¹ Ntyo obwami bw'empingu bwayishushana na banyere ikumi barholaga orhumole rhwabo, mpu bajishimana omuhya-mulume. ² Barhanu babo bali bahwinja, na Barhanu bâli benge. ³ Balya barhanu bahwinja, barhola banafumbarha orhumole rhwabo, barhacihekaga mavurha; ⁴ Cikwone abenge bôhe, baba namavurha omu rhulaha. ⁵ Lero erhi omuhya-mulume erhi aba arhayishiri duba, bagwishira boshi banaja liro.

⁶ Ahakarhi k'obudufu, bayunva olubi: mpu omuhya-mulume oyo wayisha huluki mushiganane!

⁷ Lero balya banyere boshi banazuka, barheganya orhumole rhwabo.

⁸ Balya bahwinja babwira abenge: murhu he nirhu oku mavurha ginyu, bulya orhubonyo rhwirhu rhwamazima.

⁹ Abange bashûza: mpu; garhâbe manji kuli mwe na nirhu; gendagi e mw'abarhimbuzi, mugule aginyu. ¹⁰ Amango bagendaga bajigula, omuhya-mulume anacishoshoka honaho; bulya balicirheganyize badaha n'omuhya-mulume omubuhya, n'olunvi lwanayigalwa.

¹¹ Buzinda, balya bandi banyere balibahwinja bayisha, baderha mpu: waliha, waliha, Nnâhamwirhu, rhuyugulire nirhu.

¹² Lero naye abashuza: ababwira erhi okuli mmubwizire, nta mumanyiri.

¹³ Kuziga mube masu, bulya murhamanyiri olusiku na kasanzi.

¹⁴ Omugani gwaderha ntya, nka kulya omuntu wabalamaga, ahamagala abambali; abagabira ebirugu byage. ¹⁵ Anaha muguma mageshe garhanu, owundi gabiri, n'owakasharhu ahâbwa higuma, nk'oku obwenge bwage bwanali anacigenda. ¹⁶ Ho na ho olya wahabagwa magerha arhanu anacigenda, azikolesa, ayunguka kwo gandi arhi arhanu. ¹⁷ Kwo n'okwo, owahabagwa abiri naye ayunguka kwo gandi abiri. ¹⁸ Olya wahabagwa luguma aji humba e hîna omwidaho, alufulika mwo lulya lufaranga lwa nawabo.

¹⁹ Kasangi kali ahanyuma nnâwabo abajirisa omuganjo. ²⁰ Olya wahabagwa ezirhanu ayegerera, anadwire zindi irhanu, aderha: Nnâhamwirhu, wampire zirhanu; alaga zindi rhanu ezi.

²¹ Nnâmwabo amubwira: bwinj'obwo, mukozi mwinja na mwikubagirwa; wali mwikubagirwa okubisungunu, na kujiraga murhambo omu binji; dahaga omu busime bwa nnaha mwinyu.

²² Olya wahabagwa magerha ga biri anayisha naye, aderha: Nnâhamwirhu, wampire magerha gabiri, sinzagya, gandi gabiri aga nayungusire.

²³ Nnâhamwabo amubwira: bw'inja obwo, mukozi mwikubagirwa; wali mwikubagirwa oku bintu bisungunu, nakujira murhambo omubinji; dahaga omu buzine bwa nnahamwinyu.

²⁴ Lero olya wahabagwa igerha liguma naye amujaho, anaderha: nnâhamwirhu, nyishi okuba muntu mudarhi, ohumbula aharhahebaga, ona hakire ah'orhakwebaga; ²⁵ n'ayobohire, n'agendi fulika igerha lwawe omu budaka; lye ri, rhola lyo wenalyo.

²⁶ Nnâhamwabo amushuza: erhi mukozi mubi mwolo, wali oyishi oku n'ampumbule ahantarhweraga, n'okumpake ahantarhweraga; ²⁷ Byali kukwanine ohebe olufaranga lyani omu muhako n'omukugaluka kwani ntole ehyani n'obunguke. ²⁸ Nyagi ye eri gerha, mulihe olya ogwerhe amagerha ikumi. ²⁹ Bulya ogwerhe ye wanahabwa, anagale, ci orhagwerhi n'ehi ogwerhe bamunyaga hyo. ³⁰ N'oyo mbula mukolo, mumukwebe omu mwizizi: gw'embuga, eyo yashiba okuleka n'okushw'amino.

³¹ Amango mwene omuntu ayisha omukuze bwage, na bamalahika boshi haguma naye, anatamale okuntebe yage y'irenge. ³² Embaga zoshi zarhimanane emalanga gage. Ayishi berula now baguma n'abandi, kulya omungere aberula ebibuzi n'empere; ³³ Ayishiheba ebibuzi ekulyo kwage, n'empene e kumosho kwage.

³⁴ Lero mwami abwire abâli e kulyo kwage: yishi, mwe mwagishirwe na Larha; mugandaze omu bwami mwarheganyizibagwa kurhenga okulemwa kw'igulu. ³⁵ Bulya nalishalisire, mwampa ecinalye; n'ali n'enyorha, mwampa ecinyebwa; nali cigolo, mwanyegereza. ³⁶ Nali bushugunu, mwanyambika, nali mululwala, mwayishi ndola; nali omu mugozi, mwayisha emunda ndi.

³⁷ Abashinganyanya bamushuza: Nnâhamwirhu, mangaci rhakubona oshalisire, rhwakuha eci walya; erhi oli n'enyorha, rhwakuha eci wanywa? ³⁸ Mangaci ago ci rhwakubanaga oli cigolo, rhwakuhandisa; erhi bushugunu, rhwakuyambika? ³⁹ Erhi manga ci rhwakubwine mulwala, erhi wamugozi, rhwaj'emunda oli?

⁴⁰ Mwami naye ayishi bashuza: okunali mmubwizire, ngasi kantu mwajirire muguma wa balumuna bani barho, nie mwakajirire.

⁴¹ Omukukulikira anacibwira abali e bwa kumosho kwage nabo: Nteng'iho, mwe baheherere; muje omu muliro gurhazima gw'ensiku na mango gwalibikirwe shetani na bamalahika bage. ⁴² Bulya n'alishalisire, murhampaga eci nalya; nali n'enyorha, murhampaga ecinanywa; ⁴³ nali cigolo, murhanyegerezagya; nali bushugunu, murhanyambikaga; nali mulwala n'omu mugozi, murhayishigi ndola.

⁴⁴ Nabo bamushuze: waliha, manga ci rhwakubonaga oshalisire, erhi ogwerhwe n'enyorha, erhi oli cigolo, erhi mushugunu, erhi mulwala, erhi oli mushweke, rhurhanakurhabalaga?

⁴⁵ Lero anabashuze: okuli mmubwizire, ngasi hyoshi murhajiriraga muguma waba balumuna bani barhorho, nie murhajiriraga.

⁴⁶ Abo baje omu malumwa g'emiaka n'emiakula, cikwone abokuli baje omubuzine bw'ensiku n'amango.