¹ Bulya obwami bw'empingu bushushanyibwe na nnahano muguma w'omu nyumpa wazûkaga hibungubungu, mpu ajilonza abamukolera omu ishwa lyage ly'emizabibu. ² Balaganana n'abakozi okw'abakamasa cicere ciguma ca lufaranga ngasi lusiku, ntya anabarhuma omu ishwa lyage ly'emizabibu. ³ Anahuluka aha nsa isharhu, abona abandi Bantu batamire barhali bajira bici. ⁴ Ababwira erhi: gendi ninyu omu kwani, nayîshimukamasa kulya kunashinganine. ⁵ Nabo banacigenda. Abashub'iyimuka kalengerere aha nsa mwenda, acijira nk'oku ajiraga burhanzi. ⁶ Lero anashubihuluka aha nsa ikumi na nguma, ashimana abandi bayimanzire, ntyo anacibadosa erhi: Bici birhumire mulegerera muyimanzire aha buzira kukola kantu?

⁷ Bamushuza mpu: bulya rhwabuzire owarhuha omukolo. Gendi ninyu omu kwani, ntyo kw'ababwizire.

⁸ Erhi biba bijingo, oyo n'ishwa abwira omwambali erhi: hamagala abakozi, obakamase oluhembo lwabo, orhangirire oku buzinda oyukize oku barhanzi.

⁹ Erhi barhondereraga akasi aha nsa ikumi na nguma bayisha, ntyo bakamarha ngasi muguma lufaranga luguma lwa cicere. ¹⁰ N'abarhanzi banaciyisha nabo kwo n'okwo, bakamanya mpu bakamarha nyinji kulusha; cikwone bakamarha n'abo ngasi muguma lufaranga luguma. ¹¹ Erhi balukamarha, bakaciduduma n'okubera nnâwabo w'omunyumpa burhê, ¹² ntyo bakaderha mpu: aba wabagaakasi buzinda bakozire nsa nguma yone, ntya wamanarhuyumanyanya rhweshi kuguma, rhwe rhwalegereraga rhwarhama omulegerege gwoshi n'izuba lyarhurhubanya.

¹³ Anacishuza muguma mulibo erhi: mwira wani, ntakuzimbiri; kalurhali lufaranga luguma lwa cicere rhwalagananaga? ¹⁴ Yanka olwawe wakolire, ntya ogende. Nakamasa owahabagwa akasi buzinda kuguma na nawe.

¹⁵ Kantagwerhi obuhashe bw'okujira ebyani nk'oku nnonzize? Mabi maci obwine okwenge ndi mwinja? ¹⁶ Ntyo kwo abazinda bay'ishiba barhanzi, n'abarhanzi bakaba bazinda.

¹⁷ Erhi yezu akola ashonera e yerusalemu, arhola balya bigirizibwa ikumi na babiri abahêka aburhambi, ntyo ababwira bunjiranjira erhi: ¹⁸ Loli, rhwono rhwayinamukira e yerusalemu, ntya omwana w'omuntu ahânwa emw'abagula b'abajinji n'abandisi. Bamutwira mpu afe, ¹⁹ ntyo bamuhâna emw'abapagani, mpu bamushekere, bamushurha emikoba, n'okumubamba oku musalaba; n'olusiku lwa kasharhu ayishiyifûka.

²⁰ Ntya nnina wa bene Zebadayo anaciyegera aha yezu ali haguma abagala, amwikumba, anamuhûna amushoboze akantu.

²¹ Anacimubwira erhi: bici walonza? Amushuza erhi, orhegeke, abana bani oku banali babiri, oku obabwine, bayîshitamala, omu bwami bwawe, muguma e kulyo n'owundi ekumosho kwawe.

²² Yezu ashuza erhi: murhamanyiri ebi muhûnyire. Kamwananywa ecikombe c'amalumwa nanywa? Bamushuza, mpu rhwanahasha.

²³ Anacibashuza erhi: okuli mwanywa ecikombe cani; cikwone ebyo kuyîshitamala aha kulyo kwani n'aha kumosho kwani, ebyo ntabigwerhi kw'obuhashe, ntyo harhahabwe abarhali balya Larha aharheganyize.

²⁴ Bulya bigirizibwa ikumi, erhi bayunva ntyo, babêra abo bombi balondanaga burhê. ²⁵ Yezu ancibahamagala boshi, n'okubabwira erhi: muyiishi okw'abarhambo b'embaga banazirhegeke n'obukulu, n'abakulu banayerekane obuhashe; ²⁶ Ci kwone arhali kwayiishiba ntyo omukarhi kinyu. Cikwone owankalonza okuba mukulu ekarhi kinyu, agw'asirwe abe mukozi winyu; ²⁷ N'owankalonza kuba waburhanzi muli mwe, agwasirwe okuba muja winyu. ²⁸ Ntyo kwo mwene-muntu ayishire, arhayishaga mpu akolerwe, ci kukolera abandi anahâne obuzine bwage mpu lyo acungula banji.

²⁹ Amango barhengaga e Yeriko lubaga lw'abantu lwashimbulira Yezu. ³⁰ Na ntya, mihurha ibiri, yali tamire oku burbambi bw'enjira, ya yunva oku yezu wagera, ntya yakayakûza mpu: orhubère obwonjo, Nnâhamwirhu, mwene Daudi! ³¹ Lulya lubaga lwakabakalihira, mpu bahulike; cikwone yakayakûza bwenene: orhubêre obwonjo, Nnâhamwirhu, mwene Daudi!

³² Yezu ayimanga, abahamagala, ntya aderha erhi bici mulonzize mmujirirwe?

³³ Bamushuza mpu: Nnâhamwirhu, nirhu amasu girhu gahurhûke. ³⁴ Nk'okwo banaciberwa bwonjo, Yezu abahuma oku masu gabo; ho na halya babona banamushimbulira.