¹ Omw'olwo lusiku, Yesu ayimuka omu nyumpa, ajitamala eburhambi bw'enyanja. ² Olubaga lunene lwaja ahali, ashonera omu bwarho buguma, anatamala. N'olwo lubaga lwoshi lwa yimanga eburhambi. ³ Anacibabwira binji oku migani, aderha: Omurhwezi Anayimuka ajirhwera. ⁴ Erhi akola aja rhwera, mburho nguma zarhogera eburhambi bw'enjira: orhunyunyi rhwayisha rhwa zirya. ⁵ Ezindi zarhogera omu mabuye, aharhali budaka banji; zanamera dubaduba, bulya zirhabuganaga budaka; ⁶ Cikwone, erhi izuba libasha, zahya zanayuma, Bulya nta mizi zaligwerhe. ⁷ Ezindi zarhogera omu mishugi: emishangi yakula yana zi hehemaza. ⁸ Ezindi zarhogera omu idaho linja; zaleheka, nguma igana, eyindi makumi galindarhu, eyindi makumi gasharhu. ⁹ Ogwerhe amarhwiri g'okuyunva, ayunve.

¹⁰ Entumwa za yegerera n'okumubwira: Bulya gurhi oli wababwira oku migani?

¹¹ Yesu abashuza: Bulya mwene mwahirwe oku manya amahwe g'obwami ¹² bw'empingu, ci abo bohé barhakuhabagwa. Bulya bayishi hâ ogwerhe, ayishi cibera mugale, ci orhagwerhi bamurhola n'ehi agwerhe. ¹³ Co cirhumire ndi nababwira omu migani, bulya okubalola barhabona, okubayunva barhana yunvirhi (barhamanya).

¹⁴ Lero obulebi bw'Isaya bwa hikirira kulibo: Mwakazi yunva n'amarhwiri ginyu, ci murhayunve; mwakazi lolereza n'amasu ginyu ci murhabone.

¹⁵ Bulya omurhima gw'olubaga gwa hinzire; bafunisire amarhwiri gabo, bazibire amasu mpu barhekinona n'amasu gabo, baleki yunva n'amarhwiri gabo, barhacigerereze omu mirhima yabo, barhahinduke binja, lyo ntakibabuka.

¹⁶ Ci iragi ly'amasu yinyu, Bulya galigabona, n'amarhwiri ginyu Bulya galigayunva! ¹⁷ Mmubwizire okunali, balebi banji na bashinganya banji balonzize okubona ebi mulimwabona, ci barhabona, okuyunva ebi mulimwayunva, ci barhabiyunvagya.

¹⁸ Mwehe yunvagi oku gulya mugani gw'omurhwezi w'emburho oku gudesire: ¹⁹ Amango omuntu akayunva omwanzi gw'obwami abuligi nabula kuguyunva bwinja, omubi anayishe acirholere ehyali rhwezirwe omu mirhima gwage: Oyo muntu he olya wayankirir'emburho oku njira. ²⁰ Owayankirire emburho aholukarabuye, ye olya oyunva Omwanzi anagurhole n'obushagaluke; ²¹ Cikwone gurha gwerhi emizi gurha gwerhi n'ensimiko, guna baberemwo kasangi kasungunu kone, erhi amalibuko n'okushimbululwa biyisha erhi kanwa karhuma, honaho anahirime erhi aleka obwemere. ²² Owamirage emburho omu mishugi, ye olya oyunva Omwanzi, cikwone okukarhanya ebyobulamu bwage, muli gano mango n'obusime bw'okurhebana bula bulerhwa n'obugale, binahunye ogwo mwanzi, gurhacibonaga malehe. ²³ Owamiraga emburho omwidaho linja, ye okayunva omwanzi n'okugumanya; analeheke, n'emogomogo nguma yaleheka igana, eyindi makumi galindrhu, eyindi makumi gashsrhu.

²⁴ Anacibabwira ogundi mugani, ababwira: Obwami bw'empigu bushusha muntu muguma wamiraga emburho nyinja omukwage. ²⁵ Cikwone erhi abantu bakola bagwishire, omushambo wage ayisha, arhwera enshenga omugarhi k'engano anacigendera. ²⁶ Erhi engano emera ehan'amalehe, enshenga nayo yabonekana. ²⁷ Abambali b'anahano w'enyumpa bayishimubwira: Nnahamwirhu, karhali mburho nyinja walirhwezire omwishwa lyawe? Ngahigi lero eyinshena erhenzire?

²⁸ Anacibashuza: mushombanyi Oyo wajiraga Ntyo. N'abambali bamubwira: Kolonzize rhugendi ikula?

²⁹ Nanga, ashuza, bulya omu kukula enshenga mwanakuliramwo n'engano haguma. ³⁰ Muleke bikulire haguma, nguma n'eyindi kuhika amango g'okuhumbula, agomango g'okuhumbula, nambwire abahumbuzi: Murhangi kula enshenga, munaishweke marhulo marhulo eyocibwe, ci muhake engano nyinja omu nguli yani.

³¹ Ababwira ogundi mugani, ababwira: Obwami bw'empingu bushusha enderhere y'omurhi gw'eharadali muntu muguma arholaga ajirhwera omwishwa lyage. ³² Ebà nsungunu bwenene kulusha Ezindi zoshi; ci nka yamezirage enanenehe kulusha ezindi zoshi n'okubà murhi munene, ciru n'orhunyunyi rhw'emalunga rhwayisha rhuyubake omu marhami gagwo.

³³ Aciribabwira ogundi mugani: Obwami bw'empingu bushusha elevire (lwango, ngezo), mukazi muguma arholaga Agusha omu nshano ya banamaha basharhu, kuhika obuntu bwoshi bwarhunda ³⁴ Yezu abwira abantu ebyobyoshi oku migani, arhanakagibabwira buzira migani, ³⁵ mpu lyo kuhikirira okwaderhagwa n'omulebi: Omu kanwa kani mwarhenga emigani, bayishimubwira ebya fulisirwe Kurhenga Mira, igulu lilemwe.

³⁶ Erhi aciba amalika olubaga, adaha omu nyumpa. Abigirizibwa bage, yamuyegera, baderha: Orhuhugulire gulya mugani gw'enshenga.

³⁷ Yezu abashuza: Omira emburho nyinja, ye mwene omuntu; ³⁸ ishwa, lyo igulu; emburho nyinja, bo bana b'omubwami; enshenga, bo bana b'omubî; ³⁹ omushombanyi warhweraga enshenga, ye shetani; ebihumbulwa, kwo kuli kuhwa kw'igulu; abahumbuzi, bo ba malaika. ⁴⁰ Nkakulya bakûla omusihe omw'ishwa, bagukwebe oku muliro, ntyo kwo byanabé omu kuhwa kw'igulu. ⁴¹ Mwene omuntu ayishihabwa ba malaika bage, bakûle omu bwami bwage ngasi boshi bahirimya abandi omu byaha n'abajira amabî. ⁴² N'okubakweba omu cibeyi c'omuliro mudarhi, omwo mwayishibà emirenge n'okushw'amino. ⁴³ Obwo abashinganya bayishi ka langashana k'izuba omu bwami bw'ishe wabo. Ogwerhe amarhwiri gokuyunva ayunve.

⁴⁴ Obwami bw'empingu Kandi bushusha ebirugu (bugale) bufulike omw'ishwa liguma. Omuntu wabibonaga aciri na bifulika; n'omu bishagala bwage angenda aguza ebyali gwerhe byoshi, anagula eryo ishwa.

⁴⁵ Obwami bw'empingu Kandi bushushana n'omurhimbuzi walonzagya amagerha minja. ⁴⁶ Erhi acibona igerha ly'engulo nene; agendikuza ebyaligwerhe byoshi, n'okuligula.

⁴⁷ Obwami bw'empingu Kandi bushushine n'akeshe kakwebe omu nyanja kagwarha esamaki za ngasi lubero. ⁴⁸ Erhi kaba kayunjwire, abadubi bakakulula; na, enyuma hamagala oku burhambi, bakabulire ezali mbî ⁴⁹ Ntyo kwo byabe omu kuhwa kw'igulu. Ba malaika bayishi yisha baberule abali oku binja. ⁵⁰ Babakwebe omu muliro; omwo kubage kulaka n'oku kenyeza amino.

⁵¹ Ka mwayunvirhe ebyo byoshi? Bamushuza, neci.

⁵² Anacibabwira: Co cirhumire ngasi Mwigiriza ohindusire mwana w'obwami bw'empingu ashushire nnanyumpa orhozire oku birugu byage bihyahya n'oku bikulukulu.

⁵³ Erhi Yesu aba amayusa eyo migani, arhenga eyomunda.

⁵⁴ Erhi ahika omu lugo lwage ajayigiriza omu masinagogi, kuhika abamuyunvirhe basomerwa banaderha: Ngahi okuzire obu bwenge n'ebi bisomerine? ⁵⁵ K'arhali mwana was mubijni oyu? Ka Nina k'arhali ye Mariya? Na Yakobo, Yozefu, Simoni na Yuda ka barhali balumuna? ⁵⁶ Na balibabo karhali haguma na nirhu bali? Ngahi biri bya marhenga ebyo byoshi?

⁵⁷ Ebyo byarhuma barhamuyemera. Ci Yezu ababwira: Omulebi arha ganyagusibwa omurhali omu lugo lwage n'omu nyumpa yage. ⁵⁸ Arha jiraga bisomerine binji aho, erhi kubula bwemere kwabo kurhuma.