¹ Nho obhonene ubhwa mwisaro mborereng'anibhwa naabhahara ikomi bhano bhagheghire ebhemore bhyabho no okwemoka kughya kuturung'ana mwene bhwenga. ² Abhatano abhamwe bhabho bharenge bhatong'a naabhatano abhande bharenge bhamanyi. ³ Abhahara abhatano abhateng'o bhara bhakaghegha ebhemore bhyabho, bhetana amaghuta. ⁴ Nawe ko bhang'aini bhara mbagheghire ebhemore bheno bhena amaghuta. ⁵ Bhono enkagha mwene bhwenga ateghetire kuhika, bhakasundagherano okorara.

⁶ Hano yahikire enkagha yu ubhutiko bhwa nyaghine bhakaighwa ibhikiryato, 'Maha, omoteti mwene bhwenga! Moroshoke mumuturung'ane.' ⁷ Nho abhahara bhara bhaimokire koghota ebhemore bhyabho.

⁸ Abhateng'o bhara bhatarenge namaghuta bhakatebhya abhamanyi igha, 'Mututwenere amaghuta ghenyu kobhora ebhemore bhyeto bhirimire.' ⁹ Abhamanyi bhara bhakabhahonshokerya igha, 'Teghatwise bheto (na) bhenyuhe, enoeho moghende moghore ko kerengere kyenyu.' ¹⁰ Enkagha eno bhagheye iyo koghora, Omoteti akahika, bhonswe bhano bharenge bhaisereniri bhakasoha nawe ne ekeseku kekasikwa.

¹¹ Nho abhateng'o bhara bhakorye no okoghamba, 'Omokama, omokama, tweghore.' ¹² Akabhahonshokerya igha, 'Mbohene nkobhatebhya, Tembamanyirehe.'

¹³ Temware momanyire urusiko nunyora ne enkagha he.

¹⁴ Kobhora nkyo omonto yabhaye no oroghendo kughya ikyaro kyende, Akabherekera abhaghorwa bhaye no okobhaha ubhwame bhwaye. ¹⁵ Uwomwe akanyora talanta isano, uwa kabhere, akamohana shetalanta ibhere, nu uwa katato akamohana etalanta emwe. Kera omwe koreng'ana no obhotoro bhwaye akamara akaghya ko oroghendo rwaye. ¹⁶ Uwomwe ora yanyore shetalanta isano akasherangorya akaibhoryamo isano shende. ¹⁷ Bhuyobhyuyo ora yanyore shetalanta ibhere akashibhoryamo ishyende ibhere. ¹⁸ Naho omoghorwa ono yanyore emwe yagheye akaetokera hanse, no ukubhisa ehera iyo omokama waye.

¹⁹ Ko enkagha entambe, umwimereri uwa bhaghorwa ora hano yakyore kobhara nabho. ²⁰ Ora yagheghire isano akareta ishyende isano, akaghamba, 'Omokama, okang'a talanta isano. Maha, nyore ubhwera shetalanta ishyende isano.'

²¹ Omokama waye akamukumya, omoghorwa umuya ore! Nobhaye mohene ko ebhento bheke nendakohe obhobhahi ko bhento ibhyaru. Kabhe mubhushomerwa ubho omokama waho.'

²² Omoghorwa ono yagheghire shetaranta ibhere akasha akaghamba, 'Omokama, okang'a shetaranta ibhere. Maha, nyore ubhwera shihikire ibhere shyende,' ²³ Omokama waye akamukumya, orenge omoghorwa umuya no omohene! Obhaye mohene ko bhento bhyaru nendakohane obhobhahi ubhwi ighoro ko bhento bhyaru. Kabhe nu ubhu shomerwa bho omokama waho.'

²⁴ Nho omoghorwa ono yanyore etaranta emwe yaishire no okoghamba, 'Omokama, nemanyire igha uwe mororo ore. Oraghesa ahase hano otemiri, naoraghesa ahase hano otabhusure shentetere. ²⁵ Oni nkobhoha, nkaghya kubhisa etaranta yaho momarobha. Maha anayo onayo hano era iyaho.'

²⁶ Nho omokama waye yamohonshokeyi igha, 'Uwe omoghorwa moghogho no omorosu, wamanyire igha ndeghesa ahase hano ntakemiri no okoghesa hano ntakabhusure entetere. ²⁷ Ku igho watunirwe ohane abhanto bha bha benki ne enkagha nkakyore nenkanyore era nakohaye nu ubhwera bhwako. ²⁸ Ku igho mumurusi iyo no okohana etaranta iyo omoghorwa ora yarenge ne shetalanta ikomi. ²⁹ Kera omonto ono anakyo, nariongeribhwa bhokong'u-nokanyora nukwengeribhwa. Naho ko ora atanakyo, nokanyora kera anakyo narirusibhwa. ³⁰ Momorekere kebhara mukisunte omoghorwa uyo taisirehe narikura no okotakunya amaino.'

³¹ Enkagha Omona uwa Adamu arisha ko obhohoreru bhwaye (na) abharaghe bhonswe hamwe nawe, nho arikare ighoro yi ikitumbe kyaye ikyo obhohoreru. ³² Abhairo abhi ibhyaro bhyonse mbareekomana mobhoronge bhwaye, nawe narebhahora abhanto kyabhora omoresya akwahora amang'ondi (na) shembori. ³³ Naretora amang'ondi bhyoro bhwaye, shembori bhomosi bhwaye.

³⁴ Nho omonene aremara abhatebhi bhara abha bhoryo, 'Mushe, bhano mwitabheribhwa (na) Tata umunyibhori. ³⁵ Kobhora nasengeye mokang'a ibhyakorya; Narenge omogheni mokanserenia; ³⁶ Nare kenabhi, mokanyibhohya shingibho; Narore mokandorya; Nabhohirwe mukanyishako.'

³⁷ Nho abhahene bharemohonshokerya no okomotebhya, 'Omokama, ndohe twakoroshe uno umweko, tokakoragherya? Nunyora wabhaye niinyonta tokakohana amanshe? ³⁸ Ndohe twakoroshe mogheni, tokakoserenia? Hamwe orenge kenabhi tokakwibhohya shinghibho. ³⁹ Ndohe twakoroshe orore, nunyora mokebhohe, tokakushako?

⁴⁰ No omonene arebhahonshokerya no okoghamba, 'Mbhohene nkobhatebhya, keno mwakora hano ku uwomwe wabha wamweto, noni mwakoreye.'

⁴¹ Nho arebhatebhya bhayo bharenge bhomosi bhwaye, 'Murwe kuwoni, bhano mwihimwa, mughi momoro ughwa bhokora ghono ghwakorwe kughirya iya risambwa (na) abharaghe bhaye, ⁴² kobhora narenge no umweko naho temwang'aye ibhyakoryahe; Nabhaye niinyonta, temwang'aye amanshehe; ⁴³ Narenge mogheni nawe temwanserenirihe; narenge kenabhi temwang'aye ngibhohe; narore nkabhohwa, temwanaghirihe.'

⁴⁴ Nho nabho bhonswe bharehonshokya igha, 'Omokama ndohe twakoroshe uno omweko hamwe ona inyota, orenge mogheni nunyora orenge keng'abhi, orore, obhohirwe, tokanga kokotorya?

⁴⁵ Ghweki arebhahonshokerya no okoghamba, 'Mbhohene nkobhatebhya, kera motakore ku uwomwe uwa abhake bhano, noni motakoreye.'

⁴⁶ Bhano mbarighya ko nyanko iya bhokora naho abhahene mbarighya mobhohoni ubhwa bhokora."