¹ Enyuma ly'okw'esabato, oku mucherachera gw'olusiku lw'omugobe, Mariya Magdalena n'owindi Mariya bagenda rhangula ecusho. ² Na ntya, igulu lyagera mw'omusisi mwinji; bulya malaika wa Nnahamwirhu anaciyandagala kurhenga emalunga, anahirimya lir'ibuye, ana litamala kwo. ³ Enshusho yage yali nka bulangale, n'enyambalo yage eri nyeru nka lubula. ⁴ Abalanzi bagera mw'omusisi gw'ecoba, baba nka mirhumba.

⁵ Cikwone malaika ayimuka omu kanwa abwira balya bakazi: mwehe murhayobohaga; bulya mmanyire oku mwalonza Yezu wa bambagwa oku musalaba. ⁶ Arhaciri hano; anafûsire, nka kulya anaderhaga. Yishi, mulole ahali gweshire, ⁷ Ntya munagendage dubaduba mubwire abigirizibwa bage oku anafusire omu bafu. Nantya anamushokolire e Galilaya yo mwamu bonera. Intyo, mbire mmubwizire.

⁸ Banachîberula dubaduba aha cusho n'ecoba haguma n'obushagaluke bunene, n'oku libirha baheka omwanzi emw'abigirizibwa bage. ⁹ Nantya, Yezu anacibashinga, ababwira: Mmulamusize. Bayegera mpu bagwarhe oku magulu gage, banafukame emalanga gage. ¹⁰ Lero Yezu ababwira: murha yobohaga; mugendi bwira balumuna bani baj'Egalilaya: yo bambonera.

¹¹ Amango balikola bali omu njira, baguma muli balya bantu balanzi baja omu cishagalababwira abakulu b'abajinji ebyabire byoshi. ¹² Nabo erhi bama shubuzanya boshihaguma n'abaganda n'erhi baba bamoja omw'ihano, b'aha abasirika enfaranga zirhanka ganjwa, ¹³ Bababwira: muderhe oku abaganda bage bayishire budufu bamuzimba, ene muli liro. ¹⁴ Nank'omurhegesi ankamanya, okwo rhwayishi muyaza n'oku mufungira okubizibu. ¹⁵ Abasirika barhola enfaranga, bana kulikira nk'oku babwiragwa. Eyo myanzi yalumira omu bayahudi, kuhik'ene.

¹⁶ Balya bigirizibwa ikumi na muguma baj'Egalilaya oku ntondo nk'oku Yezu ababwiraga. ¹⁷ Erhi bamubona baharamya embere zage. Cikwone baguma mulibo bâba n'akarhinda. ¹⁸ Yezu, abayegera ababwira: nahîrwe obuhashe bwoshi omu malunga n'enyanya z'igulu. ¹⁹ Mugendage, mujîre embaga zoshi babe bigirizibwa, muba batize okw'izino lya larha, n'ely'omugala n'elya muka mwimana, ²⁰ Ntya muba muba yigirize okushimbulira ebi namurhereka byoshi. Nantyo, ndi haguma na ninyu ensiku zoshi, kuhika oku buzinda bw'igulu.