumbasa akarhi omu kuboko kulyo; enyuma lyaho, baka fukama emalanga gage, n'okumu shekera bakaderha mpu: asinge, mwami w'abayahudi! ³⁰ Bamutwira kwo, barhola akarhi, barhimba ko ukw'irhwe lyage. ³¹ Erhi bayusa okumushekera, bamuhogola akanzo, bashubi muyambika emishugi yage, babuli yisha bamudwirhe mpu bamubambe oku musalaba.

³² Amango bagendaga, bashimana mulume muguma w'esirene, izino lyage ye Simoni, bamuseza mpu abarhule omusalaba gwa Yezu. ³³ Bahika ahantu haderhwa golgota, kwo kuderhwa hantu ha mpanga, ³⁴ Bamuha cigwerha c'idivayi ligushe mw'endulwe; cikwone, cikwone erhi ayusa okulabula, arhacilonzagya okulinywa. ³⁵ Erhi banamubamba oku musalaba bacigabira emishangi yage bayiyesha cigole bulyo bihikirira ebyali desirwe n'omulebi: bagaba enyambalo zage baziyesha cigole. ³⁶ Buzinda, batamala oku mulânga. ³⁷ Omukulangulana ecarhumaga ahanwa, bayandika enyanya ly'irhwe lyage: oyo ye Yezu, mwami w'abayahudi. ³⁸ Haguma naye banacibamba bishumusi bibirhi, muguma ekulyo kwagr, n'owindi ekumosho kwage. ³⁹ Aba kagigera baka mujacira, n'oku dunda irhwe. ⁴⁰ N'okuderha, we shaba aka Nnamahanga, n'okuka yubaka omu nsiku isharhu, cicizagye wene ankaba oli mwene Nnamahanga, cirhenzagye kuli ogwo musalaba.

⁴¹ Abakulu b'abajinji, n'abalimu b'amarhegeko na bagula, bakagi mushekera, n'okuderha: ⁴² Acizize abandi, cikwone arhankahasha oku ciciza yene! Akaba ali mwami w'abisraeli, lero ahonoke kuli ogu musalaba, nirhu rhumuyemere. ⁴³ Acikubagiraga Nnamahanga; lero Nnamahanga amulikuzagye, akaba amuzigira. Bulya adesire: ndi mwene Nnamahanga. ⁴⁴ Birya bishumusi, byali bambirwe haguma naye, byamu jacira okwo ko nanene.

⁴⁵ Kurhenga nsa ndarhu kuhika nsa mwenda, omwizizi gwaba omw'igulu lyoshi. ⁴⁶ Erhi ekola yaba nsa mwenda, Yezu ayama okw'izu linene: Éli, Éli, lama sabakitani? Kwo kuderha mpu Nnamahanga wani, Nnamahanga wani bici birhumire wandeka?

⁴⁷ Baguma muli abo bali aho, bamuyunva, baderha: ama hamagala Eliya.

⁴⁸ Ho n'aho muguma mulibo alibirha ajirhola ecihorholo, aciyunjuza nkalishi, anacihira oku karhi, amuha mpu anywe.

⁴⁹ Cikwone abandi baderha: leka, rhulole erhi Eliya ayisha amucize. ⁵⁰ Yezu ashubi yama bwenene arhenga mw'omuka.

⁵¹ L'olaga, omushangi gw'aka Nnamahanga gwabereka mwo kabirhi, kurhondera enyanya kuhika edako. Idaho lyagera mw'omusisi amabuye gaka bereka, ⁵² Ebyusho byafunuka, n'emibiri ya balya bacesebwa bafire yafuka. ⁵³ Barhenga omu byusho, enyuma ly'okufuka kwa Yezu, baja omu cishagala cicesibwa babonekana embere ly'abantu banji.

⁵⁴ Omukulu n'ababi haguma naye omu kukalanga Yezu, babona ogwo musisi gw'idaho na ngasi byoshi bya yishire, ba gwarhwa n'ecoba cinene, banaderha: kwo binali, oyu muntu ali mwene Nnamahanga.

⁵⁵ Aho hali bakazi banji bakagi lolera kuli; balya bali lusize Yezu kurhenga Egalilaya, omu kumu kolera. ⁵⁶ Mulibo mwali Mariya we Magdala, na Mariya, nnina wa Yakobo na Yosefu, na nnina wa bene Zebedayo.

⁵⁷ Erhi biba bijingo, muntu muguma mugale we Erimatiya, anaciyisha, izino lyage ye Yozefu, naye ali mwigirizibwa wa Yezu. ⁵⁸ Anaja emwa Pilato, ahuna omubiri gwa Yezu. Na Pilato arhegaka mpu bamuhe gwo. ⁵⁹ Yosefu arhola gulya mubiri, aguboha omu luhande lw'omushangi mweru, ⁶⁰ Anagubisha omu nshinda mpyahya, ali humbire omu lwala. Abulundula ibuye linene omu luso lw'enshinda, anagenda. ⁶¹ Mariya w'emagadala n'owindi Mariya wali aho batamire ho naho nshinda.

⁶² Erhi buca sezi, lwo lwali lusiku enyuma ly'amarheganyo g'abakulu b'abajinji n'abafarisayo bagenda haguma okujibona Pilato, ⁶³ banaderha: Nnahamwirhu, rhukengire oku elya ndyalya yakagi derha, erhi ecizîne: Enyuma lya nsiku isharhu nafuka. ⁶⁴ Orhegeke ecusho cilangwe kuhika olusiku lw'akasharhu, lyo abaganda bage barhayishi zimba ogwo mubiri, n'oku bwira olubaga mpu: anafusire omu bafu. Nantyo obo bulyalya buzinda bulushe oburhanzi.

⁶⁵ Pilato ababwira: mugwerhe abalanzi; mugende mugulange nkoku muyunvirhe. ⁶⁶ Bana cigenda banacikubagire oku enshinda elanzirwe enyuma ly'okubona okw'ibuye linanirizibwe.