¹ Hano Yesu yamare koghamba amang'ana ghayo, akatebhya abhana bhegha bhaye, ² "Momanyire igha hano shinsiko ibhere shereheta nerabheho inyangi iye Epasaka, no omona uwa Adamu ndo areghotwa nu ukunyankibhwa."

³ Nho yabhaye igha abhimereri abha risengero abhaghaka bhakaikomania hamwe wo Omonene uwa umwimereri Omonene ono yabherekeywe Kayafa. ⁴ Kohamwe mbakore iniko iyokoghota Yesu ku kibhisire bhamwite. ⁵ Kobhora mbaghambire, "Etakabha enkagha yi inyangi okoreke etakasha kobhaho ikituri mobhanto."

⁶ Enkagha Yesu yarenge Bethania mwighutu rya Simoni omoghenge, ⁷ hano yarenge airamboye komensha, omokari omwe akamushako agheghire emekebhe ighya alabasta gheno ghyarenge namaghuta agha righori inene, akamohomera ko omotwe ghwaye. ⁸ Hano abhana bhegha bhaye bharoshe eng'ana iyo bhakarera no okoghamba, "Nke okohya igho? ⁹ Ghano ngakaghorwe ko ekerengere ekenene bhahanwe abhataka."

¹⁰ Nawe Yesu yamanyire reno, akabhatebhya, "Nkwake mukunyankya omokari ono? Nkobhora ankoreye ekento ikiya. ¹¹ Abhataka monabho nsiko shonswe, temorebha nawoni bhokora. ¹² Kobhora hano anhomereye amaghuta ghano komobhere ghwane nakore igho kukughirya yo okobhekwa kwane. ¹³ Mbhohene nkobhatebhya, hohonswe eng'ana eno hano iritabheribhwa ku kyaro kighima, eng'ana eno akore omokari ono, nereghambwa ko ukumuhita."

¹⁴ Nho uwomwe uwa ikomi nabhabhere bhara, ono yabherekeywe Yuda Iskariote, yagheye ko abhaimereri abha risengero ¹⁵ no okoghamba, "Nke moreng'a hano ndamunyanki?" Bhakarengera Yuda shimbirya merongo etato. ¹⁶ Kurwa enkagha iyo yasimiri kumunyera iniko iyo komoghota.

¹⁷ Ku urusiko orotange orwe emekate gheno ghetana obhotondoru, abhana bhegha bhakamughyako Yesu no okoghamba, "Hayi ukutuna tokosereniri ibhyakorya ibhye Pasaka?"

¹⁸ Akabhatebhya, "Moghende mumughi ko omonto omorebhe momotebhi, Umweghya aghambire, 'Enkagha yane nhang'e ere. Nendare Epasaka nabhana bhegha bhane mwighutu ryaho.'" ¹⁹ Abhana bhegha bhakakora kigho Yesu yabharaghereyi, no okohenshera ibhyakorya ebhye Pasaka.

²⁰ Hano yahikire omoghorobha, mbaikaye korya bhonswe nabhana bhegha bhaye ikomi nabhabhere. ²¹ Hano bharyanga, akaghamba, "Obhohene ndabhatebhya igha uwomwe wenyu uwe arenkorera iniko."

²² Bhakasorombara bhokongu, nabhakasimya komobhorya, "Bhono, mbohene tonihe, Omokama?"

²³ Akabhahonshokerya, "Ora akushabhya okobhoko kwaye hamwe nawoni mukishesho kemwe uwe arenkora iniko oni. ²⁴ Omona uwa Adamu nararweho, kya igho yakonirwe konirwe. Nawe mohoko ghwaye omonto ono aremokorera iniko Omona uwa Adamu! Nekabhaye bhuya ko omonto kya uyo akangire kwebhorwa." ²⁵ Yuda, ono akamunyankiri akaghamba, "Rabi noni ono?" Yesu akamotebhya, "Oghambire eng'ana iyo uwe mwene."

²⁶ Hano wanyore bhararya, Yesu akagheghegha omokate, akaghosonora. Akabhaha abhanabhegha bhaye no okoghamba, "Mogheghe more. Ghono ngo omobhere ghwane." ²⁷ Akaghegha ekekombe akakumya, akabhaha no okoghamba, "Munywere bhonswe mokekombe keno. ²⁸ Ko okobha ghano namanyinga agha riragho ryane ghano ghakweterwa ku kughirya (ya) abharu ko amabhera aghi ibhitimba. ²⁹ Naho ndabhatebhya, tindinyorwa ghweki shehagho ishyo omozabibu gheno, kohekera urusiko rora ndinywa omohya hamwe nabhenyu mo obhokama ubhwa Tata."

³⁰ Hano bhamare koretya, bhakaroshoka kughya mokekereghe ikye Mizeituni.

³¹ Ghweki Yesu akabhatebhya ubhutiko bhona bhenyu bhonswe muritureture ku kughirya yane, ko kobha yakonirwekonirwe, Ndemotema omoresya uwa amang'ondi rihisho rinyaraghane. ³² Nawe naho nderyoka, nendebhatangatera kughya Galilaya."

³³ Nho Petro akabhatebhya, "Nunyora bhoonswe bharikwanga ku kughira (ya) amang'ana ghano gharikunyora, oni tindikwangahe."

³⁴ Yesu akamohonshokerya, "ndakotebhya obhohene, ubhutiko bhono esarighoko etararaghora, noranyikane katato."

³⁵ Petro akamotebhya, "Nkokanyora ware wakukwa nauwe, tendikwikanahe." Abhana bhegha bhoonswe bhakaghamba bhuyobhuyo.

³⁶ Yesu akaemoka nabho bhakaghya ahase hano hakobherekerwa Gethsemane naakatebhya abhana bhegha bhaye, "Mwikare hano nawoni ngi era okosasama." ³⁷ Akaghegha Petro nabhana bhabhere abha Zebedayo nu ukusimya koroghora no okosorombara. ³⁸ Akamara akabhatebhya, "Enkoro yane ena obhosorombaru bhonene bhokong", nunyora okohekera ukukwa. Naho hano totengeshe hamwe nawoni." ³⁹ Akaghya mobhoronge hake, akaghwa bhobhumaye, no okosasama. Akaghamba, "Tata nyore aratorekana, ekekombe keno kindihe. Etakabha kya igho nkutuna oni, nunyora mbora ukutuna umwene." ⁴⁰ Akaghya ko abhana bhegha bhaye akanyora mbaihiribhwi, akabhatebhya Petro, "Nkwake motatengeshire nawoni okanyor nesa imwe? ⁴¹ Motengeshe no okosasama okoreke motakasoha momasakyo. Enkoro nkutunere, nawe omobhere mmorosu."

⁴² Akaemokaho urwa kabhere no okosasama, akaghamba. "Tata nyore oreng'ana eno tentore kwirihahe, mukumo nywere mokekombe keno, obhoghonshe bhwaho bhomahwe."

⁴³ Akakyora ghweki akanyora mbakihiribhwi shentero kobhora amaiso ghabho ngarenge ghakiritohire. ⁴⁴ Akabhatighaho akaghya shyaye. Akasasama urwa katato araghamba amang'ana gharaghara. ⁴⁵ Ho Yesu yabhagheyeko no okobhatebhya, "Mokeraye moramunya? Momahe, enkagha yisukire Omona uwa Adamu naranyankibhwi momabhoko agha abhi ibhitimba. ⁴⁶ Mobhoke, twemoke, Maha, ora akunyankya anyisokereye."

⁴⁷ Enkagha eno yaghambanga, Yuda uwomwe uwa bhara ikomi nabhabhere, akahika. Rikomo rya abhanto rekahika hamwe nawe rekabha ko abhaimereri abha risengero nabhaghaka abha abhanto. Bhakasha namarungu (na) masabha. ⁴⁸ Ghweki omonto ono aramunyanki Yesu yarenge abhahaye ikyorokeryo, araghamba, "Ono ndihumbata, nwe uyo. Momoghote." ⁴⁹ Hayohayo Yesu akasha no okoghamba, "Mbuyore, Umweghya!" Nu ukumuhumbata.

⁵⁰ Yesu akamotebhy, "Mosani, kora rera rekoretire." Nho bhaishire, no okomosomosya Yesu no okomoghota. ⁵¹ Maha, uwomwe wabhara bharenge hamwe (na) Yesu, yaramboye okobhoko kwaye, akasomora risabha ryaye akatema omobhaghati wo umwimereri omonene, no okomobhotora okotwe. ⁵² Nho Yesu yamotebhiri, kyorya risabha ryaho hara urirusiri, kobhora bhano bhakokora risabha, mbarisikibhwa narisabha. ⁵³ Morakanya igha tenkotora kobherekera Tata wane umwibhori, nawe yantomeye amaghasho gha abhasirikare maru kutamboka ikomi naabhere agha abharaghe? ⁵⁴ Naho bhono amakonikoni ngakatore kokorwa, nighoigho ghakutuna kobha?

⁵⁵ Enkagha iyo Yesu akatebhya ehamate era, "Bhono! Mwishire (na) maarungu (na) masabha kongota kyo omosaki? Nakera urusiko naikaye mwisengero ndeghya, temwangotire! ⁵⁶ Naho ghonswe ghano ngakorwe okoreke amakonikoni agha abharoti ghahike." Nho abhana bhegha bhaye bhamutighire no okong'osa.

⁵⁷ Bhara bhamoghotire Yesu bhakamuhira ko Kayafa umwimereri Omonene, ahase hano abhakonikoni nabhaghaka bhikomaini hamwe. ⁵⁸ Petro akamosorana kwahare kuhika hara bhaekomaini ku Umwimereri Omonene. Akasoha monse nu ukwikara hamwe nabharendi arore keno kerabhe.

⁵⁹ Bhono abhanene ne inshama yonswe bhano bhatunanga obhushuti obho obhorongo ighoro (ya) Yesu, okoreke bhahike kumwita. ⁶⁰ Nokanyora abhashuti abharu mbaishireho, nawe tebhanyore esesoro yoyonswehe. Nho yamare abhasuti bhabhere bhaiyorokeri ⁶¹ no okoghamba, "Omonto ono yaghambire, ndatora kotabhora risengero irya Waryobha no okorehaghasha kushinsiko isato ishyene.'"

⁶² Umwimereri Omonene akaemera no okoghamba igha, "Tokotora kohonshokyahe? Bano nke bhakokorokya uwe rero? ⁶³ Naho Yesu yaikaye bhukiri. Umwimereri Omonene akamotebhya, "Kigho Waryobha amenyire, ndakohamera ototebhi, nyore uwe nuwe Kristo, Omona uwa Waryobha."

⁶⁴ Yesu akamohonshokerya, "Uwe umwene oghambire eng'ana iyo. Naho ndakotebhya, kukurwa bhono no okoghenderya norarore Omona uwa Adamu aikaye bhoryo ubhwo okobhoko ukwa shinguru, arasha momasaro agha murwire."

⁶⁵ Nho Umwimereri Omonene yatandoye shingibho shyaye no okoghamba, "Ashere! Bhono, mbushuti ke tukutuna? Maha, moghaigure kigho atushere. ⁶⁶ Bhono! Nke mukwiteghera? Bhakahonshokya no okoghamba, "Mbhuya akwe." ⁶⁷ Bhakamara bhakamutwera amate mubhusyo no okomotema shinkundi, no okomobhatora amaghosi, ⁶⁸ no okoghamba, "Torotere, uwe Kristo. Newe akushatoyi?"

⁶⁹ Enkagha iyo Petro yarenge aikaye kebhara yaribhuru, no omobhaghati we ekekari akamughyako no okoghamba, "Uwe wonswe warenge hamwe (na) Yesu uwa Galilaya."

⁷⁰ Nawe yaikanire mobhoronge bhwabho, akaghamba, Temanyire keno okoghambahe."

⁷¹ Hano yagheye kebhara yi ikihita, omobhaghati uwonde uwe ekekari akamomaha no okomotebhya, bhano bharenge hayo, "Omonto ono wonswe yarenge hamwe (na) Yesu uwa Nazareti."

⁷² Akanga nu ukutyana, "Omonto ono oni temomanyirehe."

⁷³ Ekagha nke igho, bhara bharenge bhaimereye hang'e, bhakamuyako no okoghamba (na) Petro, "Ko obhohene uwe wonswe no omwe wabho, kobhora nunyora no obhoghambi bhwaho bhororokya."

⁷⁴ Nho yasimiri kuihimirya no ukutyana, "Oni temomanyirehe omonto ono," hayohayo esarighoko ekaraghora.

⁷⁵ Petro akahita amang'ana ghano yatebhibhwi (na) Yesu urinyikana katato esarighoko etararaghora.