¹ Erhi mwami yezu ayusa okderha ezo nderho, anacibwira abigirizibwa bage: ² Mumanyisize oku pasaka aba Enyuma lya nsiku zibiri, lyo na mwene muntu ahânwa mpu amanikwe oku musalaba.

³ Lero ho na ho abagula babajinji na bagula b'olubaga banacishimamanana omu cogo co muguma mukulu, wahamagalagwa okw'izino lya kayafa; ⁴ Okucigamba kwabo kwali kulonza okubwashweka mwo mwami yezu okubwifulikwa, n'okumuniga. ⁵ Cikwoki baderha ntya: lurhabe lusiku lw'idinye, lyo harhagiba akadugundu omu lubaga.

⁶ Erhi yezu acib'ali e Betania, omu mwa Simoni mushomyo, ⁷ omukazi muguma, walidwirhe enjebe ya mavurha y'engulo ndarhi amuyegera; na, amango abire akol'agwerhe alya, amubulagira galya mavurha okwirhwe lyage. ⁸ Abaganda, omukubona ntyo, bababurhe, n'okuderha: mpu cirhumire acereza aga mavurha? ⁹ Gakaguzirwe oku cishingo cinene, n'okurhabala abakenyi.

¹⁰ Yezu, amanya okwo, ababwira erhi: kurhi kurhumire mwabera oyu mukazi mutula? Cijiro cinja ajijire e mwani; ¹¹ abakenyi ensiku zoshi muli haguma nabo, ci niehe arhali ensiku zoshi mugwerhe. ¹² Ene ashiga omubiri gwani aga mavurha, akujijire enyanya ly'okubishwa kwani. ¹³ Okuli mbwire ngasi mwazi mwinja gw'akalembe gwa yigirizibwa, omw'igulu lyoshi, ecijiro c'oyu mukazi c'aganirwe okukumukengera.

¹⁴ Lero muguma mulibalya ikumi na babiri aderha Yuda Iscarioti, anacija e mw'abajinji babadahwa, ¹⁵ anaderha bici mwakampa, lyo muha ye? Nabo banacimuha nfaraga makumi gasharhu. ¹⁶ Kurhanga obwo, akazi lonza kurhi abona akasanzi kakwanine k'okuhana yezu.

¹⁷ Okulusiku lurhanzi k'okuhana emigati erhali mw'ongeso, abaganda banacija ho yezu, mpu bamubwira: ngahi olonzize rhukurheganyize okulya basaka?

¹⁸ Anacibashuza erhi muje omucishagala emwa lebe, munamwubwire, mpu: omwigiriza adesire mpu: amango gani gali hofi; omu mwawe najilira basaka nie n'abaganda bani. ¹⁹ Abaganda bajira oku yezu abarhegekaga, barheganya basaka.

²⁰ Erhi biciba bijingo, bababagwerhe bali bashega boshi na balya ikumi na babiri. ²¹ Erhi baba badwirhe balya, ababwira erhi: okuli, mmubwire, muguma winyu ampana.

²² Omuntu gwanacibagarha bwenene, banarhangira ba mudosa, ngasi muguma, erhi: waliha ka nie?

²³ Naye anacishuza erhi: oyurhuhebire omucibo rhwenaye, ye wampana. ²⁴ Mwene muntu acigendera oku bwayandisirwe. Cikwone buhanya bw'oyu muntu wahana mwene muntu. Kwankabire kwinja nk'arhankabusirwe.

²⁵ Naye Yuda, wamuhana amudôsa erhi: ka nie Mwigiriza? Na yezu anacimushuza: okudesire.

²⁶ Erhi bababakola bali balya, yezu arhola omugati; n'erhi aba amagugisha, agubega, anaguha abaganda bage, aderha: murhole mulye ogu guli mubiri gwani. ²⁷ Ashubi rhola akabehe; n'enyuma ly'okuvuga omunkwa, abaha, anaderha: munyweko mweshi; ²⁸ bulya guli muko gwani, gw'endagano, gwabulagwa e mwa banji, mpu gukule ebyaha. ²⁹ Mmubwizire nta kacinywa el'ilehe ly'omurhi gw'omuzabibu, kuhika olusiku nalinwe buhyahya na ninyu omu bwami bwa Larha.

³⁰ Erhi kuyusa okuyunva enyimbo, bashonera oku ntondo y'emizetuni.

³¹ Lero yezu ababwira: nashiba winyu mweshi, omw'obubudufu, ka sanzi ka kuhirima; bulya biyandisirwe: nashurha lungere n'ebibuzi byoshi by'ayishishandakana. ³² Cikwone enyuma ly'okufuka, na mushokolera e Galilaya.

³³ Petro arhola omwanzi amubwira: amango wabe cisarhazo emwaboshi orhabe co emwani.

³⁴ Yezu amubwira: okubwizire okunali, omwobu budufu, embere oluhazi lubike, erhi wamandahira kasharhu.

³⁵ Petro amushuza: ciru akaba kufa, nta ka kuhakana. N'entumwa zoshi za kuderha.

³⁶ Ahô omuburhe, yezu aj'e Gestemani bonabo, anaderha n'abaganda: tamali aha, okunajihuna. ³⁷ Aheka Petro na bene Zebadayo bombi, anarhondera oku yunva oburhe n'obululu. ³⁸ Obwo anababwira: omurhima gwani guli burhe buhika okufa; beri ahâ, na mulalire haguma na nani. ³⁹ Erhi ashegera mbere hitya, anacirhimba okw'idaho n'oku derha ntya: larha, akaba kwahashikana aka kabehe kabe hali na nani! Cikwone arhali oku nalonza ci oku walonza wene. ⁴⁰ Anacirishubira aha abamba bali, ashimana bahunire, abwira Petro: kaciru murhankahashire okuyiza haguma na nani nsa nguma yone! ⁴¹ Mube masu munahune, muleki hirima omu marhangulo; omurhima gukanyire c'omubiri guli muzamba.

⁴² Ashubi yeguma bwakabiri, n'okuhuna ntya: Larha, nkabirhahashikini ako kabehe ka je kuli buzira kukanywa, oku walonza kubage!

⁴³ Agala kandi ashimana bali liro; bulya amasu gabo gali mazirhu. ⁴⁴ Abaleka, aciyegula ahuna obw'akasharhu, ashubirira zonazilya nderho. ⁴⁵ Kandi ashubira e munda abambali bâli, ababwira: Lero muhunirage, munarhamuke! Sinzi, ensa eri hofi na Mwene omuntu akoli hanwa omu maboko ga banyabyaha. ⁴⁶ Yimuki, rhugendi; loli owampana oyu wayulubuka.

⁴⁷ Okwacidwirhe aderha, loli, Yuda, muguma w'ikumi n'ababiri, ahika, haguma naye ngabo nnene efumbirhe engorho n'amahiri, erhumirwe n'abajinji babadahwa na bagula b'olubaga. ⁴⁸ Owamulenganyagya erhi anabahire ecimanyiso: erhi oyu na nyunyugugurha, erhi ye, muna mugwarhage. ⁴⁹ Oku anayisha ntya ayirukira aha yezu ali, amubwira: mpanyire omusingo, mwigiriza! Anacimunyunyugurha.

⁵⁰ Yezu amubwira erhi: mwira wani, eci olijira jira co. Lero amushegera ho, aheba okuboko oku yezu, bamugwarha. ⁵¹ Ho na ho, muguma wa bambali ba yezu ashugula engorho yage; ayirhimba omwambali w'omudahwa mukulu amusiringul'irhwiri. ⁵² Lero yezu amubwira erhi: shubiz'engorho yawe omu lubarhi; balya ngasi boshi banige oku ngorho banafe oku ngorho. ⁵³ K'omanyire mpu ntankahunyire Larha, antumire ho na ho orhutu ikumi na rhubiri rhwa bamalahika? ⁵⁴ Gurhi amandiko, ga nkaciyunjula obwo, agadesire mpu bikwanine bibe ntyo?

⁵⁵ Omwako kasanzi yezu abwira engabo: mwanyishire nka cishambo, mudwirhe engorho n'amahiri, mpu muli ngwarha. Na lamire na ninyu nsiku nyinji, n'oku yigiriza omw'ishengere, murhana gwarhaga. ⁵⁶ Cikwone ebyo byayandisirwe lyo amandiko g'abalebi gahikirira. Ho na ho abigirizibwa bage baci yegula n'okucilibirhira.

⁵⁷ Balya bagwarhaga yezu banacimuheka emw'omukulu w'abajinji Kayifa, eyo abandisi n'akulu bali c'igushire. ⁵⁸ Petro amushimbulira kuhika oku cogo c'abahwa, anaja omu cogo, atamala haguma n'abakozi, mpu asinze oku byaba.

⁵⁹ Abajinji b'abagula b'ihano lyoshi bakalonza oku derhera yezu ebyo bushumi, kulusha mpu lyo bamuyirha. ⁶⁰ Cikwone babula emwage, ebibi byoku muderhera. Buzinda, hayisha baliri, ⁶¹ bakagi derha mpu: oyo adesire: mpw'anashaba ishengero lya Nnâmahanga, n'oku ciriliyubaka enyuma lya nsiku zisharhu.

⁶² Omukulu w'abadaha ayimuka, amubwira erhi: ci orhashuza? Kurhikw'o abantu bakundirhire? ⁶³ Yezu acihulikira. Omukulu w'abadaha amubwira, erhi ci orhashuza; erhi nkwigashire okw'izino lya Nnâmahanga ozine, orhubwire erhi we Kristu mwene Nnâmahanga.

⁶⁴ Yezu anashuza erhi: wakudesire. Ciru mmubwizire abwarhire ekulyo kw'ogala byoshi ayishire omubitu by'emalunga.

⁶⁵ Lero omukulu w'abadaha asharhula emyambalo yage, aderha erhi: amalogorha! Bici rhwacilongeza abadima? Loli, ninyu muyunvirhe okw'alogorha, kurhi ninyu mubwine? ⁶⁶ Bamushuza: ashinganine okufa. ⁶⁷ Okubundi, banacimutwira ebusu n'oku murhimba ebifundo n'empi n'okuderha: ⁶⁸ kristu, leba; rhubwire ndi okushusire.

⁶⁹ Ago mango, Petro ali atamire embuga omu cogo. Mukozi amujaho, aderha: nawe wali mwena yezu we Galilaya.

⁷⁰ Naye alahira embere za boshi, aderha erhi: ntamanyiri ebi olonzize okuderha.

⁷¹ Erhi akola ahuluka aj'embuga, owundi mukozi abwira abahali; n'oyu naye anali haguma na yezu w'enanzareti.

⁷² Ashubi lahira, n'okucigasha: ntishi oyo mulume.

⁷³ Erhi hagera kasanzi kasungunu, abaliho, bayegera, emunda Petro ali, bamubwira mpu: mashi nawe oliwamulibo, ciru n'okuderha kwawe kukuhanyire.

⁷⁴ Lero arhondera alahira n'okucigasha mashi ntamanyiri oyu mulume. Ho na halya oluhazi lwabika.

⁷⁵ Lero Petro akengera kalya kanwa yezu amubwiraga: embere oluhazi lubike, erhi wamandahira kasharhu. Erhi ahuluka arhondera alaka.