¹ Erhi bahika hofi n'e yerusalemu, kwo na kuhika omu lugo lw'e Betefage, oku ntondo y'emizetuni, yezu arhuma bigirizibwa bage babiri, ² Anababwira erhi: gendi muli lula lugo embere zinyu; mwarhimana mwo punda mushuke, bo n'omwana wage haguma; mubashwekûle mubandêrhere. ³ Nka, hakay'ishijira owamubwira akanwa, munamushuze mpu: Nnahâmwirhu abalonzize. Ntya ho n'aho abalikira bo bagenda.

⁴ Nabwo, ebyo byabire mpu lyo akanwa kahikirira kaderhagwa n'omulebi: ⁵ Mubwire omunyere w'e Siyoni erhi: Lola, oku mwami wawe ayishire emunda oli, ayunjwire butûdu, ashonyire oku punda, oshonyere okwo punda, murho mwana wa punda.

⁶ Obwo abigirizibwa bagenda, bajira okwo yezu abarhegekaga. ⁷ Banalerha punda n'omwana wage, babamba kw'emshangi yabo, bamutamaza kwo. ⁸ Olubaga lw'abantu lwaka Bamba emishangi yabo omu njira; n'abandi bakatwa amashami g'emirhi, banagabamba omu ibarabara. ⁹ Abantu bâlishokwire n'abali mushimbire yezu bakayakûza erhi: Hosana mwene Daudi! Agishwe oyu oyishire oku izino lya Nnâhamwirhu! Hosana omu mpingu enyanya!

¹⁰ Erhi acija omu yerusalemu, boshi omw'olugo bagera mw'omusisi, n'okukaderha mpu: oyu muntu ye ndi?

¹¹ Olubaga lwakashuza mpu: oyu ye yezu, mulêbi, w'e Nazareti omu Galilaya.

¹² Yezu aja omu nyumpa ya Nnamahanga. Abahinva boshi ngasi bakagiguliza n'abakagigula omu nyumpa ya Nnamahanga; ablandula ameza g'abakagikâba enfaranga, ahirimya n'ebirhi by'abobarhunzi b'enguku. ¹³ Anacibabwira erhi: kuyandisirwe ntya: Enyumpa yani yaderhwa nyumpa ya kuhûnira.

¹⁴ Emihurha n'ébirema baja emunda yezu ali omu ka nnâmahanga nta nacibafumya.

¹⁵ Cikwone abagula n'abajinji n'abandisi baba burhê, erhi babona ebisomerine amajira, n'abana bali bayakuza omu ka Nnâmahanga erhi: Aganze mwene Daudi!

¹⁶ Banamubwira mpu: k'oyunvirhe ebyo bali bàderha? Yezu naye abashuza erhi, neci. Kamurhasagisoma cirya cihimbi c'amaandiko cidesire mpu: wahêbire obukuze omu kanwa k'abana barho n'orhubonjo?

¹⁷ Ntya, anacibasiga, arhenga omw'omw'olwo lugo aja e Betaniya, yo analazire.

¹⁸ Lero erhi buca, akola agaluka omu lugo, ashalika. ¹⁹ Abona omurhi gw'omutini oku njira, aguja ho; cikwone arhagushimanaga kwo bici nka ba byasi byône, ntya anacibwira ogw'omurhi erhi: irhondo orhacilehekaga! Enyuma lya ho ogw'omurhi gwayuma.

²⁰ Abigirizibwa, erhi babona ebyo, basômerwa bwenene, bakaderha mpu: kurhi gulya murhi gw'amalehe gwamayûma bwo na bubo wani?

²¹ Yezu abashuza erhi: Mmubwizire okuli: erhi ankaba mugwerhe obwemere na nka murhagwerhi karhinda, arhali ebyo bijirikine kw'ogw'omurhi gw'amalehe kwône mwankajira, cikwone nkamwakabwira eyi ntondo mpu: rhenga aho ocikwebe omu nyanja, n'okwo kwanaba. ²² Ngasi byoshi mwahûne oku bwemere kugerera amahûno, mwakuhabwa.

²³ Yezu aja omu ka-nnamahanga, na, amango arhonderaga kuyigiriza, abagula b'abajinji n'abagula b'olubaga lw'abayahudi balonza okumubwira mpu: okubuhashe buhi ojira mw'ebi byoshi, na ndi wakuhaga obu buhashe?

²⁴ Yezu abashuza erhi: Nkolaga nani namudôsa kanwa kaguma; na, ninyu mukanshuza, nani namubwira oku buhashe bwa ndi njira mwo ebi. ²⁵ Obuhashe bwa Yowane, ngahi bwarhengaga? K'empingu erhi emw'abantu? Cikwone bardondera bacirhanya bône; rhukashuza mpu: empingu, akola arhubwira mpu: carhumirage murhamuyemera? ²⁶ Kandi erhi rhwankashuza mpu: emw'abantu, rhugwerhwe n'écoba c'abantu, bulya boshi kwo bakalola Yowane nka mulêbi. ²⁷ Lero bashuza yezu baderha mpu: rhurhamanyiri la. Naye aderha ashubibabwira: Nani ntacimubwire oku buhashe bwa ndi njira mwo ebi byoshi.

²⁸ Kurhi mugerere? Muntu muguma aligwerhe bana bage babiri; ana, cibwira omwana wage mukulu, aderha erhi: Mwana wani, genda ojikola ene omw'ishwa ly'emirhi y'emizabibu.

²⁹ Naye amushuza: Ntalonza. Ci erhi kuba kasanzi, aciyunjuza, ayija.

³⁰ Anacibwira omwana wage wa kabiri, naye amubwira nka oku abwiraga owabo. N'oyo mwana ashuza: Ngenzire bw'inja, Nnahâmwirhu. N'ényuma lya ho arhayijaga. ³¹ Ndi muli abo babiri wajijire obulonza bw'ishe? Banacishuza mpu: omukulu. Ntya yezu ababwira erhi: mmubwire okuli, oku abanyabyaha n'abakazi bagonyi bamurhange omu bwami bwa Nnamâhanga. ³² Bulya Yohane amuyishire omu njira y'obushinganya, ci murhamuyemeraga. Cikwone abavurhisa b'ikoli n'embaraga bayemire okw'adesire; na ninyu, mwe mwabwine ebyo, murhaciderhaga mpu mugokole muyemere oku adesire.

³³ Yunvi ogundi mugani: Hâli muntu muguma, nna nyumpa, alihinzire ishwaly'emirhi y'emizabibu. Aliyubakira olugurhu, abinjira mw'omukenzi, agwikamwo omulunga gw'okulanguza, enyuma lyaho alisigamwo abahinzi, anacibalamira. ³⁴ Erhi amango g'okuhumbûla amalehe gahika, arhuma abakozi bage emunda balya bahinzi b'ishwa ly'emizabibu, mpu bamuhâge amalehe gage g'emizabibu. ³⁵ Abo barhanzi, bôhe bagwarha balya bakozi, bashurha muguma, n'owundi bamuniga, n'owundi bamu banda amabuye ye wakasharhu. ³⁶ Ashubirhuma abandi bakozi, banji kulusha abarhanzi; nabo babajira nk'oku bajiraga abandi. ³⁷ Erhi kuba buzinda, abarhumira omugala, Anaderha erhi: bakenga mugala wani.

³⁸ Cikwone, abo bahinzi erhi babona oyo mugala, babwirana bône na nêne mpu: Alaga enfula yage, muyishe, rhuyinige, rhuciyîmire omw'omwimo gwage. ³⁹ Ntyo banacimugwarha, bamuheba eburhambi bw'ishwa bamuyirha. ⁴⁰ Lero amango, nna liry'ishwa ly'emizabibu ayisha, Kurhi ayishijira aba bakozi?

⁴¹ Banacimushuza mpu: kuheza aheza abo Bantu babi buzira kubabera obwonjo, na buzinda alihebemwo abandi bahinzi, balya bayishikamu'amalehe amango g'okuhumbula.

⁴² Yezu ababwira erhi: ka murhasagisoma ntya omu mandiko: ibuye abûbasi bakabuliraga lyo lyabirage lya cikwi; ca emwa Nnâmahanga Nnâhamwirhu ebyo byarhengaga, byanaba bisomerine omu masu girhu?

⁴³ Co cirhumire, mmubwizire, oku mwanyagwa obwami bwa Nnamâhanga, n'okubuha olundi lubaga lulya lwayîshileka amalêhe. ⁴⁴ Owanahirime kuli ery'ibuye ayîshivunika, n'oyu lyanarhegere kwo lyanamuvungunyule.

⁴⁵ Erhi bayusiyunva eyo migani, abagula b'abajinji n'abafarisayo bamanya oku bo Yezu anaderhaga, ⁴⁶ Ntyo balonza oku bamugwarhamwo; cikwone bayoboha olubaga, bulya lwakag'imulola nka mulêbi.