¹ Gbigbɔ kinkwε kplɔ yesu do yi Zogbeji. Legba bo tinü kpɔn. ² Ke yesu bla onu na azan kandé kpo ozan kandé, hovε bo ci yesu. ³ Ɛmε tinkpɔntɔ bo tε kpɔ yesu bo lɔ nü bio: « Na o nyi Mawu we ovi, ɖégbe na εkpεye na yo a trɔ zun kpɔnnɔ. » ⁴ Yesu bo ɖo ewu nü bio: « ye wlan bio, "gbetɔ ɔn le εgbε na onu ɖuɖu ɖo ɖio, vɔ gbetɔ le εgbε na oxo ke tɔn le Mawu we numε". » ⁵ Legba trɔ kɔ yesu do yi tinxo ke yi jixwe le otoxo kinkɔn we cɔcixo ji. ⁶ Bo lɔ bio: « Na o nyi Mawu we ovi, dɔnjε odo; ɖo ye wlin bio: "Mawu na ɖegbe na dɔla, itɔnya ya mɔ kpɔn jiwe." Kpo "Ye na hinwe do ɔlɔ yo tɔn yo nu na ɔfɔ tɔ we ɔn na do klin εkpεti." » ⁷ Vɔ yesu ɖo ewu nú bio: « ye mɔ wlin bio: "ɔnɖo tin xwetɔ Mawu tɔwe kpɔn." » ⁸ Legba mɔ trɔ kɔ yesu do yi tinxo yi jixwe ɖé bo sɔ gaɖuxwe εgbεmεtɔn kpo kinklin ye tɔn sɔ xlé. ⁹ Bo lɔ ni bio, « ko na sɔ nuhinye bi sɔna we na o blibɔ ŋukun danmε na, bo kafu wu. » ¹⁰ Siε-ɔ yesu bo lɔ nü bio: « Legba! tεyile wuye ɖo ye wlin bio: "xwetɔ Mawu tɔwe ɖoɖio wε ona kafu a bo sɔ odan nü." » ¹¹ Legba jo yesu do, Mawu dɔlaye bo va na onu ɖuɖu wi. ¹² Ke yesu sé bio ye wlé ján, e trɔ sin galilé. ¹³ Yesu bo sin Nazareti le Kapεnawum we oto ke le ahá na galilé we nyixo ji le Zabulɔn kpo Nεftali. ¹⁴ E kiye va emε léɖike oxo lɔ na εmεtɔ Ezai lɔɖo ha: ¹⁵ « Zabilon kpo Nεftali we oto, ke lé dodan εhu kɔn lé judin we godo; galilé bo nyi εmεke ɔn nyɔn Mawu we oto! ¹⁶ Otogun ke lé vuvlumε kpɔn kinklin, kpo εmε ke lé oto mimaviye mε bo le oku mε, kinklin ɖe va. » ¹⁷ Sɔn gan hin mε, yesu tá Mawu xo lilɔ bo lɔ nɔ bio: « Mitrɔ jimε ɖo Mawu we gaɖu xwe viva kpɔ. » ¹⁸ Ke yesu o gbɔn galilé we oto to nò, a kpɔn nɔvinɔ ɔwe ɖe, Simɔn ke ye nɔ yo bio Pyε kpo nɔvi-ɔ André. Nɔnvinɔye bo da oɖo oɖo nɔ, ɖo oɖo datɔ wε ye nyi. ¹⁹ Yesu lɔ na ye bio: « Mi va, mi xodo ko na na mi na nyi εmε gbetɔ wlin gan tɔ. » ²⁰ Zɔnɖokpo, nɔnvinɔnye jo oɖo ye tɔn do bo xo do yesu. ²¹ Ke yesu wlé omɔn, e mɔn kpɔn nɔnvinɔ ɔwe ɖe, jaki ke nyi Zebede wevi, kpo nɔvi-ɔ jan. Ye kpo ya tɔ Zebede wε lé otɔjihun-ɔ mε, ye bo jla oɖo ɖo nɔ. Yesu bo yɔ ye. ²² Zɔnɖokpo, ye jo ye tɔ do, bo xo do yesu. ²³ Yesu gbɔn galilé we oto-ɔ mε hélélé, bo kplan onu gbɔn cɔcixo yetɔn mε, bo do εwin nyɔnε Mawu we gaɖuxwe tɔn bo gɔ ɔdɔn sia ɔdɔn ke gbε le togun-ɔ mε. ²⁴ Yesu we nyiko gbakpe sili we oto-ɔ hélélé mε, εmεye bo sɔ ɔdɔn nɔ ye do va nü, εmε ke, gbε ɖo ɔdɔn. Voe-voe ye, kpo cakacaka le susumε ye, εmε ke gɔ kpo gbigbɔ nyanyla ye kpo, kukpoa we ɔdɔn kpo εtεku nɔ ye. Yesu bo gɔ ɔdɔn na ye. ²⁵ εmεye xo do yesu gbagbagba sɔn galilé, sɔndeka-polu, sɔn jeluzalem, sɔn jude kpo sɔn judin we goolo.