¹ Erhi kuhéra nsiku ndarhu, yezu arhola Petro, na Yokobo, bon'omulumuna, Yohana, abaheka oku ntondo ndiri. ² Enshusho yaage yahindamuka emalanga gaabo; obusu bwage bwashushana nk'izuba, n'emishangi yage myeeru nka bulangale. ³ Alaga, Musa na Eliya bababonekera, bakashambala bonaye. ⁴ Petro, arhonder'aderha, abwira Yezu: nnahamwirhu, kuli kwinja rhubeere hano; okalonza, na yubaka ho nyumpa zisharhu, nguma yawe, eyindi ya Musa, n'eyindi ya Eliya.

⁵ Amango aciri aderha, olwikungu luli lwamoleka lwababwikira. N'izu lyanyunvikana omu lwikungu lyaderha: oyu ye mugala wani muzigirwa, kusiimisa ansimiisa: mukamuyunva!

⁶ Erhi bayumva liry'izu, entumwa za hirima buubi, zanayoboha bwenene.

⁷ Cikwone yezu, abaja ho, abahumako, aderha zuuki, murhayobohe. ⁸ Bayinamula amasu, babona yezu yene nta windi.

⁹ Erhi bacija yandagala oku ntondo, yezu anakomereza mpu: murhabwiraga omuntu ebi mwabwine, kuhika mwene muntu afûke omu bafu.

¹⁰ Entumwa za mudosa mpu: bici birhuma abalimu b'amarhegeko bàderha mpu Eliya àgwasirwe arhang'iyiisha?

¹¹ Ashuza erhi: kobiri Eliya agwasirwe ayiishe, arheganye byooshi. ¹² Cikwone mmubwizire oku Eliya miira ayiishaga, barhamumanyaga, cikwone bamujira nk'oku bali balonzize. Ntyo kwo mwene-muntu naye ayishishushanyibwa nabo. ¹³ Entumwa za yumva bw'inja oku ababwizire ogwa Yohana mubatiza.

¹⁴ Erhi bacihika aha Bantu, muntu muguma ayisha afukama embere za yezu, anaderha: ¹⁵ mwalimu, obere mugala wani bwonjo, alwala oluhungu, alibusire bwenene; kanji kanji akola akacirhimba eciiko erhi omu mishi. ¹⁶ Namuhekire entumwa zawe, cikwone barhahashaga okumufumya.

¹⁷ Yezu ashuza, kashazi kaligurhi ncikwanine mbere na ninyu? Kuhika mangahi nashub'imulinda? Nderheragi ye hano. ¹⁸ Yezu amukankamira oyo muzimu, anamurhengamo.

¹⁹ Obwo entumwa za yegera hofi na yezu, za mubwira bufundafunda: bici byarhumire rhurhahasha oku hinva oyo muzimu?

²⁰ Yezu abashuza, bulya obwemere bwinyu bulk bunyi. Kobinali mmubwizire nka mwaligwerhe obwemere buli nka nderhe (mogomogo) ya haradari, mwanabwira eyi ntondo: rheng'aho one hala, enagende; nantaabyo bya nkamuyabira. ²¹ Cikwone kuhuna n'okushalisa kwone kwankahasha oku hinva omuzimu wa mweene oyu.

²² Erhi baciba bali boshi omu Galilaya, Yesu ababwira: Mwene muntu ayishi hanwa omu maboko g'abantu; ²³ Bayishi muyirha, n'olusiku lwa kasharhu ayishi fûka. Bâba burhe bwenene.

²⁴ Erhi bahika e kapernaumu, abavurhisa b'ikoli ly'enyumpa ya Nnamahanga bajaho Petro, banamubwira: kamwalimu winyu yehe arhavurha endrakimu zibirhi?

²⁵ Acuza, neeci la. Erhi aja omu nyumpa, yezu ayirukir'amubwira, erhi: kurhi okengire, Simoni? Abami bigulu, bandi bavurhisa ikoli? Kabambali babo, erhi bagenyi? Okengire ²⁶ amubwira erhi: bigolo. Na yezu amushuza: kuziga abambali barharhegesirwi okuvurha. ²⁷ Cikwone, lyo rhurhagibagayisa, ojage oku nyanja, okwebe olulobo, okulule ensamaki ntanzi yayiciyisha; onayibumbule akanwa, wabona mwo olufaranga lw'ecicere. Olurhole, obahe lwo, rhuluvurhe rhwembi.