¹ Yezu, arhondera aderha, n'okubabwira bulya buhyahya oku mugani, ntyo anaderha: ² Obwami bw'empingu bushushanyibwe na mwami muguma wajiraga idinye ly'omugala. ³ Arhuma abakozi bage mpu bahamagale balya bali lalisirwe oku idinye; cikwone barhalonzagya okuyisha. ⁴ Acirirhuma kandi abandi bakozi, n'okuderha erhi: mubwire abalalike ntya: Lola, oku n'arheganyize olusiku lukulu; empanzi zani n'ebibuzi byani bihîmbire bwanizirwe byoshi, bikola birheganye, muyishage okw'idigne. ⁵ Cikwone, barhashimbaga izu ly'okulalikwa, bacigendera, muguma aja omw'ishwa lyage, n'owundi oku burhimbuzi bwage; ⁶ Ntyo n'abandi banacigwarha balya bakozi, banacibajira kubi banabayirha. ⁷ Oyo mwami aba burhê; arhuma engabo zage, amalîra balya banizi, n'okuyica olugo lwabo. ⁸ Lero abwira abakozi bage erhi: Ebiryo bikola birheganye; cikwone abâli balâlike barhâli babikwanine. ⁹ Mugendâge lero omu mashanganjira, ntya muhamagalire ebi biryo ngasi boshi mwayishirhimana. ¹⁰ Abo bakozi banagenda baja omu njira, bashûza boshi ababanashimanyire, ababi n'abinja, n'enyumpa y'idinye ya yunjula bigolo. ¹¹ Mwami aja mwo mpu alole abâli oku meza, lero abona muntu muguma arhayambirhi omwambalo gw'idinye. ¹² Anacimubwira erhi: mwira mwami, kurhi wadahire muno orhana yambirhi omwambalo gw'idinye? Ci oyo muntu arhamushuzagya kanwa. ¹³ Lero mwami abwira abo bakozi bage erhi: Shweki ye amagulu n'amaboko, ntya munamukwebe omu mwizimya embuga, eyo aba n'okulâka n'okuluma amino. ¹⁴ Bulya hali banji b'ahamagirwe, ci basungunu bishogwa.

¹⁵ Ago mango Abafarisayo bagend'ijira ihano mpu bagwerhe Yezu, omu nderho zage yene. ¹⁶ Bana cirhuma hofi naye ababo bigirizibwa haguma n'aba Herodi, mpu bamubwire erhi: Mwigiriza, rhuyishi oku oba w'okuli, ntya onayigirize enjira ya Nnâmahanga omu kuli, buzira kuyoboha omuntu yeshi, bulya orhazinza obukulu omuntu ali nka agwerhe. ¹⁷ Rhubwire lero kurhi orhanyize kabirhegesirwe, erhi nanga, oku kavurhira Sezari?

¹⁸ Yezu, amanya obubi bwabo, abashuza mpu: Bici birhumire mwantega, ezi ndyalya? ¹⁹ Nyereki olufaranga olw'olubaga lukavurha. Nabo bamuyereka lufaranga luguma. ²⁰ Abadôsa erhi: ya ndi eyi nshushano na aga mandiko?

²¹ Bamushuza, mpu bya Kaizari. Ntyo ababwira erhi: mugalulire Kaizari ebiri byage, na Nnâmahanga naye ahabwe ebiri byage. ²² Erhi bayunva ntyo basomerwa, bamuleka banacigendera.

²³ Lwo n'olwolusiku, Abasandukayo, balya bakaderha mpu nta bufuke bwa abafire, banacija emunda Yezu ali, n'okumudôsa mpu: ²⁴ Mwigiriza, Musa adesire mpu: erhi omuntu akafa arhanasiziri bana, omulumuna anayishiyanka oyo mukana, ntyo akaburhira oyo mwene wabo abana. ²⁵ Nobwo, ekarhi kirhu yali bakana nda balondanaga. Owaburhanzi aj'omubuhya, n'okufa, ntyo, arhangwerhi bana, ²⁶ alekera omulumuna mukâge. Ajira kwo n'okwo oku wakabiri, n'owa kasharhu, kuhika oku wa kali nda. ²⁷ Enyuma lyabo boshi, oyo mukazi naye afa. ²⁸ Aha kufûka kw'abafire, ayishiba mka ndi muli balya nda? Bulya boshi bamuyansire.

²⁹ Yezu Anacibashuza erhi: Muhabusire, kali bulya murhamanyiri amandiko, ciru n'obuhashe bwa Nnâmahanga. ³⁰ Bulya, aha kufûka kw'abafire, abalume barhakaciyanka bakazi, ciru n'abakazi barhaciyisheba n'abalume, cikwone bayishiyorha nka bamalaika na Nnâmahanga omu mpingu. ³¹ N'oku ebiyerekine obufûke bwa abafire, ka murhasagisoma akanwa Nnâmahanga amubwiraga: ³² Nie mba Nnâmahanga was Abrahamu, Nnâmahanga wa Isaka, na Nnâmahanga wa Yakobo? Nnâmahanga arhaba Nnâmahanga w'abafîre, cikwone w'abazine.

³³ Olubaga, lwakagiyunvirhiza, lwasomerwa n'enyigirizo za Yezu.

³⁴ Abafarisayo, erhi bamanya oku anabulisize Abasandukayo ebi bàderha, bacihe haguma, ³⁵ na muguma muli bo, mwigiriza mukulu omu marhegeko, anaci mudosa, omu kurhenga erhi: ³⁶ Mwigiriza, irhegeko lihi likulu omu marhegeko goshi?

³⁷ Yezu anacishuza erhi: okâzigira Nnâmahanga, Nnâhamwirhu, Nnâmahanga wawe, n'omurhima gwawe gwoshi, n'obuzine bwawe bwoshi, n'obukengere bwawe bwoshi. ³⁸ Lyo lirhanzi kandi lyo na likulu ly'amarhegeko. ³⁹ Sinzagya n'elya kabiri, nalyo lishushine n'elyabo: okâzigira owinyu nk'oku ocizigira wene. ⁴⁰ Ago marhegeko abiri go galimwo amarhegeko goshi n'abalebi.

⁴¹ Nkolo Abafarisayo bali haguma, Yezu abadôsa, ⁴² aderha mpu: kurhi mukarhanya kuli Kristo? Ali mwene ndi? Bamushuza mpu: "Mwene Daudi."

⁴³ Kandi Yezu ababwira erhi: kurhi Daudi, amudesire, muli Mûka mwimâna, acikazirigi muhamagala mpu Nnâhamwirhu, omu mango ali aderha: ⁴⁴ Nnâhamwirhu Nnâmahanga abwizire tamala ekulyo kwani, kuhika mpebe abashombanyi bawe idako lya magulu gawe? ⁴⁵ Erhi ankaba Daudi amudesire mpu Nnâhamwirhu, kurhigi acirigi mwo mwana wage? ⁴⁶ Ntaye wahashire okumushuza akanwa. Ntyo, kurhenga olwo lusiku, ntaye waci cirhamize okumuha amadôso.