¹ Ago mango, Yesu ayicira omu mashwa g'engano olusiku lwa Sabato. Abaganda bage bali bamashalika, bana bahagula emihule banairya. ² Abafarisayo, erhi babona Ntyo, bamubwira: ala oku abaganda bawe banajira ebirhayemerirwi okujirwa oku Sabato.

³ Cikwoki Yesu abashuza: kamurhasagimanya gurhi Daudi ajiraga erhi omashalika, ye n'ababali bonaye; ⁴ gurhi ajaga omunyumpa ya Nnamahanga, alya emigati y'amarheganyo, erhi arhanaliyemerirwe, ciru nabo bali bonaye bohahe, ci yalibikirwe abadahwa bone. ⁵ Erhi, ka murhasagimanya omu marhegeko oku, ensiku za sabato abadahwa banavune esabato omunyumpa ya Nnamahanga erhi barhanajijiri caha? ⁶ Cikwone, mmubwizire, hano hali akantu kakulu kulusha enyumpa ya Nnamahanga. ⁷ Mucimanyage kwo gurhi okwo: bwonjo nnonza, ci arhali ntulo, murhankatwire olw'abarhalikwo ishembo. ⁸ Bulya Mwene Omuntu ye mukulu w'e Sabato.

⁹ Erhi arhenga aho, Yesu aja omu Cishagala. ¹⁰ Anacibona muli omuntu ohozire okuboko. Badosa Yesu: kabiyemerirwe oku fumya olw'e Sabato? Kwali kulonza igwarhiro ly'oku musongera.

¹¹ Abashuza: Indi mulimwe wakaba agwerhe cibuzi ciguma cone cigali rhogera emusima lwa sabato, orhankagendi ci shayula? ¹² Kanga omuntu alushire ecibuzi! Kusiga kuyemerirwe okujira aminja olw'e Sabato. ¹³ Lero abwira olya muntu: lambula okuboko kwawe, akulambula kwan'ashubira okuba kwinja nk'okw'abo. ¹⁴ Abafarisayo bagenda banaja omw'ihano gurhi bankamuyirha.

¹⁵ Cikwoki Yesu, erhi amanya, aciyegula arhenga eyomunda. Lubaga lwinji lwa mukulikira. Afumya abalwala boshi. ¹⁶ Abakomereza bwenene oku barha mushobekaga. ¹⁷ Lyo bihikirira ebya derhagwa n'omulebi, Isaya: ¹⁸ Ala omukozi wani nacishogaga, muzigirwa wani, oyu omurhima gwani guzigira. Namuhebakwo mûka wani, nantyo ye wamanyisa obushinganya emw'olubaga. ²² Honaho bamu lerhera omuntu olimwo omuzimu, muhurha na kaduma, anamufumya, kuhika oko kaduma kaderha kanabona. ²³ Abaly'aho basomerwa baderha: karhi olya mwene Daudi oyu?

²⁴ Abafarisayo, erhi bayunva Ntyo, baderha: oyu muntu arhali ahinva abazimu ci belzeburi orhumire, omukulu w'abazimu.

²⁵ Nka ntyo Yezu amanya entanya zabo, ababwira: Ngasi bwami buciberamwo bwone kuhwa buhwa, na ngasi cishagala erhi nyumpa yanka ciberamwo yone erhankayimanga. ²⁶ Nka shetani ankahinva shetani, erhi amacigaba yene; kurhigi lero Obwami bwage bwakaciyimanga? ²⁷ Nkaba nani belzeburi ye mpinvamwo abazimu, abana binyu nabo bahinva kuli ndi? Co cirhumire bone bayishi mutwira olubanja. ²⁸ Ci, erhi ankaba oku Mûka gwa Nnamahanga mpinva abazimu, Obwami bwa Nnamahanga bwayishire emunda muli!

²⁹ Erhi, gurhi wankaja omu mw'omulume w'emisî omunyage ebyagwerhe nka orharhenziri mushweka burhanzi? Ntyo kwone kwaka munyaga.

³⁰ Oyu rhurhali rhwenaye erhi ali mushombanyi wani, noyu rhurha rhumbika rhwenaye erhi ali ashandaza.

³¹ Co cirhumire mubwira: Ngasi caha na ngasi cijaci byana babalirwe oku Bantu, ci ecijaci cajacirwe mûka cirhakababalirwa. ³² Owaderhe kubî omwana w'omuntu, anababalirwe; ci Owaderhe kubî mûka mwimana, arhakababalirwa ciru gano mango erhi agayishe.

³³ Erhi baderha omurhi mwinja n'irehe lyagwo Liri linja, omurhi mubi n'irehe lyagwo. ³⁴ Eri iburha lyenjoka, gurhi mwankahashi heba e binja, muba na babi? Bulya ebiyunjwire omu mirhima byo akanwa kaderha. ³⁵ Omuntu mwinja omu cibikiro cinja arhenza ebinja, n'omuntu mubi omu cibikiro cibi arhenza ebibi. ³⁶ Mmubwizire kwo: olusiku lw'okutw'olubanja, abantu badosibwe olubanja ngasi myanzi erhali kwanine. ³⁷ Bulya myanzi yawe yakuyezè, na myanzi yawe yakushweke.

³⁸ Lero baguma omu bandisi n'abafarsayo bamubwira: Mwigiriza, rhulonzize rhubone oku wajira ebirhangaza.

³⁹ Abashuza: Iburha libi na lya bishungu lyamohuna ecirhangaza, lirhacihabwe cindi cirhangaza kulusha cirya c'omulebi Yona. ⁴⁰ Bulya, nkakulya Yona aberaga miregerege isharhu na madufu gasharhu omunda y'ensamaki nene, kwonakwo omwana w'omuntu ayishihebwa miregerege na madufu gasharhu omu budaka. ⁴¹ Abantu b'eninawi bayishi yimuka, lulya lusiku lw'okutw'olubanja, bone bana bayaze, Bulya bohe baciyunjuzize oku nyigirizo za Yona; lolaga hano hakola hali olushire Yona. ⁴² Omwamikazi w'e Medi ayishi yimanga, olusiku lw'okutw'olubanja, bone eri iburha analiyaze, Bulya ayishire arhenga hali bwenene mpu ayunve obukengere bwa Sulemani, lolaga, hano hakola hali olushire Sulemani.

⁴³ Amango omuzimu mubi amarhenga omu muntu, anagende aharhali mishi, ajalonza aha arhamukira, ahabule. ⁴⁴ Lero anaderhe: nacishubirira omu nyumpa yani narhenga; na, erhi ayisha, ashimane erhalimwondi, mpyajire ena bambirwe bwinja. ⁴⁵ Anagende, anajilerha bandi bazimu nda babi kumulusha; banagandaze mwo, n'akalamo kazinda k'oyomuntu kanabe kabi kulusha akarhanzi. Kwo bayishibà okw'eriburha libi.

⁴⁶ Oku Yesu aciri aganiza olubaga, lola, nnina n'abalumuna, bakola bali ahambuga, balonza oku mudesa. ⁴⁷ Omuntu ayisha amubwira: Lola, nyoko na balumuna bawe bali ahambuga, bali balonz'okukudesa.

⁴⁸ Cikwone Yezu ashuza oyo wamubwiraga: Ndi nyama, erhi bandi balumuna bani? ⁴⁹ Buzinda, alambula okuboko oku baganda bage, aderha: Loli nyama na balumuna bani. ⁵⁰ Bulya, yeshi wajire amalonza ga Larha oli omu mpingu, oyo ye mulumuna wani, na mwali wirhu na nyama.