¹ Abafarisayo n'abasandukayo, mpu bamurhege, bamuhuna mpu ajire balangule, ecimanyiso cirhenzire oku nkuba.

² Yezu abashuza erhi: bijingo munaderhe: mpu irhondo lyaba linja, bulya oku nkuba kwa madukula; na sezi sezi: ³ ene gwaba mudumbi, bulya ebitû bishushire olwirungu. Muyiishi hugula ebiri oku nkuba, cikwone murhahasha okuhuguula ogw'ebimanyiso by'amango. ⁴ Eri iburha libi na ndyalya lihunyire ecisomerine; nta co cirhangaza ci ndi bâahabwa kuleka cirya ca Yona. Aho abaleka, acigendera.

⁵ Abigirizibwa, bayikirira ishiriza, bayigabira okurhola emigati. ⁶ Yezu ababwira mpu: mucilange bwinja munamanye engeso z'abafarisayo n'ey'abasandukayo.

⁷ Abigirizibwa bone barhanya, banabwirana: bulya rhurharhozire emigati.

⁸ Yezu, erhi akumanya, aderha: bici birhumire muli mwarhanya, bantu babwemere bunyi, mpu bulya rhurhadwirhe migati? ⁹ Kamurhaciyunva bw'inja, kamurhacikengiri erya migati irhanu nabegeraga abantu bihumbi birhanu na ntanda zinga mwahesire, ¹⁰ n'erya migati nda yayigusagya Bantu bihumbi bini na ntanda zinga zasigire? ¹¹ Gurhi murhayunvirhi bw'inja oku ntamubwiziri gwa migati? Mucilange okungezo y'abafarisayo n'ey'abasandukayo. ¹² Lero bamanya oku arhabwizire mpu bacilange oku nyigirizo z'abafarisayo n'ez'abasandukayo.

¹³ Yezu, erhi ahika ekayisaria, cihugo cé Filipo, adosa abaganda bage: gurhi bakaderha, nie, mwene-muntu?

¹⁴ Bashuza mpu: haguma banaderhe mpu we Yohana mbatiza; n'abandi, mpu Eliya, abandi, mpu Yeremia, erhi muguma omubalebi.

¹⁵ Na ninyu, abadosa, gurhi kuderha mpu nie ndi?

¹⁶ Simoni Petro ashuza erhi: we kristu mwene nnamahanga oziine.

¹⁷ Yezu, ashuza, amubwira: oli n'iragi Simoni, mwene Yona; bulya gurhali mubiri erhi muko gukumanyisize okwo, ci larha oli omumpingu. ¹⁸ Na nani, nkubwizire oku oli ibuye, na kuli eryo ibuye nayubaka kwo akanisa, ciru n'amami g'ékuzimu garhakakahima. ¹⁹ Nanakuhe enfungulo z'obwami bw'empingu: n'ebiwayemerera n'ingulu byayemerera empinguni, na ngasi ebi walahirira en'igulu byalahirirwe empingu. ²⁰ Obwo anakomereza abigirizibwa bage mpu barhabwiraga omuntu yeshi okuye kristu.

²¹ Kurhenga ago mango yezu arhondera okumanyisa abaganda bage oku kukwanine aje e yerusalemu, âli buzibwe bwenene n'abashosi, n'abashamuka bihano, n'abalimu b'amarhegeko, anayiirhwa, n'okulw'ensiku isharhu afuka.

²² Petro, amuheeka eburhambi, arhondera, amukalihira, anamubwira: nnahamwirhu! Nnamahanga akulanzire, orhabe ntyo.

²³ Cikwone yezu, ahindamuka, abwira Petro: ntenga ho, shetani! Odwirhe was nshumika kubi; bulya orhagererizi nka Nnamahanga, cikwone ogererize ak'abantu.

²⁴ Lero yezu abwira abigirizibwa bage erhi: owankalonza mpu rhugende rhweshi naye, aleke oku kacigerereza, abarhule omusalaba gwage, ashimbulire. ²⁵ Bulya owalonza okuciza obuzine bwage ye wabuheza, ci owabuheza erhi nie ntumire ye wabicize. ²⁶ Bunguke buci omuntu akabona erhi ankahisa igulu lyoshi nkakaheza obuzine bwage? Mahali akantu omuntu ankahana ahaali h'obuzine bwage? ²⁷ Bulya mwene omuntu ayish'iyisha omubulangashane bwishe, boshi na bamalaika bage; lero bwo ayish'ilyula ngasi muguma okubijiro byage. ²⁸ Mmubwizire okunali, baguma muli ababali aha barhaafe, barhanacibona mwene muntu ayishire omu bwami bwage.