¹ Nano omoghorobha oghwu urusiko uru ukumunya, eryobha ryaghwanga kohekera urusikoorwa kotanga shinsiko muhungate, Mariamu Magdalene bhakasha komaha embehera. ² Maha ikirighiti ekenene kekabhaho, kobhora omoraghe wo omokama yaikire akahingira reghena rera, akamara akarikaara. ³ Ekesosa kyaye kyarenge kyo oromesyo, shingibho shyaye nshyarenge ndabhu kya amaghena agha righoro. ⁴ Abharendi bhara bhakahaha no okobha kya abhaku.

⁵ Omoraghe akabhanshora abhakari bhara araghamba igha, "Motakobhoha bhora mmanyire igha Yesu mukutuna, ono yahangikirwe. ⁶ Tahano he, aryokire kya igho yaghambire. Mushe momahe hara Omokama yararibhwi.

⁷ Mughi bhongo motebhi abhana bhegha bhaye, 'Aryokire, maha atangatire Galilaya. Niyo moramorore.' Maha oni mbatebhiri."

⁸ Abhakari bhara bhakarwa ko mbehera hara bhongo bhongo bhana ehaho nu ubhushomerwa bhwaru, bhakakenya kotebhya abhanabhegha bhaye. ⁹ Maha Yesu akasikana nabho akaghamba, "Mbuya more." Abhakari bhara bhakasha no okomoghota amaghoro ghaye, bhakamara bhakamukumya. ¹⁰ Ghweki yesu akabhatebhya, "motakobhoha, mughi motebhi abhahiri bhane bhatangate Galilaya. Iyo mbaremaha.

¹¹ Enkagha eno abhakari bhara bhaghyanga, maha abharendi abhamwe mbagheye mumughi no okotebhya abhaimereri abha amasengero amang'ana ghonswe ghano ghabhaye. ¹² Abhaimereri bhara hano bhasikaini nabhaghaka no ukushumanshera eng'ana iyo, bhakahana abhasirikare bhara shimbirya nsharu. ¹³ No okobhatebhya igha, "Motebhi abhande igha, 'abhanabhegha abha Yesu mbaishire bhutiko nu ukwibha omobhere ughwa Yesu enkagha eno twarenge toraye.' ¹⁴ Nyore urukweri rono ndohekera omonene wo orong'ongo, bheto ntorashumanshe nawe no okobharusirya ehaho yonswe." ¹⁵ Ku igho abhasirikare bhara bhakaghegha shehera shera no okoshekora kigho bharagheribhwi. Eng'ana iyo ikirareka ko Wayahudi nayabha igho nabhono.

¹⁶ Abhahorwa ikomi naomwe bhara bhakaghya Galilaya, ko kekereghe kera yarenge abharaghereyi. ¹⁷ Bhonswe hano bhamoroshe, bhakamwitabherya. Naho abhamwe bhabho bhakarora obhohene tebhohohe. ¹⁸ Yesu akabhashako araghamba, "Nhaywe obhotoro bhonswe kukyaro (na) mwisaro. ¹⁹ Ku igho mughi mokore abhairo bhonswe bhabhe abhana bhegha. Mobhasubhe kurina irya Tata, Omona ne erye enkoro ehoreru. ²⁰ Mobheghi bhasoke amang'ana ghonswe ghano nabhatebhya, Ghweki maha, oni nendenge nabhenyu nsiko shyonswe, kohekera enkagha iyi ikihiko.