¹ Erhi yezu aba amayusa ezo nyigirizo, arhanga e Galilaya, aja omu lugo lwe Yudeya, ishiriza ly'e Yordami. ² Lubaga lwa Bantu banji lwali mushimbire n'eyo munda afumya yo n'abalwala.

³ Abafarisayo banamuyishira, n'okuderha, eby'okumurhangula: kabirhegesirwe oku omuntu okuhulusa mukâge oku ngasi kantu?

⁴ Ashuza erhi: kamurhasagisoma oku Lulema, aha murhondero, alemire omulume n'omukazi, ⁵ n'oku adesire: co cirhuma omulume aleke ishe na nnina, acishwekere kwo mukâge, n'abo okubanali babiri bayishiba mubiri muguma? ⁶ Omu ntya barhaciri babiri, ci bakola mubiri muguma gwone. Ntyo omuntu yeshi arhaciberulaga eci Nnamahanga ahumanyangya.

⁷ Bulya gurhi kwoki, bamubwira, Musa ayandisire oku banaha omukazi amaruba g'okuvuna obuhya amango amahulusa mukâge?

⁸ Abashuza erhi: buzibu bw'emirhima yinyu bwarhumire Musa abayemera okuhulusa bakinywe; ci oku murhondero, arhali kwo byali ntyo. ⁹ Cikwone mmubwizire oku ngasi yeshi wahuluse mukâge, kuleka omugonyi, agali yank'owundi, erhi akola agonyire.

¹⁰ Abigirizibwa bage bamubwira mpu: erhi ankaba ntyo kwo biri oku omulume ankalama n'omukazi, ntacibwo bunguke kw'okuja omubuhya.

¹¹ Anacibadosa: boshi barhankahasha okunyunva ogw'omwanzi; cikwone oku balya bone baguhabirwe. ¹² Bulya haba abandi barhayanka bulya kwo barhenzire omu nda ya ba nnina; hali n'abalamba bajirwa nkone n'abantu; haligi n'abandi bacijijire ntyo bône, erhi bwami bw'empingu burhuma. Ohashire okuyunva ayunve.

¹³ Obwo banaci mulerhera abana barho, mpu abahebe kw'amaboko n'okubahûnira. Cikwone abigirizibwa bage banacibakalihira. ¹⁴ Ntyo yezu aderha erhi: leki abana barho, murhabahanzagya okuja emunda ndi; bulya obwmi bw'empingu buli bwa bantu bashushanyibwe n'abo. ¹⁵ Abahira kwo amaboko, abaganda.

¹⁶ Ntya, muntu muguma aja no yezu, amubwira erhi: mwigiriza, minja maci nankajira lyo mbona obuzine bw'ensiku n'amango?

¹⁷ Anacimushuza erhi: bici birhumire wandosa ogw'aminja? Muguma yene oba mwinja. Ankaba olonzize okuja omu buzine, osinze okw'amarhegeko gadesire. Amudôsa erhi: Gani?

¹⁸ Kwo n'okwo yezu anacuza erhi: arhayirhaga; orhagomaga; orhazimbaga; orhaderherage omuntu obuhamîrizi bw'obunywesi; okenge sho na nyoko; ¹⁹ n'okuzigira owinyu nk'oku ocizigira wene.

²⁰ Ogwo musole banamubwira erhi: najijire ebyo byoshi; bici ncibuzire kandi?

²¹ Yezu amubwira erhi: akaba olonzize oku mwimâna, ogende, oguze ebi ogwerhe, ohe abakenyi, ntyo wayishiba n'obugale omu mpingu. Enyuma lyaho oyishe, onshimbe. ²² Erhi aba anayunva eyo myanzi, ogwo musole gwagenda gunakola guli burhe bwenene; bulya gwâli gugwerhe birugu binji.

²³ Yezu abwira abigirizibwa bage erhi: okuli mmubwizire, byayishi ba buzibu omugale okudaha omu bwami bw'empingu. ²⁴ Nciziri mmubwira, oku biri birembe okugeza engamia omu irhule ly'ensindani kulusha omugale okudaha omu bwami bw'empingu.

²⁵ Abigirizibwa, erhi bayunya ebyo, basomerwa bwenene, ntya banaderha mpu: ndigi wacungukage obwo?

²⁶ Yezu abalolereza, anababwira erhi: emwa Bantu okwo kurhankahashikana, ci emwa Nnamahanga bwyoshi byanahashikana.

²⁷ Petro, lero aderha akanwa, erhi: sinzagi, rhwalesire byoshi, rhwakushimba; kurhigi byanacirhuyorherage obu?

²⁸ Yezu abashuza erhi: okuli mmubwizire, nti amango mwene-muntu, omu buhyahya bwa ngasi byoshi; atamala oku ntebe yage y'irenge lyage, ninyu mwe mwanshimbire, kwo n'okwo mwaishitamala oku ntebe ikumi n'ibiri, n'okuyishi katwa emanja z'emilala ikumi n'ibiri y'israeli. ²⁹ Na ngasi yeshi wasige aha mwage, erhi izino lyani lirhuma, bene wabo, erhi bali babo, erh'ishe, erhi nnina, erhi mukâge, erhi bana bage, erhi amashwa gage, erhi nyumpa zage, ahâbwa kali igana kulusha, n'okuyishi a n'omwimo gw'obuzine bwe miakula.

³⁰ Banji omu barhanzi bayishiba bazinda, na banji omu bazinda bayishiba barhanzi.