¹ Muli ago mango, entumwa zanacija aha yezu ali, za mudosa erhi: ndi wankaderha aba mukulu omu bwami bw'empingu?

² Yezu, anacihamagala omwana murho amuheba ekarhi kabo, ³ n'ikuderha erhi: mmubwizire okuli, akaba murhahindusire mukaba n'ankamurhabiri nk'abana barho murhakaja omu bwami bw'empingu. ⁴ Co cirhumire, ngasi yeshi waci rhohye nk'oyu mwana ye wabe mukulu omu bwami bw'empingu. ⁵ N'owankirire oku izino lyani omwana murho oli nk'oyu, erhi nie ayankirire.

⁶ Ci, erhi nkahankayishiba owahirimye owundi kubi muguma muli aba bana banyemire, kwo kukulu kuli ye ashwekerwe omw'igosi ibuye ly'okushwera, banamukwebe aha idako ly'enyanja.

⁷ Buhanya omw'igulu erhi bisarhazo birhuma! Bulya ebyo bishinganine okuyisha ebisarhazo; ci obuhanya oku oyu muntu ebisarhazo byarhengeka! ⁸ Ankaba okuboko kwawe erhi kugulu kwawe binakakusarhaza mpu lyo ohirima, obitwe n'okubikabulira kuli na nawe; kuli kwinja kuli we okudaha omu buzine oli cirema kandi erhi kuboko kuguma, ahali h'okuba na magulu kandi erhi maboko abiri n'okuyishi kwebwa omu muliro gw'ensiku n'amango. ⁹ N'akaba isu lyawe lyo likulerhera ebisarhazo olirhomole n'okulikabulira kuli na nawe; kuli kw'inja kuli we oje omu buzine, n'isu liguma, ahali h'okuba n'amasu abiri agaliyishi kabulirwa omu muliro gwe myakula.

¹⁰ Mucilange mulanye mumanye murhaganyagusagya ciru n'omuguma muli aba bana barôrho; bulya mmubwizire oku bamalaika babo omumpigu ngasi mango baba bayimanzire emalanga ga larha oli omu mpingu. ¹¹ Bulya mwene-omuntu ayishire okuciza owalihezire. ¹² Kurhi mubwine? Erhi omuntu akaba agwerhe bibuzi igana, ci muli byo cibuzi ciguma cihere, karhankasiga balya makumi gali mwenda na mwenda oku ntundo, n'okujalonza cirya caherage? ¹³ Kandi, erh'ankacishimana, mmubwizire okunali, anashubiyunva anashagaluka bwenene kuli eco cibuzi kulusha galya makumi gali mwenda na mwenda garhali gahezire. ¹⁴ Kwo n'okwo, gurhali bulonza bwasho winyu w'empingu arhalonzagya ciru n'omuguma muli ababana barho ahere.

¹⁵ Erhi mwene winyu ankajira ecaha, ogende omuhanûle obe oli naye. Nka akakuyunva, erhi ogalwire mwene winyu. ¹⁶ Ci, erhi akaba arhakuyunvirhi, orhôle haguma na nawe wundi muntu muguma erhi babiri, lyo ngasi mwanzi guba n'obuhamirizè bwa Bantu babiri erhi basharhu. ¹⁷ Ci erhi ankalahira okubayunva, onabwire ab'omunyumpa ya Nnamahanga; n'erhi ankalahira kandi bw'ayunva ab'omu nyumpa ya Nnamahanga, omule nka mpagani erhi muvurhisa. ¹⁸ Mmubwizire okunali, ngasi coshi mwafundike en'igulu, canaba cifundike n'omupingu, na ngasi coshi mwafundûle en'igulu caba cifundûle n'omu mpingu. ¹⁹ Mmubwizire kandi oku, erhi ankaba bantu babiri muli mwe balaganine haguma hano, igulu oku bahûna ngasi kantu koshi bakalonza, bakahâbwa na Larha oli omu mpingu. ²⁰ Bulya aha babiri erhi basharhu bashimanine okw'izino lyani nâni, nanaba omu kagarhi kabo.

²¹ Okubundi Petro anaciyegera ahaburhambi bwage, n'okumubwira erhi: Nnâhamwirhu, kanga kwanine okubabalira mwene wâni, erhi ankanjirira ecaha?

²² Yezu amushuza erhi: ntakubwiziri nti kuhika kali nda, cikwone kali makumi gali nda na kali nda. ²³ Co cirhumire, obwami bw'empingu bushushanyibwe n'owami walonzagya okudôsa abambali bamuhe omuganjo gw'ebirugu byage. ²⁴ Erhi aba amarhondera okuganja, bamulerhera muntu muguma wali omugwerhe ntalanta bihumbi ikumi. ²⁵ Nkoku arhali gwerhe oku ankahashi lyula, Nnâhamwabo arhegeka mpu bamuguze, ye, na mukage, n'abana bage, na ngasi byoshi âli agwerhe, lyo abona oku alyula ogwo mwenda. ²⁶ Olya mukazi, acirhimba oku idaho, anafukama emalanga gage, n'okuderha erhi: Nnâhamwirhu, orhangininda nani, nacishikulyula byoshi. ²⁷ Amuyunviza obwonjo, nnâwabo olya mukazi amulika agenda, n'okumulekera gulya mwenda. ²⁸ Enyuma z'okuhuluka kwage, olya mukozi ashimana muguma womu babo bakozi alimugwerhe ideni lya masenki igana ga nfaranga. Anacimurhuluba ammuhamira emumiro, n'okumubwira: lyula ebyani omugwerhe.

²⁹ Olya wabo mukazi, acikweba okw'idaho, amuyinginga, amubwira erhi: ninda nani, naciyishikulyûla. ³⁰ Cikwone olya wabo arhamuyunvagya, lero amugendana amukwenda omu mugozi, kuhika alyûle. ³¹ Ababo boshi, erhi babona ebyo byabire, bagaya bwenene, banacigenda babwira Nnâhamwabo oku byabire kwoshi.

³² Okubundi nnahamwabo anacihamagala olya mukozi, n'oku mubwira erhi: mukozi mubi, nakubabalire omwenda gwoshi, nka wampunaga; ³³ ka wêki orhali oshinganine okubabalira owinyu, nka oku nakubabaliraga? ³⁴ Lero Nnâhamwabo, agaya, amuha abokumushweka, kuhika alyûle omwenda gwage gwoshi ogwanalimushinganine. ³⁵ Ntyo kwo Larha w'empingu ayishimujirira, erhi ankaba ngasi muguma arhababaliri owabo n'omurhima gwoshi.