¹ Hano yahikire kunkyo, abhaimereri abha amasengero nabhaghaka abha abhanto bhonswe, bhakasha kokora esemi iyu kwita Yesu. ² Bhakamobhoha no okomotangatya kughya ku Liwali Pilato.

³ Enkagha eno Yuda, ono yamokoreye iniko, yaroshe igha Yesu amare kokengerwa ikina, yaibhori no okokyora shimbirya ebhekwe merongo etato ko omonene uwa risengero nabhaghaka, ⁴ no okoghamba igha, "Nkore ikitimba ku kunyankya amanyinga ghano ghatare narisoro." Naho bhakahonshokya, "Nke rekototonia bheto? Mahera aghaho umwene." ⁵ Akatabhuta hanse shimbirya shera mwisengero, akaemoka akaghya iyo akaing'enta.

⁶ Abhaimereri abhanene bhakaghegha shimbirya shera no okoghamba, "Tibhuya kotora shimbirya sheno momongo, kobhora nsheghore amanyinga." ⁷ Bhakabhoryana kwo bhonswe shekaghora omoghondo ughwi ikiribho kobhekwamo abhagheni. ⁸ Kobhora omoghondo ghoyo ngwabherekerwanga, igha, "Omoghondo ugha amanyinga" nunyora mbohene igho.

⁹ Nho eng'ana era yaghambirwe no omoroti Yeremia ryahikire, no okoghamba, "Mbagheghire ebhebhara ibhya shimbirya ebhekwe merongo etato, righori reno ryasemibhwi nabhanto abha Israeli kukughirya yaye, ¹⁰ ghweki mbakoreye ko moghondo oghwe ikiribho, kyo Omokama kigho yandaghereyi."

¹¹ Bhono Yesu yaimereye mobhoronge bhwa Liwali, (na) Liwali akamobhorya, "Uwe norenge omonene uwa Wayahudi?" Yesu akamohonshokerya, "Nuwe okoghamba igho."

¹² Naho enkagha hano yashongeywe (na) abhaimereri abha risengero nabhaghaka, tiyaghambire kentohe.

¹³ Nho Pilato yamotebhiri, "Toraighwa amashongero ghaho ghayohe?" ¹⁴ Nunyora nigho teyahonshokiri ng'ana nunyora nemwe, ku igho Liwali niyaroghoribhwi.

¹⁵ Bhono munyangi yarengenga igha Liwali kohatera omobhohwa omwe ono akwahorwa nabhanto. ¹⁶ Enkagha iyo bharengeho no omobhohwa omokorano irina ryaye Baraba.

¹⁷ Hano bharenge bhaikomaini hamwe, Pilato akabhabhorya, "Newe mukutuna tohatere kukughirya yenyu?" Baraba kasi Yesu ono akobherekerwa Kristo?" ¹⁸ Kobhora yamanyire igha bhamare komoghota kukughira yu urwiso.

¹⁹ Enkagha hano yarenge aikaye ko kitumbe kyaye ikyo okokengera ikina, mokaye akamahera eng'ana no okoghamba, "Otakakora eng'ana yoyonswe ko omonto ono atana isaryo. Kobhora nyankibhwi bhokong'u mokeroto kukughira yaye."

²⁰ Nho abhanene abha amasengero nabhaghaka bhabhaseghire ensango bharusiho Baraba, (na) Yesu aitwe. ²¹ Liwali akabhabhorya, "Nohe arenge ko bhabhere bhano mukutuna ahaterwe?" Bhakaghamba, "Baraba."

²² Pilato akabhatebhya, "Nkoreke Yesu ono akwebherekera Kristo?" Bhoonswe bhakahonshokya, "Mohangeke" ²³ Wonswe akaghamba, "Ni saryoke akore?" Bhakengerya koshesha bhokong'u "Mohangeke."

²⁴ Hano Pilato yaroshe tatore kokora ng'ana yoyonswe, igha ikituri kerengerya, akaghegha amanshe akaisabha amabhoko mobhoronge ubhwe ehamate, no okoghamba, "Oni tenena isoro ighoro iya amanyinga gho omonto ono atana isoro. Moghamahe ghano bhenyu abhene."

²⁵ Abhanto bhonswe bhakaghamba, "Amanyinga ghaye ghabhe kobheto naabhana bheto." ²⁶ Ghweki akamotanshora Baraba kobho, nawe akamotema Yesu niimisharishi akabhahana bhaghi komohangeka.

²⁷ Ho abhasirikare abha Liwali bhagheghire Yesu bhakahika Praitorio arenge mobhasirikare abharu. ²⁸ Bhakamonora shingibho bhakamwibhohya engasho enkangaru. ²⁹ Bhakakora engosira iya amahwa bhakamotora ko omotwe ghwaye, bhakamotora umwere ko kobhoko kwaye kwabhoryo. Bhakamwihighamera no okomokora, bharaghamba, "Mbhuya, Omonene uwa Wayahudi?" ³⁰ Bhakamutwera amate, bhakaghegha umwere bhakamotemera ko omotwe. ³¹ Hano bhamokoranga ghayo okanyora bhamonore engasho nu ukumwibhohya shingibho shyaye, no ukumuhira komohangeka.

³² Hano bharishokire kebhara bhakarora omonto kurwa Krene irina ryaye Simeoni, bhakahamerya kughya nabho okoreke agheghe omosarabha ghwaye. ³³ Hano bhahikire ahase hano hakobherekerwa Goligotha, okorokya igha, "Ahase ahe ekehore ikyo omotwe." ³⁴ Bhakamoha isiki eno yarenge yishoghanibhwi ne endorwe anywe. Hanoyayesamire, tiyayinyoyehe. ³⁵ Enkagha hano bhamohangekire, bhakatwena shingibho shyabho koshetonera ubhwahori ubhwa shikura. ³⁶ Bhakaikara komomahera. ³⁷ Ighoro yo omotwe ghwaye akatorwa amashongero ghaigha, "Ono we Yesu, omonene uwa Wayahudi." ³⁸ Akahangekwa (na) amasaki abhere uwomwe orobhareka urwa bhoryo uwonde bhomosi bhwaye. ³⁹ Bhara bhahetanga bhakaghya bharamokara no ukusingisya emetwe ghyabho ⁴⁰ no okoghamba, "Nuwe watunanga kotabhora risengero no okorehaghasha ku shinsiko isato, itungurya umwene! Nyore mona (wa) Waryobha, ore ika hanse urwe ko mosarabha!"

⁴¹ Ko temo eraera abhaimereri abha risengero mbamushere, hamwe nabhakonikoni nabhaghaka no okoghamba, ⁴² "Akatungurya abhande, nawe takotora kwitunguryahe. Umwene Mmonene uwa Wayahudi. Aike hanse kurwa komosarabha, nho tumwitabhereyi. ⁴³ Ariteghera Waryobha. Tigha Waryobha amutunguri bhono nyore aratuna, ko bhora aghambire, 'Oni no Omona uwa Waryobha.'" ⁴⁴ Naabhasaki bhara bhahangikirwe nawe bhonswe bhakamokara no okomosera.

⁴⁵ Bhono kukurwa enkagha iya shesa isansabha ikisunte kekabha kukyaro kyonswe kuhika enkagha iya shesa kenda. ⁴⁶ Hano yahikire shenkagha ishya shesa kenda Yesu akakura ko obhoraka obhonene, "Eloi, Eloi, lama thabakithan?" Arorokya, "Waryobha wane, Waryobha wane, nke kighire untighire?" ⁴⁷ Enkagha iyo abhamwe bhabho mbarenge bhaimereye hara bharaiteghera, bhakaghamba, "Arabherekera Eliya." ⁴⁸ Hayohayo uwomwe wabho akakenya akaghegha isifongo nu ukwishoryamo ekento ekeroro, akaetera ighoro yo omote no okomoha anywe.

⁴⁹ Bhara bhatighaye bhakaghamba, "Mumutighe umwene, mutighe torore nyore Eliya nasha kumutungurya." ⁵⁰ Ghweki Yesu akakura ko obhoraka obhonene nu ukukwa. ⁵¹ Maha, rikengero irya mokeseku ikya mwisengero rekabharoka bhetene bhibhere kurwa ighoro kuhika nse. Ikyaro kekarighita namatare ghakateka. ⁵² Shembehera shekeghoka, emebhere igha abhahoreru bharu bhano bharenge bharaye bhakaryokibhwa. ⁵³ Bhakarwa moshembehera hano yamare kuryoka, bhakasoha mumughi omohoreru, bhakabha bharu.

⁵⁴ Bhono omorendi (wa) bhara bharenge komaha Yesu bhakamaha ikirighiti namang'ana ghakorwanga, bhakahaha no okoghamba, "Mahene ono yare Omona uwa Waryobha."

⁵⁵ Abhakari bharu bhano bhasorananga Yesu kukurwa Galilaya bhamosereni ko bharenge hare bharamahera. ⁵⁶ Abhamwe bhabho mbarenge Mariamu Magdarena, Mariamu nyakuwabho Yakobo (na) Yoseph, nanyakuwabho abhana abha Zebedayo ⁵⁷ Hano yahikire komoghorobha akasha omonto umwame ku kurwa Arimathayo, ono yabherekeywe Yusufu, wonswe yare omona mwegha uwa Yesu. ⁵⁸ Akaghya ko Petro no okosabha omobhere ughwa Yesu. Nho Pilato yahamire ahanwe. ⁵⁹ Yusufu akaghegha omobhereakaghobhoha ne esanda iyi sufi endabhu, ⁶⁰ no okoghorarya mombehera yaye ehya eno yare yakorwa korotare. Akamara akahiringitya reghena rinene rekaribha ekeseku ikye embehera akarwaho. ⁶¹ Mariamu Magdalena (na) Mariamu uwonde ora ho bharenge, bhaikaye komahera embehera.

⁶² Urusiko urwa kabhere rono rwarenge urusiko urwa okoserenia, abhanene abha amasengero (na) Mafarisayo bhakekomana ko Pilato. ⁶³ Bhakamotebhya, "Omokama, torahita igha enkagha eno omorongo yarenge mohoru, akaghamba, 'Hano shinsiko isato sherehwaariryoka ghweki.' ⁶⁴ Ku igho oghambe embehera erendwe ko omorembe kohekera shinsiko isato. Erange kobha igho, abhana bhegha bhaye bharatora kusha kumwibha no okoghamba ko bhanto, 'Aryokire kurwa ko bhaku.' No obhorongo ubhwa ikihiko mborabhe bhoghogho kokera ubhwo kotanga."

⁶⁵ Pilato akabhatebhya, "Mogheghe abharendi. Mughi mokore obhorendi bhono mokotora." ⁶⁶ Bhono bhakaghya no okorenda embehera kobha no obhorendi, reghena rebhaswe nabhabheho abharendi.