¹ Lero, abwira olubaga n'abigirizibwa bage aderha: ² Abanabwenge n'Abafarisayo batamire oku ntebe ya hantu ha Musa. ³ Mujirage munasingirizagye birya byoshi bamubwire, cikwone mumanye murhajiraga ebijiro byabo. Bulya banaderhe, barhanajire. ⁴ Banacishweke emizigo mizirho, n'okubashuza abantu, oku birhugo, cikwoki bone barhankalonza okuyihumakwo n'eminwe yabo. ⁵ Cikwone banajire ebijiro byabo byoshi biba byakusinzibwa na Bantu. N'okulihya enshanga zabo, bagwerhe ebishumiro biri by'emishangi yabo; ⁶ Basima entebe z'embere omu mango g'okulya, n'okutamala embere omu bishagala; ⁷ Basima bakatamala ho Musa omu hantu h'olubaga; n'oku kahamagalwa na abantu mpu waliha, waliha. ⁸ Cikwoki mwehe, murhalonzagya oku kahamagalwa mpu waliha, bulya muguma yene oli mwalimu, ninyu muli balondanyi mweshi. ⁹ Han'igulu murhabwiraga ndi mpu Larha; bulya muguma yene odesirwe sho, olya oli omumpingu. ¹⁰ Ciru murhayemere mwahamagalwa barhambuzi; bulya hali murhambuzi muguma, yeri Kristu. ¹¹ Omukulikire acijire mwambali winyu. ¹² Ngasi wacikuze ayishirhohibwa, na ngasi wa cirhohye ayishikuzibwa.

¹³ Obuhanya bwinyu, mwe bandisi na Abafarisayo ezi ndyalya! Bulya munakayigalira abantu obwami bw'empigu; murhakana budaha mwo mwene, murhanalesiri abokumuja. ¹⁴ Muli bahanya bandisi n'Abafarisayo ezi ndyalya! Bulya munakashaba enyumpa za abakana, n'okujajira obworhere bw'amahuno, n'okwo kwarhume, mwayazibwa kuzibu kulusha, mwe bandisi n'abafarisayo ezi ndyala!

¹⁵ Muli bahanya; bulya munagere omu nyanja n'omucihugo omu kujira n'okulonza owabayemera; nanka nayiosha, mumujire mwana wa cihenama kabiri kumulusha.

¹⁶ Obuhanya e mwinyu, balongolanyi mihurha! Mwe muderha: nka hankajira olwankacigasha oku ka namuzinda, karhali ka cigasha oku nnoro za ka nyamuzinda, erhi anakola agwasirwe. ¹⁷ Ababahwinja na mihurha! Bici biri biku, nnoro, erhi kagombe kacesize ennoro? ¹⁸ Munashubiderha, erhi hankaba owacigasha okuirherekerero, erhi buli busha; cikwone, erhi hankaba owacigasha okunterekero eri okwirherekerero? ¹⁹ Eyi mihurha! Cici cilushire, enterekero erhi irherekerero, licesa interekero? ²⁰ Oku lutari n'ebiri nyanya lya lwo byoshi. ²¹ Ocigasha aka Nnâmahanga erhi acigashire aka nyamuzinda na namwo; ²² N'olahira empingu erhi alahîre n'entebe ya Nnâmahanga oyitamire kwo.

²³ Muli bahanya mwe, bashamuka hi hano ninyu bafarizeyi ezi ndyalya! Bulya munahe Nnâmahanga eciguma ci kumi ye mburho gwomunana, ne ci bizari, na cenjira, cikwone munaleke enyigirizo nkulu zo mu marhegeko, nko kubushinganyanya, n'okuba n'omurhima mwinja n'okuba mwikubagirwa: ebyo byali kwanine okujirwa, buzira okuleka ebindi. ²⁴ Ezi n'ongolanyi mpurha! Zirhenza ehihuka omu mishi zigali gorhomera enjavu.

²⁵ Mulibahanya mwe, bandisi bihano n'abafarisayo ezi ndyalya! Zishuka emugongo gwa akabehe n'ogwe nsahane n'obwo omundalala muyunjwire bushambo n'enyifinjo. ²⁶ Mufarisayo wo muhurha! Orhengi cesa ehiri omundalala lya kabehe lyo eciri emugongo hi ca.

²⁷ Mulibahanya mwe, bashamuka bihano ninyu bafarizeyi ezi ndyalya! Bulya mushushire encinda nyeru, embuga zinabonekane nyinja, n'obwo omundalala, ziyunjwire kavuha g'abafu b'ebibolekeza. ²⁸ Kwo ninyu, abantu bamubona ntyo embuga nka bashinganya, ci omundalala, obubi n'obulya bumuyulilire.

²⁹ Mulibahanya mwe, bandisi na bihano ninyu Abafarizeyi. Ezi ndyalya! By'abalebi munakombeze enyunsho za banabushinganyanya, ³⁰ Zinaderhe mpu: rhucibage amango g'abalarha, rhurhanka barhabire okubulaga omuko gwa balebi. ³¹ Na ntyo munahamirize mpu muli bagala b'abanigaga abalebi. ³² Ninyu muyunjuzagye olugero lwa basho. ³³ Ezi njoka, bûle bwa cibugusha! Gurhi mwafume obuhane omuliro gw'ecihenama? ³⁴ Cô cirhumire, Loli, namurhumira abalebi, abange n'abandisi n'abigiriza. Ci mwayirhemwo baguma, munababambe, n'abandi mubashurhe emikoba omu bishagala binyu, muna bashimbulule omu ngo zinyu, ³⁵ mpu lyo mubashuzibwa ngasi muko mweru kweru gwajire omwo budaka, kurhenga omuko gwa Zakaria, mwene wa Barakiya, mwayishiraga ekarhi ka ka nnamuzinda n'irherekerero. ³⁶ Okuli mmubwizire, ebyo byoshi bya barhuzibwa er'iburha.

³⁷ Yerusalemu, Yerusalemu, we oyirha abalebi n'okubanda abarhumirwe emwawe amabuye, kanga nalonzize oku kukumakuma abana bawe, nka kulya engoko ekumakumira abanagoko bayo omu byubi, orhanayemeraga! ³⁸ Sinzi, mwalekerwa enyumpa yinyu mushaka; ³⁹ Bulya, mmubwizire, murhakashub'imbona, kuhika olusiku mwederhe: mpu Aganze oyishire okwizino lya Nakasane!