¹ Ke yesu kpɔn otogun-ɔ, e hε otó-ɔ ji. Ke e hinεnyivɔ, Onu kplanviye yi ekɔn. ² Yesu kεnu bo ta onu kpin kplan ye bio: ³ « Dona na ayanɔye, le gbigbɔmε, ɖo ye tɔn wε nyi Mawu we gaɖu xwe. ⁴ Dona na εme ke vi avi nɔ ye ɖo ye na fa ɔkɔn na ye. ⁵ Dona na εme ke nɔ sɔ yeɖe sɔ xwe ye, ɖo ye wε na ɖu ogu nyixo ji tɔn. ⁶ Dona na εme ke hovε o cinɔ ye kpo ke kɔmε o cinɔ ye, ɖo gomi na gɔye. ⁷ Dona na εme ke nyɔn dɔmεye, do ye na yi dɔmε nyinyɔn. ⁸ Dona na εme ke jimε kɔn na ye, do ye na kpɔn Mawu. ⁹ Dona na εmε ke nɔ kan fifa ye, ɖo ye na yɔ ye bio Mawu wevi. ¹⁰ Dona na εmε ke ye ɖefunna nɔ do oxo jɔxo-ɔ wu, ɖo ye tɔn wε nyi Mawu we gaɖuxwe-ɔ. ¹¹ Dona-nɔ wε mi nyi, na ye zunmi nɔ bo ɖe fun na mi nɔ, alo bo lɔ oxo nyin nyla ye do mian wu-nɔ do blɔ wu tu. ¹² Mi kpɔn jijowε a bo nɔ dona mε taŋu, ɖo ɔxɔ tu mian tɔn glo le sεxwe. Ɖo emɔn wε gbetɔye do vivε si sé na oxo lɔ ɖenyi ke jε unkɔn na miɖo. ¹³ Miye wε nyi nyixoji wa ojε, na ojε va bu vivisisé itɔn, uni wu lε ye na sɔ jlεdo? Ɔn mɔn jεna unti, ye na sɔ-ε kpoŋu sɔ flin ɔfɔ mɔn gbɔn eji. ¹⁴ Mi ye wε nyi εgbε we kinklin. Otoxo ke le osó ji ɔn kpé wu mɔn na bε. ¹⁵ Ɛ mɔn ke, εmεye nɔ tε zogbin a bo cɔn jahui doé wε? Ye nɔ sɔ-ε sɔ ɖo onu ji na do kɔn oxwe-ɔgbe. ¹⁶ Kinklin miantɔn ni klin na gbetɔye na ye a kpɔn odan o nyɔn-ε miantɔnye a bo kafu mianto ke le jiŋukusin. ¹⁷ Mi ko mɔ bu-ú bio ko va a do tutu osεn ye alo oxo lɔ ɖenyi tɔye; kɔn-ɔn va a do tutu ye, vɔ na ye a do va cicε mε. ¹⁸ Lé oxojo oxo mε, kó lɔ na mi nɔ, ɖe kpékpe ke jiŋukusin kpo nyixo na din ɖo ha, εkin ku-in dokpo tété ɔn na tutu le osεn-ɔ wu, gbun na na gan ke mε na ŋusianu va cicε mε. ¹⁹ Pyi wε dɔn εmε ɖe kpékpe ke na gba osεn vitué ɖe a mɔn kplan εmε bu ye bio ye mɔn wasi emɔn. Ɛmε e mɔn ha tɔn na nyi vikpεvi le gaɖu xwe. Vɔ εmε ke na wasi do eji a mɔn kplan εmε buye ɖo e mɔn ha, wε na nyi εmε ɖaxo le ogaɖuxwe mawutɔn. ²⁰ Ko ɖo εpεn e ji na mi nɔ, na mian we jijo nyinyi ɔn hugan wu siklibu tɔ ye kpo falizi tɔ ye tɔn, mi-ɔn kpé wu na ɖiε Mawu we gaɖu xwe. ²¹ Mi sé ye lɔ na εmε san tɔn ye: «: Ɔn na huεmε » kpo: « Ɛmε ɖe kpé-pké ke hu mε ɖe-ɔ ye na ɖo kojo nü. » ²² Vɔ blɔ ko lɔ na mi nɔ εmε ɖe kpe-kpe ke na do aɖi do nɔnvi-ɔ ye na ɖo kojo nü; εmε ke lɔ nɔnvi-ɔ bio « Ɔn nyi onu ti! » εmε e mɔn ha tɔn ye na sɔ-ɛ do yi ɛhzɛ ŋukɔn. Ɛmɛ kena lɔ nɔnvi-ɔ bio « Onu ma nyɔn tɔ » ɛmɛ e mɔn ha tɔn na ɖibla yi zumavɔ mɛ. ²³ E mɔn ke o sɔ onu nina tɔwe yi agba ŋukɔn bo flin bio he mɔ jɔ ɔgɔ do he nɔnviye, ²⁴ jɔ onu nina do agba ŋukɔn a bo vé wasi ɖokpo. Kpo-nɔnvuwe, gbɔxwe a va na onu tɔ we. ²⁵ Wasi ɖokpo kpo ɛme ke do ɛhwɛ nawe nɔ le mɔnji le gan ke mɛ na mi yi ɛhwɛ ŋukɔn nɔ, i hin, ɛmɛ ke do ɛhwɛ na we nɔ na sɔ we sɔ na ɛhwɛ gbotɔ, ɛhwɛ gbotɔ mɔn sɔ we sɔ na sɔja ye mɔn sɔwe do gan kpamɛ. ²⁶ Le oxo jɔ oxo mɛ, ko lɔ na we nɔ, ɔn na tɔn le blɛ na ɔn tu oho ke ɔɖudoe. ²⁷ Mi sé ye lɔ bio, « Mi ká mɔn lɔ aga. » ²⁸ Vɔ ko lɔ na mi ɛmɛ ɖe kpokpoe ke na kpɔn nyɔnnusiɖe e mɔ jlo-e-ɔ, e lɔ aga hohoho le oji itɔn mɛ. ²⁹ Na aɖusi we oto wɛ na na o na klinu-ɔ, gbo-e a bo dé do dindi-ɔn nu ɖo e na nyɔn bio o na nyi oto ɖokponɔ kpo ke na ona oto ɔwe na sɔgbe o mɔn yi zo mavɔ. ³⁰ Na aɖusi we ɔlɔ wɛ na na o na klin nu-ɔ, gbo-e e na nyɔn bio o naɖo ɔlɔ owe ye abo yi zomavɔ. ³¹ Ye mɔn wlan can bio: « Ɛmɛ ɖe kpokpoe ke nyan osi-ɔ bo na mima we wema hui. » ³² Vɔ blɔ ko lɔ na mi nɔ ɛmɛ ɖekpo-kpoe ke nyan osi-ɔ e ko nyi bio dɔfɔgbe wɛn, ŋusuglo e mɔn tɔn wɛ sɔ osi-ɔ do wasi oga lɔ tɔ, ɛmɛ ɖekpo-kpoe ke na va ɖe nyɔnnusi ke ye gbɛ-ɔ yi can lɔ aga. ³³ E mɔn ke, mi sé ye lɔ na mian dagboɛya bio: « Ká mɔn do akpa ke ɔn kpewu na wasi, vɔ sɔ yi we akpagbe na xweto. » ³⁴ E le emɔn mi ko mɔn ta jiŋukunsin ɖo gaɖuxwe Mawu tɔn wɛ, ³⁵ mi ka mɔn ta nyixo can ɖo Mawu we ɔfɔ ɖo tiɔn wɛ, jeluzalem can ɖo toxo oga ɖaxo tɔn wɛ. ³⁶ Mi ka mɔn ta ota mian tɔn, ɖo mi ɔn kpe wu na trɔ oɖa mian tɔn owi alo owe. ³⁷ Na mi lɔ oxo nɔ, oxo mian tɔn ni nyi « Ɛɛ » alo « Oo » nuke va kpe sɔn legba kɔn. ³⁸ Mi sé ye lɔ bio: « O wasi na ko na wasi we. » ³⁹ Vɔ blo ko lɔ na mi nɔ, mi ko mɔn nɔ oté le unkɔn na okun nyla tɔ, ke mi na va bio he abo kpaŋu kɔntɔ-ɛ-ɔ. Na ɛmɛɖe xo tomɛ na we do aɖusi ji-ɔ, trɔ ɖi-ɔ can nü. ⁴⁰ Na ɛmɛ ɖe jlo bio he a mɔn do ɛhwɛ na we ado sɔ ahu tɔwe-ɔ, jo-e do ni sɔ ahu gaga can. ⁴¹ Ɛmɛ ɖekpoe ke kan nɔ na zɔn zɔnni gaga, mɔn zɔn hu gan kpoe. ⁴² Na ɛmɛ ke biɔ we, ka mɔn gbɛ na ɛmɛ ka kan nɔ bio yi mɔn winyan na he. ⁴³ Mi sé ye lɔ bio, « nyi wan na ɔwegɔtɔwe a bo gbɛ wan na kintɔ tɔwe. » Vɔ blɔ ko lɔ na mi nɔ: « Mi nyi wan na mian we kintɔye a bo ho ɛɖɛ na ɛmɛke ɖefun na mi nɔ ye. Mi yla ɛmɛ ke do onu wu ni nɔ ye, mi wa onu nyɔn-ɛ na ɛmɛke gbɛ owan na miye. » ⁴⁴ Na e le emɔn mi na nyi ovi na mian tɔ ka lé jiŋukunsin. ⁴⁵ Ɖo Mawu nɔ tɛ oxwè do dɔmɛylantɔ ye kpo ɛmɛ nyɔn-ɛ tɔ yaji. Mawu bo nɔ na na oju nɔ ja do ɛmɛ jijɔ-ɛ ye kpo ɛmɛ majɔ majɔ ye ji. ⁴⁶ Ɖo na mi nyi wan na ɛmɛ ke nyi owan na mi ye-ɔ alé ni lɛ le emɛ na mi? e mɔn ke takwɛjɔtɔye nɔ wasi taŋu. Mi ɖo na wasi hu ye. ⁴⁷ Na e nyi bio mian nɔviye ɖoɖio wɛ mi nɔ do ogbe na a, onu ni lɛ mi mɔn wasi sɔ hugan hu ɛmɛ diɛye? jimaxosétɔye mɔn nɔ wasi taŋu. ⁴⁸ E le emɔn mi ɖo sɔ gbe, leɖi ke miantɔ ke le jixwe sɔgbe ɖo ha.